මල් මල් සාරි ඇඳ
නටුවෙ විස කටු හැංගූ ගැහැනු
ඉරි ඉරි සාරි ඇඳ
කොටු ගැහුනු ජීවිත වහගත්ත ගැහැනු
සේද සිනිඳු සාරි ඇඳ
හිතේ ගල් බොරළු මැඩගත්ත ගැහැනු
යාර හය මැද
යාය පුරා පීදෙන හැඟුම්
හංගගත් බවලත් මනුසත්තු…..
ශිපෝන් සාරි නියඟින් අතගා
නයිලෝන් සාරිවල හිරවෙච්ච ගැහැනු
බිනරමල් පිච්චමල් බතික් සාරි ඇඳ
පතොක් මල් ගොඩේ සුව විඳින ගැහැනු
කලුම කලු සාරි ඇඳ
විචිත්‍ර වරණ හැට්ටවලින් කලු වහන ගැහැනු
යාර හය මැද
යාය පුරා පීදෙන හැඟුම්
හංගගත් බවලත් මනුසත්තු……
පොට කඩා ළැම වසා
ළය සුසුම් තෙරපාගත් ගැහැනු
නෙරි තියා ඉන හඳා
නෙරූ කුස් හංගා හිත් හදාගත් ගැහැනු
රැළි තියා හැඩ හදා
පොඩිවෙච්ච තැන්වසා හිනාවුනු ගැහැනු
යාර හය මැද
යාය පුරා පීදෙන හැඟුම්
හංගගත් බවලත් මනුසත්තු……..
