පසුගිය සතියේ මම සීතා ගැන යමක් ලීවේ දරුවන් විසි කිරීම සම්බ්ධ කර ගෙනය. එහෙත් එහි ප්‍රධාන ධාරාව නම් සීතා යනුවෙන් සමාජය මූර්තිමත් කරන්නේ කුමක්ද යන්නයි. සීතා යනු ගැහැණුන්ට පර්යාය පදයක් ලෙස සමාජය සලකන්නට පුරුදු වී ඇත. පවිත්‍රත්වය පති භක්තිය වැනි බොහෝ සදාචාර සම්මතයන් වෙනුවෙන් සීතා පරමාදර්ශයකි. පවිත්‍රත්වය පැවතිය යුත්තේ ගැහැනු තුළ පමණණ ද? පති භක්තිය තිබිය යුත්තේ ගැහැණු තුළ පමණද? පිරිමියා ගැහැණියගේ විශ්වාසය රැකිය යුතු නොවේද?
සීතා පිළිබඳ සිද්ධිය පමණක් සැලකූ විට පවා ඇගේ පවිත්‍රත්වය තහවුරු කිරීමට ඇයට ගින්නට පනින්න යැයි රාමා කියයි. ඇය පිරිමි යුද්ධයක ගොදුරකි. ඇය සිදු වූ කිසිවක නිර්මාණකරුවකු නොවීය. ඇයට සිදු වූ අපහරණයකි. ගහෙන් වැටුණු මිනිසාට ගොනා අනින්නා සේ ඇයට අවසානයේ ගින්නට පැන පවිත්‍රත්වය සංකේවත් කිරීමට සිදු වීම පුරුෂ මූලික සමාජයක නිර්ණායක අනුව හැසිරීමට සිදු වීම පිළිබඳ උදාහරණයකි. ඇගේ පවිත්‍රත්වය නැති වූවා නම් එසේ වන්නේ ඇගේ වරදින් නොව ඇය දූෂණයට ලක් වීමෙන් යැයි සිතීමට තරම් බුද්ධියක් එම සමාජය ෂතු වූයේ නැත. සතුරාගේ බිරිඳ පැහැරගෙන ඒම දූෂණණය කිරීම එවැනි යුද්ධක ඇති විය හැකි සාමාන්‍ය දේවල්ය. එහෙත් එසේ යථාර්ථවාදයකින් තොරව ඇයට ගිනන්ට පැන පවිත්‍රත්වය සංකේතවත් කිරීමට සිදු වේ. එවැනි වීර කාව්‍යය ආඛ්‍යානයක යථාර්ථවාදයක් බලාපොරොත්තු වීම දුෂ්කර වුවද එම කතා අපට පවසනන්නෙන් එම සමාජයේ පැවති සදාචාර නිර්නායකයන්ය. ගත වූ කාලය තුළ රාමාගේ පවිත්‍රත්වය කිසිවෙකු විමසුවේ නැත.
අදද එසේමය. පවිත්‍රත්වය විමසන්නේ ගැහැණියගේ පාර්ශවයෙන් පමණි. පිරිමින්ට නාගෙන ගෙට පැමිණිය හැකිය. පිරිමියා කරන එම වරදම කරන ගැහැණියක වෛශ්‍යාවක ලෙස සැලකීමත් සමහර විට පිරිමියා එසේ කරන විට පොරක් හෝ වැඩ කාරයෙක් ලෙස සැලකීමත් මෙම සදාචාර සම්මතය් ස්ත්‍රී පුරුෂ දෙපාර්ශවයට දෙයාකාරයකට බලපාන ආකාරය පිළිබිඹු කරයි.
සමාජය පුරුෂ මූලික වීමේදී පිරිමියාට අවශ්‍ය පරිදි ගැහැණිය හැසිරීමට හැකිය යන උපකල්පනය ගැහැණු පිරිමි දෙපාර්ශවම දැරීම එම ක්‍රමයේ ලක්ෂණයකි. ගැහැණිය පිරිමියා සතු දේපළකි. ඇය අවශ්‍ය පරිදි පරිහරණය කිරීමට පිරිමියාට අයිතිය ඇත. පිරිමි කුමන ගැහැණියක සමඟ සම්බන්ධතා පැවැත්වුවද බිරිඳට එය ප්‍රශ්න කළ නොහැකි අතර ප්‍රශ්න කරන බොහෝ විට ඇය ගෘහස්ත ප්‍රචණ්ඩත්වයට ලක් වේ. අතිනන් පයින් පහර කෑමට ලක් වීම මෙන්ම ප්‍රශ්න කරනන ගැහැණියගේ හඬ නිහඬ කිරීමට හිංසනය ආයුධයක් සේ බොහෝ තැන භාවිතා වේ. විවාහයට පෙරද විවාහයෙන් පසු ද ගැහැණියගේ පවිත්‍රත්වය පමණක් සමාජයේ ගැහැණු පිරිමි දෙපාර්ශවයම ප්‍රශ්න කරති. මෙය සීතා මොඩලයයි. මෙය කොයි තරම් අසාධාරණ දැයි යළිත් සිතා බැලිය යුතුය.
පවිත්‍රත්වය නම් සමාජ සම්මතයක් පවතිනවා නම් එය ගැහැණු පිරිමි දෙපාර්ශවයටම පැවතිය යුතුය.
සංජීවනී රූපසිංහ
