සැප්තැම්බර් 29 වැනි දා අගමැති මහින්ද රාජපක්ෂගේ ප්‍රධානත්වයෙන් පැවැති මාධ්‍ය හමුවකදී තමයි ඔහු මේ බව ප්‍රකාශ කරන්නේ. විද්‍යුත් හා මුද්‍රිත මාධ්‍ය ආයතන වල ප්‍රවෘත්ති අධ්‍යක්ෂකවරුන් සහ පුවත්පත් කතුවරුන් සමග පැවති හමුවේදි කෙහෙළිය රඹුක්වැල්ල කියා සිටියේ ඔවුන්ට ජනතාව තුනෙන් දෙකක බලයක් ලබා දී තිබෙන්නේ බඩු මිල අඩු කරන්නටවත් රැකියා ප්‍රශ්න විසඳන්නට වත් නොව 20 වන ව්‍යවස්ථා සංශෝධනය ගෙන ඇවිත් දහනම වන ව්‍යවස්ථා සංශෝධනය බල රහිත කිරීමට බවයි.
එහිදී නව ව්‍යවස්ථාවක් ගෙන එන්නේ ද, එය ජනමත විචාරණයකට ලක් කරන්නේද, කියා මාධ්‍යවේදීන් නැඟූ පැනයට උදය ගම්මන්පිල පිළිතුරු දෙමින් කියා සිටියේ නිවාර්යෙන්ම නව ව්‍යවස්ථාවක් ගෙන එනවා නම් එය ජනමත විචාරණයකට ලක් කළ යුතු බවයි. නමුත් මහින්ද රාජපක්ෂ ප්‍රකාශ කරන්නේ ඔවුන්ට මෙවර තුනෙන් දෙකක් ලැබී තිබෙන්නේ නව ව්‍යවස්ථාවක් ගෙන ඒමට බවයි. ඒ නිසා ජනමත විචාරණයක් අවශ්‍ය නොමැති බව ඔහුගේ අදහසයි.
ඉතිං තුනෙන් දෙකේ බලයක් ජනතාව ලබාදී මන්ගේ ප්‍රශ්න ආණ්ඩුව විසින් විසඳලා දේවී කියා සිතා සිටියා නම් වැරදියි තිබෙන්නේ ජනතාවට බව දැන් මේ ආණ්ඩුව කරන කියන දෑ තුළින් තේරුම් ගැනීමට පුළුවන. තුනෙන් දෙකේ බලයෙන් ආණ්ඩුව සහ පිරිවර කරමින් තිබෙන්නේ තමන්ගේ ප්‍රශ්න විසඳාගැනීමට අවශ්‍ය වටපිටාව නිර්මාණය කර ගැනීමයි.
ඉතිහාසගත මේ තුනෙන් දෙකෙන් ජනතා ප්‍රශ්න මේ වතාවේදී ද නොවිසඳෙන බව ජනතාව තේරුම් ගත යුතුයි.
