ත්‍රස්තවාදය වැළැක්වීමේ පනත, අන්තරේ උද්ඝෝෂණයට පහරදී ශිෂ්‍ය නායකයින් අත්අඩංගුවට ගැනීම සහ ඉන්දියානු අගමැති සමඟ ලංකා ආණ්ඩුව අත්සන් කිරීමට නියමිත ගිවිසුම් සම්බන්ධයෙන් ජනතාව දැනුවත් කිරීම සඳහා ජන අරගල සන්ධානය අද ( 2025 මාර්තු 31) දින පෙ.ව. 10.00ට නුගේගොඩ දී විශේෂ මාධ්‍ය හමුවක් කැඳවන ලදී. මේ සඳහා ජන අරගල සන්ධානයේ ජාතික විධායක සභිකයින් වන ධර්මසිරි ලංකාපේලි, ස්වස්තිකා අරුලිංගම්, රාජ්කුමාර් රජීව්කාන්ත් සම්බන්ධ විය.
ඉන්දියානු රජය සමඟ ජාතික ජනබලවේගය ආණ්ඩුව අත්සන් කිරීමට නියමිත ගිවිසුම් සහ මෑත වාර්තා වූ මර්දනකාරී සිදුවීම් පිළිබඳ ජන අරගල සන්ධානයේ මාධ්‍ය හමුවේදී එම සන්ධානයේ විධායක සභික ධර්මසිරි ලංකාපේලි
” අපි ජන අරගල සන්ධානය විදිහට මේ මාධ්‍ය හමුව කැඳවන්නේ ඉතාම සංකීර්ණ දේශපාලන වාතාවරණයක් පවතින මොහොතක. එළඹෙන අප්‍රේල් 4 – 6 දිනවලදී ඉන්දීය අග්‍රාමාත්‍ය නරේන්ද්‍ර මෝදි ලංකාවේ නිල සංචාරයක් සඳහා පැමිණෙන්න නියමිතයි. නමුත් ඒ සංචාරයේ අරමුණු මොනවද සහ එහිදී ඔහු ලංකාවේ ආණ්ඩුවත් සමග අත්සන් කරන්න නියමිත ගිවිසුම් මොනවද කියන කාරණය ගැන ආණ්ඩුව තවමත් හෙලිදරව් කර නෑ. හැබැයි ඉන්දියානු මාධ්‍යවල මේ සංචාරය සම්බන්ධයෙන් වාර්තා ගණනාවක් පල වෙලා තියනවා. ඒ අනුව ඔහු අපේ රටේ දින හතරක කාලයක් රැඳී සිටින්න නියමිතයි. එහිදී ඉන්දියාව සහ ලංකාව අතර ඉන්දු ලංකා නව ආරක්ෂක ගිවිසුමක් අත්සන් කරන්න නියමිත බව වාර්තා වෙනවා. ඉන්දියානු සහ ලාංකා ආණ්ඩු අතර මේ ගිවිසුම අත්සන් කරන්න සූදානම් වෙන්නේ මුලු ලෝකයම භූ දේශපාලන උණුසුමක පැටලිල ඉන්න වෙලාවක. විශේෂයෙන්ම මේ වෙලාවෙත් ඇමරිකාව සහ චීනය ආසියානු මුහුදේ බලය තහවරු කරගැනීම සඳහා දැවැන්ත බල අරගලයක පැටලිලා ඉන්නේ. එහෙම තත්වයක් ඇතුලේ ලංකාව සහ ඉන්දියාව අත්සන් කරන්න සූදානම් වෙන ආරක්ෂක ගිවිසුම රටට බරපතළ විදිහට බලපාන්න පුලුවන්. මේ ගිවිසුම සම්බන්ධයෙන් චීනය, ඇමරිකාව ඇතුළු රටවල් දරණ ආකල්පය අපි තවම දන්නෙ නෑ. මේ ගිවිසුම නිසා ලංකාවේ ජනතාවගේ ආරක්ෂවා බරපතළ විදිහට තර්ජනයට ලක් වෙන්න පුලුවන්. ආණ්ඩුවට කිසිඳු අයිතියක් නෑ එවැනි අනතුරු දායක ගිවිසුමක් ජනතා අනුමැතියකින් තොරව අත්සන් කරන්න. ඒ නිසා ආණ්ඩුව වහාම මේ ගිවිසුම සම්බන්ධයෙන් රටට හෙලිදරව් කළ යුතුයි.
