මෙවර අය වැයෙන් මෙරට විශාලම පුද්ගලීකරණය සිදුකරන බව ජනාධිපති රනිල් වික්‍රමසිංහ පවසනවා.
මෙවර අයවැය රටේ ආර්ථිකය සහ දේශපාලනය වෙනස් කරන අයවැයක් බවත්, දේශපාලනයකින් තොරව රටේ ආර්ථිකය ගොඩනැඟීමේ වැඩපිළිවෙළ සාර්ථක කරගැනීම තම අරමුණ බවත්, ඔහු එහිදී අවධාරණය කර සිටියා.
ජනාධිපතිවරයා මේ බව සඳහන් කළේ, මාධ්‍ය ආයතන ප්‍රධානීන් සමඟ ජනාධිපති කාර්යාලයේ ඊයේ (14) පස්වරුවේ පැවැති ප්‍රවෘත්ති සාකච්ජාවකට එක්වෙමින්.
මෙහිදී වැඩිදුරටත් අදහස් දැක්වූ ජනාධිපතිවරයා,
“රටක් ලෙස ඉදිරියට යන විට රාජ්‍ය වියදම් සීමා කළ යුතුයි.රාජ්‍ය වියදම් සීමා කිරීම වෙනුවෙන් තීන්දු තීරණ රැසක් අප මෙවර අයවැයෙන් ගෙන තිබෙනවා.
රටේ ආර්ථිකය වෙනුවෙන් අපි රුපියල් බිලියන 500යි, ට්‍රිලියනයයි අතර වත්කම් ඇතුළු කර තිබෙනවා. ශ්‍රී ලංකන් ගුවන් සේවාව අළෙවි කර, මේ සියලු සේවාවන් එකතු කළත් මෙපමණ මුදලක් ලැබෙන්නේ නැහැ. මේවායේ නිෂ්පාදන කටයුතු දැන් ඉහළ නැංවිය හැකියි. එය අප ගත් විශාල පියවරක් ලෙස මම දකිනවා. මෙය තමයි ලංකාවේ තිබෙන විශාලම පෞද්ගලීකරණය.”
