පාකිස්ථානයේ කරච්චි නුවර ගිලන් රථ සේවයක් පවත්වාගෙන යනු ලබන ස්වේච්ජා සංවිධානයක් සිය ගිලන් රථ 50ක් සහ කාර්ය මණ්ඩලය ඉන්දීයානු ජනතාවගේ සහය සදහා ලබා දීමට ඉන්දීය අගමැතිගෙන් අවසර ඉල්ලා තිබේ.
වසංගත කළමනාකරණයට සහාය වීම සඳහා ස්වේච්ඡා කණ්ඩායමක් සහ ගිලන්රථ 50 ක් සමඟ රට තුළට ඇතුළුවීමට අවසර ඉල්ලා එදී පදනමේ සභාපති ෆයිසාල් එදී සිකුරාදා අගමැති නරේන්ද්‍ර මෝදි වෙත ලිපියක් යවා තිබේ. පාකිස්තානයේ විශාලතම ස්වේච්ඡා ගිලන්රථ ජාලයන්ගෙන් එකකට ෆයිසාල් එදී නායකත්වය දෙයි.
එදී සංවිධානය ආරම්භ කළ අබ්දුල් සතාර් ඉන්දියාවේ උපත ලද්දෙක් වන අතර ඉන්දියාව සහ පකිස්ථානය වෙන්වන අවස්ථාවේ පකිස්ථානයේ කරච්චි නගරයට සංක්‍රමණය වූවෙකි.
ෆයිසාල් එදී අගමැතිවරයාට ලිපියක් යවමින් කියා ඇත්තේ “විශාල ජනකායක් විශාල වශයෙන් පීඩා විඳින ඔබේ රටට වසංගතය විසින් ඇති කර ඇති සුවිශේෂී බලපෑම ගැන දැන ගැනීමට ලැබීම ගැන අපි කණගාටු වෙමු …. වර්තමාන වසංගත තත්ත්වයෙන් අත්මිදීම සඳහා ගිලන්රථ 50 කින් යුත් කණ්ඩායමක් ලෙස අපගේ උපකාරය ලබා දීමට අපි කැමැත්තෙමු.
ෆයිසාල් එදී ප්‍රකාශ කළේ ගිලන්රථ සහ වෛද්‍ය කාර්මික ශිල්පීන්, රියදුරන් සහ සහායක කාර්ය මණ්ඩලයගෙන් සමන්විත කණ්ඩායමක් සමඟ ඉන්දියාවට ඇතුළුවීමට ඉන්දීය රජයෙන් අවසර ඉල්ලා සිටින බවයි.
“අපගේ කණ්ඩායමට අවශ්‍ය සියලුම සැපයුම් අපි සූදානම් කරගන්නෙමු. අපගේ කණ්ඩායමට අවශ්‍ය ඉන්ධන, ආහාර සහ අවශ්‍ය පහසුකම් අප විසින් සපයනු ලබන බැවින්, අපි ඔබෙන් වෙනත් ආධාර අවශ්‍ය නොවේ.” අපි ඔබගේ අවසරය ඉල්ලා සිටින්නේ ඉන්දියාවට ඇතුළුවීමට පමණක් වන අතර ඒ සඳහා පළාත් පාලන හා පොලිස් දෙපාර්තමේන්තුවෙන් අවශ්‍ය උපදෙස් ද ලබා දෙන ලෙසයි.” ෆයිසාල් එදී වැඩිදුරටත් පවසා ඇත.
එදී පදනම අතීතයේ දී පාකිස්තානය හා ඉන්දියාව සමඟ සම්බන්ධ වූ මානුෂීය මෙහෙයුම් කිහිපයකට සම්බන්ධ වී ඇත. වසර 15 ක් පාකිස්තානයේ සිරවී සිටි බිහිරි හා ගොළු දැරියකගේ ආරක්ෂිතව නැවත ඉන්දියාවට යැවීමද මෙයට ඇතුළත් ය.
ඉන්දියාවට උදව් කිරීමට එදී පදනමේ යෝජනාව පැමිණෙන්නේ පාකිස්තාන පුරවැසියන් විසින් ට්වීටර් පණිවිඩ හරහා ඉන්දියාවට වසංගතයෙන් මිදීම සඳහා උදව් කරන ලෙස තම අගමැති ඉම්රාන් ඛාන්ගෙන් ඉල්ලා සිටීමෙන් දින කිහිපයකට පසුවයි. මේ වනවිට ‘#IndiaNeedsOxygen’ නම් හැෂ් ටැගය පාකිස්තාන ටිවීටර් පරිශීලකයන් අතර අතිශය ජනප්‍රියවෙමින් පවතියි.
