ගුණාත්මකභාවයෙන් අඩු ඖෂධ සැපයීම හෝ විකිණීම යන වරදට මෙතෙක් අය කළ රුපියල් සියයේ දඩ මුදල රුපියල් ලක්ෂය දක්වා ඉහළ දැමීමට කැබිනට් මණ්ඩලයේ අනුමැතිය හිමිව ඇතැයි වාර්තා වේ.
යම් ඖෂධයක් නියමිත ගුණාත්මකභාවය අඩුවන පරිදි මිශ්‍ර කිරීම සහ ඒ බව දැනුවත්ව එම ඖෂධය බෙහෙත් ශාලාවකින් නිකුත් කිරීම යන වරදවල් වලට මෙතෙක් පැවැති දඩ මුදල වූයේ රුපියල් 100කි.
අධිකරණ බන්ධනාගාර කටයුතු සහ ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ආචාර්ය විජයදාස රාජපක්ෂ මෙම පනත් කෙටුම්පත කැබිනට් මණ්ඩලයට ඉදිරිපත් කර ඇත.
මේ දිනවල බාල ඖෂධ රට තුළට ගෙන්වීම සහ බාල ඖෂධ රට තුළ ව්‍යාජ බලපත්‍ර යොදාගෙන නිෂ්පාදනය කිරීම සම්බන්ධයෙන් විශාල කතා බහක් ඇතිව ඇති යුගයකි.
එසේම බාල ඖෂධ හේතුවෙන් විශාල පිරිසක් ජීවිතක්ෂයට සහ අතුරු ආබාධවලට ලක්විය.
මෙවැනි තත්ත්වයකදී එවැනි වැරදි සිදුකරන්නන් සඳහා දඩය රුපියල් ලක්ෂයක් කිරීම කිසිසේත් ප්‍රමාණවත් නොවේ.
ඔවුන් විශාල දඩයකට ලක් කළ යුතු අතරම අපරාධමය නීතියකට යටත් කළ යුතු බව බොහෝ දෙනෙකුගේ මතය වී තිබේ.
