අපි එන්නේ ඡන්ද කඩන්න නෙමෙයි, සිස්ටම් එක කඩන්න – නීතිඥ නුවන් බෝපගේ

තමන් ඉදිරිපත් වෙන්නේ සිස්ටම් එක කැඩීමට බවත් ඡන්ද කැඩීමට නොවන බවත් නීතිඥ නුවන් බෝපගේ පවසයි.

නීතිඥ නුවන් බෝපගේ ජන අරගල සන්ධානයේ ජනාධිපති අපේක්ෂක ලෙස එළඹෙන ජනාධිපතිවරණයට ඉදිරිපත් වන බව එම සන්ධානය අද (29)නිවේදනය කරන ලදී. එහිදී මාධ්‍යවේදියෙකු නැගූ ප්‍රශ්නයකට පිළිතුරු දෙමින් ඔහු පැවසුවේ ජන අරගල සන්ධානය ලෙස මැතිවරණයට ඉදිරිපත් වන්නේ සිස්ටම් එක කැඩීමට මිස කාගෙවත් ඡන්ද කැඩීමට නොවන බවත්ය.

ඔහු වැඩිදුරටත් පැවසුවේ,

”කවුරුහරි එහෙම දෙයක් මතු කරනවානම් ඒ කියන්නේ රනිල් වික්‍රමසිංහට විරුද්ධව වෙන කිසිම දේශපාලන පක්ෂයකට ඉදිරිපත් වෙන්න බැහැ.හැම කෙනෙක්ම එහෙනම් ඡන්ද කඩන අය. අපි ඉදිරිපත් කරන්නේ වැඩපිළිවෙලක්. අපේ වැඩපිළිවෙල කිසිදු දේශපාලන ව්‍යාපාරයක් කිසිදු දේශපාලන පක්ෂයක් ඉදිරිපත් නොකරන වැඩපිළිවෙලක්. අපි පෙනී සිටින්නේ ඒ වැඩපිළිවෙල වෙනුවෙන්. ඒ වැඩපිළිවෙල කිසිදු දේශපාලන පක්ෂයක් ඉදිරිපත් නොකරන තාක් කල් අපිට පරම අයිතියක් තියෙනවා ඒ වැඩපිළිවෙල වෙනුවෙන් අරගල කරන්න, පෙනී ඉන්න.”