කඳාන දිස්ත්‍රික් රෝහලේ සේවය කරන මෙම වෛද්‍යවරයා විසින් වංචනිකව අතිකාල දීමනා ලබා ගන්නා බව සෞඛ්‍යය අමාත්‍යාංශයට දැන්වීමෙන් පසුව ඔහු විසින් අතිකාල දීමනා වංචා කරනු ලබන ආකාරය පිලිබඳව කඳාන දිස්ත්‍රික් රෝහලේ හෙදියක විසින් පෙන්වා දුන්නා.

වෛද්‍යවරයෙකුට දිනකට පැය 4 ක අතිකාල සේවයේ යෙදී ඒ සඳහා මුදල් ලබා ගත හැකිය. පළවන ශ්‍රේණියේ වෛද්‍යවරයෙකුට පැයකට රුපියල් 1011 ද දෙවන ශ්‍රේණියේ වෛද්‍යවරයෙකුට පැයකට රුපියල් 980 ද ලබා ගත හැකිය. මේ අනුව පළවන ශ්‍රේණියේ වෛද්‍යවරයෙකුට තම වැටුපට අමතරව දිනකට රුපියල් 4044.00 අතිකාල දීමනා සඳහා ගෙවයි. ඒ අනුව එම ශ්‍රේණියේ වෛද්‍යවරයෙකුට තම වැටුපට අමතරව දළ වශයෙන් අතිකාල සඳහා මසකට රුපියල් 125364.00 උපයා ගත හැකිය. බොහෝ වෛද්‍යවරු තම සේවා මුරයට අමතරව පැය 5 – 8 අතර කාලයක් අවංකව රෝහල් වල සේවය කරති. එහෙත් සුළුතරයක් වූ මෙවැනි වෛද්‍යවරු බොරුවට අතිකාල ක්ලේම් දමා විශාල මුදලක් මාටියා ගසති.

කඳාන දිස්ත්‍රික් රෝහලේ හෙදියක විසින් පෙන්වා දුන් ආකාරයට ඔහු තම දිනපොත් වල රෝගීන් බැලූ බවට ව්‍යාජ සටහන් තබයි . නැතහොත් විනාඩි පහක් රෝගියා බලා ඇඳ ඉහපතේ විනාඩි 45 රෝගියා බැලූ බවට සටහන් තබයි . මෙලෙස දිනකට පැය හතරක් කවර් වන ලෙසට ව්‍යාජ සටහන් තම දින පොත් වල තබා මාසයේ අන්තිමට දින පොත රෝහල් පරිපාලන නිලධාරී / රෝහල් ගණකාධිකාරී වෙත යවයි . මොවුන් මේ සෙල්ලම දන්නවා වූවද හොර ඕටී ක්ලේම් දමන දොස්තරලා සමග ගැටුමට යාමට ඇති බිය නිසා ඒවා අනුමත කරති. මෙසේ වසර ගනනාවක් පුරා මේ දොස්තර විසින් වංචනිකව මහජන මුදල් සොරකම් කොට තිබේ. අප සිතන්නේ මහජන මුදල් වංචා කරන්නේ දේශපාලකයන් කියාය. නමුත් මෙවැනි සුදු කරපටිකාරයෝද ජනතා මුදල් පිල්ලි ගසති.

විශේෂ ලියුම් කරුවෙකි