තහනම ඉවත් කිරීමෙන් පසු වාහන ආනයනය කිරීමේදී දක්වන උද්යෝගය විදේශ සංචිත කෙරෙහි අහිතකර බලපෑමක් ඇති කළ හැකි බවට අනතුරු අඟවමින් පූර්වාරක්ෂාව සඳහා පියවර ගන්නා ලෙස භාණ්ඩාගාරය මහ බැංකුව දැනුම්දී තිබේ.

වාහන ආනයනය සඳහා පනවා තිබූ සීමාවන් ඉවත් කිරීමෙන් පසු අමෙරිකානු ඩොලර් බිලියන 1ක් දක්වා ඉඩදීමේ යෝජිත ඉලක්කයට එරෙහිව පළමු මාස ​​පහ තුළ අමෙරිකානු ඩොලර් මිලියන 742ක් වටිනා ණයවර ලිපි විවෘත කර ඇති බව වාර්තා වේ.

ඒ අනුව, ණයවර ලිපි සහ ආනයන විවෘත කිරීම අපේක්ෂා කළ ප්‍රමාණයට වඩා වේගවත් බැවින්, ආනයන ප්‍රවණතාව හොඳින් අධ්‍යයනය කර කල්තියා ප්‍රතිකර්ම පියවර ගත යුතු බව භාණ්ඩාගාරය මහ බැංකුවට උපදෙස් දී තිබේ.

අමෙරිකානු ඩොලර් පිටතට ගලා යෑම විදේශ මුදල් සංචිත කෙරෙහි සහ විනිමය අනුපාත කෙරෙහි ද බරපතළ බලපෑමක් ඇති කළ හැකි බව භාණ්ඩාගාරය පෙන්වා දී ඇත.

එහි ප්‍රතිඵලයක් ලෙස, ඉන්ධන ඇතුළු අත්‍යවශ්‍ය ද්‍රව්‍ය ආනයනය කෙරෙහි බලපෑමක් ඇති විය හැකිය.

දීර්ඝ කාලයක් තිස්සේ පැවති වාහන ආනයන තහනම මෙම වසරේ පෙබරවාරි මාසයේදී ඉවත් කරන ලද අතර, මේ වන විට වාහන 18,000කට වැඩි ප්‍රමාණයක් රට තුළට ගෙනැවිත් ඇති අතර, ආනයන බදු මගින් රුපියල් බිලියන 220ක බදු ආදායමක් උපයා ඇති බව රේගු මාධ්‍ය ප්‍රකාශක සීවලි අරුක්ගොඩ පැවසීය.

වාහන ආනයනයෙන් ලැබෙන ආදායම මේ වසර සඳහා මේ දක්වා රුපියල් ට්‍රිලියනයක රේගු බදු සඳහා සැළකිව යුතු දායකත්වයක් ලබා දී ඇත.

මෙම වසරේ රේගු ආදායම් ඉලක්කය රුපියල් ට්‍රිලියන 2.1කි. නමුත් මේ මුදල් ලැබෙන්නේ රුපියල්වලින් වන බැවින් රටේ ආර්ථික අර්බුදය විසදීමට අදාළ සැළකිය යුතු දෙයක් සිදු නොවේ.

අපේ රට ආර්ථික අර්බුදයක් ඇතිවීමට බලපෑවේ විදෙස් සංචිතවල අර්බුදයක් නිසා වන අතර ඒ අනුව ආර්ථිකය ස්ථාවර වීමට නම් එම සංචිත ඉහළ දමා ගැනීම අවශ්‍ය වේ. මන්ද අපට ණය ගෙවීමට සිදුවන්නේ ඩොලර්වලිනි. මේ වසරේ සිට ඩොලර් බිලියන 4ක පමණ පොලීයක් විදෙස් ණයවලට අදාළව ලංකාව ගෙවිය යුතුය.