ගිලන් යහනක ඔත්පලව වැතිරී
හුස්මක් යදින මොහොතක
අතීතය ඇවිදින්
ඇද ලඟින් බිම ඉඳන්
ඇණ තියාන
හූල්ලපු තැන්
හඬපු වැළපුණු තැන්ම
මඟදිගට පෙන්වද්දී
හිස අතගගා
පයින් පහරක් දෙමි
වැර යොදා
අතීතයට
විසිවී කැරකී වැටෙන්න
යළිත් හුස්මක් සොයමි
වාතලය පහුරුගා
පෙනහැල්ලෙන් අංශුවක් හෝ
පුරවන්න ඉඩ ඇති තැනක්
ඇත්නම් සසර යැයි යමක්
ඒ සසර කවදා කොහේ දී හෝ යළි
හමුනොවේවායි නුඹ
තිර සිතින් පතමි
මහ මඟක් බස් රියක
අහම්බෙන් හෝ දිනක
මේ අවසන් මොහොත
විය හැකි බැවින්
‘‘අදත් ඔයා වෙනුවෙන්
බෝධි පූජාවක්
උපදනා මතු හැම භවෙම
ඔබ මගේම වෙන්නැයි
පැතූයෙමි මම
මලක් පහනක් තැබූ හැම තැනම
ඔබ මා හැර දමා ගිය දා සිටම’’
වට්ස්ඇප් පණිවිඩයක්…
මම
දුරකථනය පොළොවේ ගසමි
