මෙරට රැඳීසිටින ඊශ්‍රායල් ජාතිකයින් තම ආගමික කටයුතු, විවේක කටයුතු මෙන්ම ආහාර පාන ලබාගැනීම සඳහා ස්ථාපිත කර තිබෙන චබාද් මධ්‍යස්ථානවලට ආරක්ෂාව ලබාදීම සම්බන්ධයෙන් පැහැදිලි කරමින් පොලීසිය නිවේදනයක් නිකුත් කර තිබේ.
එහි දැක්වෙන්නේ පොලිස් වසම් කිහිපයක් තුළ ස්ථාපිත කර ඇති චබාද් මධ්‍යස්ථානවලට පවතින තර්ජනයන්ට සාපේක්ෂව අදාළ මේ වනවිට පැය 24 පුරාම ආවරණය වනපරිදි ආරක්ෂාව ලබාදීමට පියවර ගෙන ඇති බවයි.
තවද දිවයිනේ රැඳීසිටින කවර හෝ විදේශීය ජාතිකයින්ගේ ආරක්ෂාව සම්බන්ධයෙන් කිසියම් තර්ජනයක් පවතී නම් ඒ සම්බන්ධයෙන් තක්සේරු කොට අවශ්‍ය ආරක්ෂාව සැපයීමට ශ්‍රී ලංකා පොලීසිය කටයුතු කරන බවද සඳහන් වේ.
පලස්තීනය සම්බන්ධ ප්‍රශ්නයේදී ලංකාව ඊශ්‍රායලය සමඟ සබදතා පැවැත්වීම සම්බන්ධයෙන් චෝදනා එල්ල වෙමින් පවතියි. එමෙන්ම නීතිවිරෝධී ආකාරයෙන් ආගමික ස්ථාන පවත්වාගෙන යාමට අවසර දීම , දේපළ මිලදී ගැනීමට අවසර දීම සහ ඊශ්‍රායල සෙබළුන්ට ලංකාවට පැමිණීමට අවස්ථාව ලබාදීම සහ ලාංකික සේවකයන් ඊශ්‍රායලය වෙත යැවීමේ කොන්ත්‍රාත් ගතවීම සම්බන්ධයෙන් චෝදනා එල්ල වෙමින් පවතියි.