මේ දින හතරෙදි ඉන්දියානු අග්‍රාමාත්‍යවරයා ලංකාව සමග සූර්‍ය බලශක්ති ගිවිසුමක් සහ විදුලිබලය බෙදාහැරීම සම්බන්ධයෙන් වන ගිවිසුම් කිහිපයක් අත්සන් කරන්නත් සූදානම් වෙනවා. අපි දන්නවා පසුගිය ආර්ථික අර්බුදය වෙලාවේ ඉන්දියාව අපේ රටට ඩොලර් මිලියන 4.5ක ආධාරයක් ලබා දුන්නා. දැන් ඒ ඇම පාවිච්චි කරලා මෝදි සූදානම් වෙනවා ලංකාවේ ස්වාධීනත්වය මංකොල්ලකන්න. ආණ්ඩුවත් ඒ සැලැස්මේ ඉත්තෙක් වෙලා. ඔවුන් සූදානම් වෙන්නෙ ඩොලර් මිලියන 4.5ක මුදල් ආධාරයට ඉලව් වෙන්න මුළු ලංකාවම ඉන්දියාවට පවරන්න. ලංකාව ඉන්දියාවේ ප්‍රාන්තයක් බවට පත් කරන්න. ජනතාව වහාම මේ තත්වයට එරෙහි විය යුතුයි. මොකද මේ ක්‍රියාත්මක වෙන රාජ්‍ය ප්‍රතිපත්තිය අනාගතයේදී සමස්ත ජනතාවටම බලපාන්න නියමිතයි.
අනිත් එක තමයි බලයට එන්න කලින් මර්දනයට එරෙහිව සටන් කළ ආණ්ඩුවක් අද වෙද්දී රටේ ජනතාවට එරෙහිව මර්දනය යාන්ත්‍රණය ක්‍රියාත්මක කරමින් ඉන්නවා. දැන් පසුගිය දවසක සම සෞඛ්‍ය උපාධිධාරී ශිෂ්‍යයන්ගේ අරගලයට පොලීසිය යොදවල ආණ්ඩුව මෙලෙච්ඡ ප්‍රහාරයක් දියත් කළා. එහිදී ශිෂ්‍යන් ගණනාවක් අත් අඩංගුවට ගත්තා. ඒ අතරින් අන්තරේ කැඳවුම්කරු මධුෂාන් චන්ද්‍රජිත් ඇතුළු ශිෂ්‍ය නායකයින් දෙදෙනක් තවමත් ඉන්නේ බන්ධනාගාරයේ. ආණ්ඩුව මේ ආදර්ශයට ගනිමින් ඉන්නේ රනිල් වික්‍රමසිංහ ක්‍රියාත්මක කළ මෙලෙච්ඡ මර්දන ප්‍රතිපත්තියම තමයි. මහ රෑ 2.00ට පොලිසියෙන් 200ක් විතර ඇවිත් පහර දීලා ශිෂයන්ව අත් අඩංගුවට ගත්තා. මේ සම සෞඛ්‍ය උපාධිධාරීන්ගේ අරගලය ඉතාමත් සාධාරණ අරගලයක්. ඒ උපාධිධාරීන්ව අවුරුදු පහක් තිස්සේ රාජ්‍ය සේවයට බඳවාගෙන නෑ. අපි දන්නවා සම සෞඛ්‍ය උපාධිධාරීන් නිර්මාණය කිරීම සඳහා රජය විශාල වියදමක් දරවනවා. ඉතින් එහෙම වියදම් කරල බිහිකරන උපාධිධාරීන්ව රාජ්‍ය සේවයට බඳවාගැනීම අණ්ඩුවේ වගකීමක්. හැබැයි ආණ්ඩුව උත්සහ කරමින් ඉන්නේ මේ කාරණය එක්ක සෙල්ලම් කරමින් බොර දියේ මාළු බාන්න. රාජ්‍ය විශ්වවිද්‍යාලවලින් බිහි වූ සම සෞඛ්‍ය උපාධිධාරීන් සහ කොතලාවල පෞද්ගලික උපාධි ආයතනයේ උපාධිධාරීන් එකතු කරල තරඟ විභාගයක් පවත්වන්න