මර්දනයට එරෙහිව සහ ජනතා ප්‍රශ්න විසඳන ලෙස බලකරමින් අද පැවති අන්තර් විශ්ව විද්‍යාල ශිෂ්‍ය බල මණ්ඩලයේ විරෝධතාවය අතරතුර සිසුන් 08 දෙනෙකු අත්අඩංගුවට ගෙන වත්තල පොලීසියේ රඳවා ඇති බව මානව හිමිකම් කොමිසම තහවුරු කර තිබේ. නීතිඥවරුන් විසින් අත්අඩංගුවට ගත් සිසුන් පිළිබඳ විමසීමේදී මීට පෙර වත්තල පොලීසිය සඳහන් කර ඇත්තේ ඔවුන් තමන් භාරයේ නොසිටින බවයි.
අද සවස විරෝධතාවය අතරතුරදී අත්අඩංගුවට ගත් සිසුන් කුමන පොලීසිය වෙත ගෙනගියේද යන්න නීතිඥවරුන්ට සොයාගැනීම පැය කිහිපයක් ගතව තිබුණි. නීතිඥවරුන් කඩවත, පෑලියගොඩ, කිරිබත්ගොඩ සහ වත්තල පොලිස් ස්ථානවලින් විමසීමේදී පවසා ඇත්තේ අත්අඩංගුවට ගත් සිසුන් තමන් භාරයේ නොසිටින බවයි. ඔවුන් වත්තල පොලීසියේ සිටින බව පවසා ඇත්තේ මානව හිමිකම් කොමිසම මැදිහත්වීමෙන් පසුවයි.
මෙලෙස අත්අඩංගුවට ගත් සිසුන් වන්නේ කැලුම් මුදන්නායක, දිල්ෂාන් හර්ෂණ, ශෂික දිල්හාර, විහඟ ලහිරු, අසේල මධුවන්ත, ගිහාන් කුමාර, ෆ්‍රැන්සිස් ජීවන්, කොහොඹගනේ සිරිරතන යන අයයි.
