හිටපු අමාත්‍ය ටිරාන් අලස්ගේ නීති විරෝධී අක්වෙරල ආයෝජන සම්බන්ධයෙන් වන පැමිණිල්ලක් අද ජන අරගල සන්ධානය විසින් අල්ලස් හෝ දූෂණ විමර්ශන කොමිසම වෙත භාරදෙනු ලැබුවා. ඒ අනුව එම පැමිණිල්ල විසින් තහවුරු කරනු ලැබුවේ, ටිරාන් අලස් ලංකාවේ විනිමය පනත උල්ලංඝනය කරමින් බ්‍රිටිෂ් වර්ජින් අයිලන්ඩ් දූපතෙහි Banham Ventures Limited සහ Bromption properties හි පිළිවෙලින් බ්‍රිතාන්‍යය පවුම් 1,550,000 ක් සහ 1,400,100 ක් ආයෝජනය කර ඇති බවයි.
මේ පිළිබඳව අදහස් දක්වමින් ජන අරගල සන්ධානයේ විධායක සභික දුමින්ද නාගමුව සඳහන් කර සිටියේ, මේ පිළිබඳව ජාත්‍යන්තර ගවේෂණාත්මක මාධ්‍යවේදීන්ගේ සංසදය (ICIJ) 2023 දී පැන්ඩෝරා පත්‍රිකා හරහා ද හෙළිදරව් කිරීමක් කර ඇති බවයි.