ආණ්ඩුව සූදානම් වෙනවා. මේකෙන් වෙන්නේ පෞද්ගලික විශ්වවිද්‍යාල සඳහා වලංගු භාවය හිමි වීම. අනිත් කාරණය තමයි රාජ්‍ය උපාධිධාරීන් විශාල ප්‍රමාණයක් ඉන්න තත්වයක් ඇතුළේ පෞද්ගලික උපාධි ආයතනවල ශිෂ්‍යයන්ව රාජ්‍ය සේවයට බඳව ගන්න ආණ්ඩුව සූදානම් වෙන්නේ කාගේ උවමනාවක් තෘප්ත කරන්න ද ? අපි ජන අරගල සන්ධානය විදිහට ආණ්ඩුවේ මේ මෘග ක්‍රියාව පිළිකුලෙන් යුතුව හෙලා දකිනවා. අණ්ඩුව මේ මර්දනය වහාම නතර කළ යුතුයි. ඒ වගේම තමයි රිමාන්ඩ් ගතකළ කළ ශිෂ්‍යය නායකයින් දෙදෙනාව නිදහස් කරන්න ඕන. සම සෞඛ්‍ය උපාධිධාරීන්ගේ ඉල්ලීම් පිළිබඳව සාධාරණ පදනමක් මත පිහිටා කටයුතු කරන්න කියන කාරණයත් අපි මේ වෙලාවේ ආණ්ඩුවට මතක් කරනවා.
ජාතික ජන බලවේග ආණ්ඩුව බලයට එන්න කලින් ජනතාවට පොරොන්දු වුනා ත්‍රස්තවාදය වැළැක්වීමේ පනත අහෝසි කරන බවට. නමුත් ඒ කාරණය දැන් ආණ්ඩුවට අමතක වෙලා. දැන් ආණ්ඩුව ඒ මෙලෙච්ඡ පනතම භාවිතා කරමින් පුද්ගලයින් අත් අඩංගුවට ගන්න පටන් අරගෙන. මේ වෙද්දි ඊශ්‍රායලය විසින් පලස්තීනයට එරෙහිව මෙලෙච්ඡ යුද්ධයක් ක්‍රියාත්මක කරමින් යනවා. ලෝකයේ සියලු මානව හිතවාදී මිනිසුන් පිළිකුලෙන් යුතුව හෙලා දකින මේ යුද්ධය ගැන ලංකාවේ ආණ්ඩුව දරන ආකල්පය අපිට තවමත් පැහැදිළි නෑ. පසුගිය දවසක එම ඊශ්‍රායලය විසින් ක්‍රියාත්මක කරනු ලබන මෙලෙච්ඡ යුද්ධයට විරෝධය දක්වමින් අන්තර්ජාලයේ පෝස්ට් ශෙයාර් කළ මුස්ලිම් තරුණයෙක් අත් අඩංගුවට ගන්න ආණ්ඩුව කටයුතු කලා. ත්‍රස්තවාදය වැළැක්වීමේ පනත නිසා එක් කාලයක පීඩාවට පත් වුණු ජනතා විමුක්ති පෙරමුණ සහිත ජාතික ජන බලවේග ආණ්ඩුවම දැන් ඒ පනත ජනතාවට විරුද්ධව භාවිතා කිරීම ඉතාම පිළිකුල් සහගතයි.
අපි ජන අරගල සන්ධානය විදිහට රටේ ජනතාවට කියනවා මේ වෙලාව කියන්නේ ඔබ නිහඬව බලා සිටිය යුතු වෙලාවක් නෙවෙයි. දැන් ආණ්ඩුව ක්‍රියාත්මක කරමින් යන මේ ජනතා ද්‍රෝහී වැඩපිළිවෙළ පරාජය නොකලොත් මුළු රටක්ම අනතුරේ වැටෙන්න නියමිතයි. ඒ නිසා මේ වෙලාවේ ආණ්ඩුවේ ක්‍රියාමාර්ග සම්බන්ධයෙන් මැදිහත් වීමක් කරන්න එකතු වෙමු කියන යෝජනාව අපි ජනතාදට ඉදිරිපත් කරනවා. “
