කොළඹ අපරාධ විමර්ශන කොට්ඨාසය සිවිල් හා දේශපාලන අයිතිවාසිකම් පිළිබඳ ජාත්‍යන්තර පනත (ICCPR) යටතේ අත්අඩංගුවට ගත් නාමල් කුමාර නමැත්තා කොළඹ කොටුව අධිකරණයට ඉදිරිපත් කිරීමෙන් අනතුරුව ලබන 15 දක්වා රිමාන්ඩ් බන්ධනාගාරගත කර තිබේ.
නාමල් කුමාර නමැත්තා අයි.සී.සී.පී.ආර්. පනත යටතේ ඊයේ ( 1) කොළඹ අපරාධ විමර්ශන කොට්ඨාසය අත්අඩංගුවට ගෙන තිබුණි.
එම කොට්ඨාසයට ප්‍රකාශයක් ලබා දීමට පැමිණි අවස්ථාවේදී නාමල් කුමාර මෙලෙස අත්අඩංගුවට ගත් බව පොලිස් මාධ්‍ය ප්‍රකාශක බුද්ධික මනතුංග පවසා ඇත.
කොළඹ අගරදගුරු මැල්කම් කාදිනල් රංජිත් හිමිපාණන් පිළිබඳව අපහාසාත්මක ප්‍රකාශ නිකුත් කිරීම සහ පාස්කු ප්‍රහාරය පිළිබඳව වැරැදි සහගත තොරතුරු සමාජගත කිරීම යන චෝදනා යටතේ සැකකරු අත්අඩංගුවට ගෙන ඇති බව මාධ්‍ය ප්‍රකාශකවරයා සඳහන් කර තිබේ.
නත්තල් දිනට පෙර දින මොහු සමාජ මාධ්‍යයට නිකුත් කළ ප්‍රකාශ ගැන ජාතික කතෝලික ජන සන්නිවේදන අධ්‍යක්‍ෂ ජූඩ් ක්‍රිෂාන්ත ප්‍රනාන්දු පියතුමන් පැමිණිලි කර තිබූ බව මනතුංග පවසයි.
ආගමික, වාර්ගික සහ ජන සමාජයක ගැටුමක්, වෛරයක් ඇති වන ආකාරයේ ප්‍රකාශ නිකුත් කිරීම නිසාවෙන් 2007 අංක 56 දරන සිවිල් හා දේශපාලන අයිතිවාසිකම් පිළිබඳ ජාත්‍යන්තර පනත (ICCPR) යටතේ අත්අඩංගුවට ගැනීම සිදුකර ඇති බව බුද්ධික මනතුංග වැඩිදුරටත් සඳහන් කර තිබේ.
