රනිල් වික්‍රමසිංහ එක්සත් ජාතික පක්ෂ නායකත්වයෙන් ඉවත් වීමට තීරණය කර ඇතැයි පක්ෂ මහලේකම් අකිල විරාජ් කාරියවසම් පවසයි.
අද(10) මාධ්‍යවේදීන් අමතමින් ඔහු පැවසුවේ පක්ෂ නායකත්වය ඉල්ලා අස්වන බව දැනුම් දී තිබෙන බවත් නව නායකත්වයට නම් 4ක් යෝජනා වී ඇති බවත්ය. අකිල විරාජ් කාරියවසම්, වජිර අබේවර්ධන, දයා ගමගේ හා රවී කරුණානායක යන අයගේ නම් පක්ෂ නායකත්වය සඳහා යෝජනා වී ඇති බව වාර්තා වේ.
මේ අතර, එක්සත් ජාතික පක්ෂය තමන්ට හිමි ජාතික ලැයිස්තු මන්ත්‍රී ධුරය සම්බන්ධයෙන් සාකච්ඡා කිරීම සඳහා අද (10) උදෑසන සිරිකොත පක්ෂ මූලස්ථානයේ දී පක්ෂ නායක රනිල් වික්‍රමසිංහගේ ප්‍රධානත්වයෙන් රැස් වී තිබේ.
මහමැතිවරණ පරාජයෙන් පසුව නායකත්වයේ අසාර්ථකභාවය සම්බන්ධ සුපුරුදු කතිකාව එජාපය තුළ මතුව ඇත. රනිල් මෙයට පෙර අවස්ථා කිහිපයකදී , මෙලෙස නායකත්වයෙන් ඉල්ලා අස්වීමට කැමැත්ත පළ කර තිබූ නමුත් නායකත්වයෙන් ඉවත් නොවීය. මැතිවරණ පරාජය වන අවස්ථාවලදී මෙම කතිකාව ඉදිරියට පැමිණියත් නැවතත් එය යටයනු දක්නට ලැබේ. කෙසේවෙතත් රනිල් වික්‍රමසිංහ ඉවත්වී දැනට යෝජනාවී ඇති වෙනත් කෙනෙක් නායකත්වය පත්වුවත් එජාපයේ නායකත්ව ගැටුම විසඳෙනු ඇති බව සිතිය නොහැක.
