ලංකාවේ නිරෝධායන මධ්‍යස්ථානවලින් මැලේරියා රෝගීන් අට දෙනෙකු හමුවී ඇතැයි මැලේරියා මර්දන ඒකකයේ අධ්‍යක්ෂ වෛද්‍ය ප්‍රසාද් රණවීර පවසා තිබේ.
මෙම රෝගීන් නිරෝධායන මධ්‍යස්ථාන තුළින් වාර්තා වීම නිසා මැලේරියා රෝගය පැතිරීම වැළක්වීම පහසු වී ඇති බවද ඔහු පවසයි.
මාතලේ පැල්වෙහෙර නිරෝධායන මධ්‍යස්ථානයෙන් මැලේරියා රෝගීන් පස්දෙනෙකු සහ මීගමුව හෝටලයක ස්ථාපිත කර ඇති නිරෝධායන මධ්‍යස්ථානයකින් රෝගීන් තිදෙනෙකුද හමුවී තිබේ.
පැල්වෙහෙරින් හමුවූ රෝගීන් පස්දෙනා දඹුල්ල රෝහලේද මිගමුව රෝගීන් මීගමුව රෝහලේද ප්‍රතිකාර ලබන බව වාර්තා වේ.
මැලේරියා මර්දන ඒකකයේ අධ්‍යක්ෂවරයා පවසන ආකාරයට මෙම රෝගීන් නිවෙස්වලට ගියේනම් මදුරුවන් හරහා මෙම රෝගය තවදුරටත් පැතිරීමට හැකියාව තිබූ බව ද එසේ වීනම් මෙම රෝගීන් සංඛ්‍යාව 100ක් 200ක් වීමට ඉඩ තිබී ඇත.
පුද්ගලයන් 100 දෙනෙකු සිටින පැල්වෙහෙර නිරෝධායන මධ්‍යස්ථානයේ 10දෙනෙකු මැලේරියා සඳහා පරික්ෂා කළබවත් ඉන් පස් දෙනෙකුට රෝගය වැළඳී ඇති බවට තහවුරු වූ බවත් ඉතිරි 90 දෙනාද පරික්ෂා කරන බවත් අධ්‍යක්ෂකවරයා පවසයි.
එසේම මීගමුව නිරෝධායන මධ්‍යස්ථානයේ 180 දෙනෙකු පරීක්ෂණ සඳහා යොමු කළ බවද ඉන් තිදෙනෙකුට මැලේරියා ඇති බවට තහවුරු වී ඇති බවත් අධ්‍යක්ෂකවරයා වැඩි දුරටත් පවසා ඇත.
medialk වෙබ් අඩවිය ඇසුරිණි
