කවුරු හරි කියනවද
අති ගැඹුරු කාල අන්ධකාරය
මැන බලන විදියක්
තියෙනවද සුදු ඇන්ඳ මිනුම් ඒකකයක්
කවුරු හරි කියනවද
බියකරු නිහඬතාවය
බර බලන විදියක්
තිබේද ඒ වෙනුවෙන්ම තරාදියක්
කවුරුහරි කියනවද
මරණීය තනිවීම
ඩෙසිබල් වලින් මනින විදියක්
තිබේද ඩිජිටල් යන්ත්‍රයක්
කවුරු හරි කියනවද
උණුසුම් ම කඳුළක
උණ බලන විදියක්
තිබේද ඔබ ලඟ එවැනි උෂ්ණත්ව මාපකයක්
කවුරු හරි කියනවද
දිග සුසුම් රැල්ලක
වේගය මනින විදියක්
අලුතෙන් සොයා ගත්තද
හුරුබුහුටි වේග මාපකයක්
කවුරු හරි කියනවද
අපි ගැන සිතන විදියක්
නිසොල්ලාසය තරම් දිග නැති
සුනරුත් අරුත් නොසොයන
කෝෂාර්ථ අවැසි නැති
කෙටිම කෙටි සිතීමක්.
