ඇස්ට්රාසෙනිකා එන්නත් නිෂ්පාදනය කරන බ්රිතාන්යයේ සහ කොරියාවේ සමාගම් කිහිපයකින්ද එම එන්නත් ලබා ගැනීමට ඉල්ලීම් කර ඇතත් මෙතෙක් ඔවුන්ගෙන් සුබවාදී ප්රතිචාර ලැබී නැතැයි ඖෂධ නිෂ්පාදන ,සැපයීම සහ නියාමන රාජ්ය අමාත්ය මහාචාර්ය චන්න ජයසුමන පවසා තිබේ.
මෙරට තවත් හය ලක්ෂයකට අස්ට්රාසෙනිකා එන්නතේ දෙවෙනි මාත්රාව දීමට ඇති බවද මහාචාර්ය ජයසුමන මෙහිදී පවසා ඇත.
මේ අතර ඇස්ට්රාසෙනිකා එන්නත ගෙන්වා ගැනීමට නොහැකි වුවහොත් එම එන්නතේ පළමු මාත්රාව ගත් අයට ” ස්පුට්නික් ලයිට් “හෝ “ජොන්සන් ඇන්ඩ් ජොන්සන් ” එන්නත ලබාදීමට අවධානය යොමුවී ඇතැයි ශ්රී ලංකා ඖෂධ සංස්ථාවේ සභාපති විශේෂඥ වෛද්ය ප්රසන්න ගුණසේන පවසයි.
එම එන්නත් වර්ග දෙකම එක මාත්රාව බැගින් ලබා දෙන කාණ්ඩයේ ඒවා බවත් ඇස්ට්රාසෙනිකා එක් මාත්රාවක් ගත් අයට මෙම එන්නත්වලින් මාත්රාවක් ලබා දීමෙන් නරක බලපෑමක් ඇති නොවන බවත් ඖෂධ සංස්ථාවේ සභාපතිවරයා පවසා තිබේ.
මේ අතර මොඩර්නා සහ ජොන්සන් ඇන්ඩ් ජොන්සන් එන්නත් මිලදී ගැනීම සඳහා අදාළ සමාගම් සමග ගිවිසුම් ගත වීමේ මුල් අදියරට පැමිණ ඇතැයි විශේෂඥ වෛද්ය ප්රසන්න ගුණසේන පවසා ඇත.
ෆයිසර් එන්නත් මාත්රා ලක්ෂ නමයක් ලබන ජුලි මාසයේදී මෙරටට ලැබෙන බව රාජ්ය ඖෂධ සංස්ථාව පවසයි.
එහෙත් ඇමති චන්න ජයසුමන ඩේලි මිරර් පුවත්පතට පවසා තිබුනේ ඇස්ට්රාසෙනිකා පළමු මාත්රාව ලෙස ලබාදුන් අයට දෙවන මාත්රාව ලෙස ෆයිසර් සහ මොඩර්නා එන්නත් ලබාදීම ගැන අවධානය යොමුවී ඇති බවයි.
ආණ්ඩුවේ බලධාරීන්ගේ පරස්පර ප්රකාශ හරහා පැහැදිලි වන්නේ ඇස්ට්රාසෙනිකා දෙවන මාත්රාව අහිමිව ඇති ලක්ෂ 6ට පමණ පිරිස වෙනුවෙන් ආණ්ඩුවට තවමත් විසඳුමකට පැමිණීමට අපොහොසත් වී ඇති බවයි. එසේම එන්නත්කරණය ක්රියාවලියේ පවතින දුර්වලතාවයද මේ හරහා පැහැදිලි වේ.
