ලක්ෂ්මී අබයසේකර මගේ දයාබර මිතුරියගේ “නියඟය පවා දියවෙයි වැහි වලාකුළේ ” කාව්‍ය සංග්‍රහය මා අතට ලැබී, එය රසවිඳ බොහෝ දිනක් ගත වුවද ඒ ගැන වචනයක් ලිවීමට පමා වීම ගැන පළමුව ඇයගෙන් සමාව අයදිමි.
ඇත්තෙන්ම කවි පොත කියවා අවසන් කරන්නට ගත වූයේ කෙටි කාලයකි. එහි කෙටි කවි ගණනින් හැට දෙකකි. එහෙත් ඒ කවි කෙටි වූ නමුත් එහි ඇති ගැඹුර නැවත නැවතත් කිමිදෙන්නට හැකි තරම්ය.
” පරව යන බව
දැන දැනම
ඔබේ උයනෙත්
මල් පිපෙන්නට
ඉඩ දෙන්න “
මේ මගේ ඇස මෙන්ම හිත නතර වූ පළමු කවියයි.
ඇවිත් යන ශීත සෘතුව
ඇවිත් යන්නට යළි ඇවිත්..
මල් හිඳුන පත් ලිහුන
තුරු ලතා දුක්බරය
රාත්‍රිය දිග වැඩිය
මහ දවාලෙහි පවා
ඉර වුනත් නිදිබරය
වසන්තය එන්න නම්
ශීත සෘතුව ඇවිත්
දුක කියා යා යුතුය
මේ කාව්‍ය සංග්‍රහයේ හය වන කවියයි..ලක්ෂ්මී ගේ කවි වල බොහෝ විට ඇත්තේ පරිසරය හා බැඳුනු අපූරු සිතුවමකි.
එය,අපේ රටට නුහුරු වන්නට හැකි නමුත් එයින් ව්‍යංගයෙන් කියවෙන අපේ ජීවිත කතාව කිසිදු වෙනසක් නොමැතිව ලොව ඕනෑම තැනක ඉඳ අපට ගලපා ගත හැකි බව මගේ අදහසයි. කෙටි වචන කිහිපයකට මෙතරම් දෙයක් කල හැකි දැයි මම තවමත් සිතමි. ලක්ෂ්මී ගේ කවියක් දෑස් වසාගෙන මනසින් විඳිය යුතුය..ඒ වර්ණ ..ඒ කුඩා කුඩා වචන වලින් ඇය මවනා අපූරු සිතුවම් අප දෑස් ඉදිරියේ මැවෙනවා නොඅනුමානය.
දොලොස් වන කවිය මගේ සිතෙහි මැවුනේ ආදරය දුරස් වී ගිය විවාහ දිවියේ නේක හැල හැප්පීම් මැද අතරමං වූ ගැහැනියකගේ කතාවකි. ඇතැම්විට මා දුටු අරුත ලක්ෂ්මී අදහස් කල දෙයින් වෙනස්විය හැක.
නූතන දඩයක්කාරයා ( දහසය වන කවිය) එයද මා සිත් ගත් නිර්මාණයකි. නූතනයේ ගැහැනුන් ගොදුරු වන එක් අනතුරක සේයාව ඇය නිර්මාණශීලී අයුරින් පෙන්වා ඇත.
ඒ හිතම
මල් උයනක්
උයන්පල්ලා
නිසි ලෙස
රැක බලා ගත්
නොරිද්දා මල් පෙති
නො ඉල්ලා මල් ඉති
රැගෙන යා හැකිය ඔබටත්
සුවඳ නම් ඇති තරම්
( දහනව වැනි කවිය)
ගමන් මග අතරමග
අතරමං විය යුතුමය
ජීවිතය හරි හැටි
දකින්නට..
( පනස් වැනි කවියෙන්)
ලක්ෂ්මී..සටහන් කරනවා නම් මගේ ඇසත් හිතත් නතර වූ ඔබේ කවි පොතේ මෙවැනි අපූරු කවි බොහෝය. කියවා අවසන් යැයි නොකියා නැවත නැවතත් කිමිදෙමින් රස විඳිය හැකි කාව්‍ය සංග්‍රහයක් අප වෙත දායාද කල ඔබට මගේ හිත පුරාම සුබ පැතුම් සමගින් ස්තුතිය පිරි නමමි.
ඔබ කියා ඇති දේ ඇත්තය..නියඟය පවා වැහි වලාකුළකින් දිය කල හැකිය. නැවතත් මෙවන් කවි වලට පන පොවන්නට ඔබට ශක්තියත් ධෛර්යයත් පතමි..
