ඇෆ්ගනිස්ථානයේ කාබුල් අගනුවරදී කාන්තාවන් විසින් සංවිධානය කර තිබූ පෙළපාලියකට තලෙබාන් සංවිධානය විසින් කඳුළු ගෑස් සහ ගම්මිරිස් ප්‍රහාර එල්ලකර තිබේ.
මෙම කාන්තාවන් පවසන්නේ ඔවුන් ජනාධිපති මන්දිරය වෙත පිවිසීමට තැත් කිරීමේදී තලේබාන් භටයන් විසින් මෙම ප්‍රහාරය එල්ල කළ බවයි.
පසුගිය දින කිහිපයේ කාබුල් අගනුවර සහ තවත් ප්‍රධාන නගරයක් වන හෙරාට් හිදී කාන්තාවන්ගේ සහභාගීත්වයෙන් විරෝධතා කිහිපයක්ම පැවත්වී තිබේ.
මෙම කාන්තාවන් ඉල්ලා සිටින්නේ තමන්ට රැකියා කිරීමට සහ රජයේ ප්‍රධාන තනතුරු දැරීමට ඉඩ ලබාදෙන ලෙසයි.
තලේබාන් පාලනය ඉදිරි දින කිහිපයේදී මේ පිළිබඳ සිය ස්ථාවරය ප්‍රකාශ කරන බව පවසා තිබේ. ඔවුන් මීට පෙර පැවසූ පරිදි කාන්තාවන්ට ආණ්ඩුවේ තනතුරු දැරිය හැකි නමුත් ඇමති තනතුරු දැරීමට අවස්ථාව හිමි නොවේ.
ඇෆ්ගනිස්ථානය තුල තලේබාන් පාලනය ස්ථාපිත වූ පළමු මොහොතේ සිට එරට කාන්තාවන් එම පාලනයට විරෝධය දක්වමින් තම අයිතීන් ඉල්ලා විරෝධතාවයේ නිරත වෙමින් සිටියි. ඔවුන් බිය පළකරන්නේ වසර 20ට පමණ පෙර පැවති තලේබාන් පාලනයේදී මෙන් මෙවරත් තම අයිතීන් කඩවෙනු ඇති බවයි.
