රට තුළ විනිමය අනුපාතය ඉහළ යනු ඇතැයි සිතමින් ව්‍යාපාරිකයන් වෙනත් රටවල් වල හැංගු ඩොලර් මිලියන 500ක් වෙළඳපොල වෙත මුදාහැරිමට හැකි වු මහ බැංකු අධිපති නන්දලාල් වීරසිංහ පවසා ඇත.
මාර්තු 13 වන දින කොළඹ පැවැති සම්මන්ත්‍රණයකදී මහ බැංකු අධිපතිවරයා මේ බව පවසා ඇත.
රුපියල 203 ට ස්ථාවරව තිබියදී අඩු මුදලට ඩොලර් රැගෙන සඟවා තබාගැනීමේ කළු කඩ ද ක්‍රියාත්මකව පැවැති බවත් කාපට් යට, මෙට්ට යට ඇතැමුන් ඩොලර් සැඟවූ බවත් එම වෙළෙඳපොළ පරිවර්තනය කළුකඩ මාෆියාව යටතේ ක්‍රියාත්මක වූ බවත් මහ බැංකු අධිපතිවරයා පවසා ඇත.
මෙරට ආර්ථික අර්බුදයට හේතු වූ කරුණා බොහෝ ඇති බවත්, එයට ප්‍රධානම හේතූන් වූයේ මූල්‍ය අසමතුලිතතාව, රාජ්‍ය ආදායමට වඩා වියදම් කිරීම, විශාල අයවැය පරතරය සහ එය පියවීමට ණය ගැනීම බවත් මහ බැංකු අධිපතිවරයා පවසා ඇත.
මහ බැංකු අධිපතිවරයා අපනයන සමාගම්වලින් පිටරට සඟවා ඇති ඩොලර් ප්‍රමාණය ගැන විවිධ තැන්වල කියමින් යනවා මිස ඒ වෙනුවෙන් ගතහැකි පියවරක් යෝජනා කරන්නේ නැත. එසේම ඔහු කතා කරන්නේද ජනතාවට සහන දීම රජයට බරක් වී ඇති බව මිස ආණ්ඩුව විසින් ජනතාවගේ බදු මුදල් කාබාසිනියා කිරීම ගැන නොවේ.
තවද ලංකාවේ ආර්ථික විශ්ලේශකයන්, වෘත්තිය සමිති, සිවිල් සංවිධාන රාශියක් පසුගිය මාස කිහිපය තුළ පැවසූවේ ලංකාවේ ඇතැම් ව්‍යාපාරිකයන් විවිධ ක්‍රම හරහා ඩොලර් වෙනත් රටවල රඳවා තබාගෙන සිටින බවය.
එම හඬ නැගීම්වල ප්‍රතිපලයක් ලෙස ආණ්ඩුවට මෙම කරණය සත්‍ය බව පිළිගන්නට සිදුවිය. විජේදාස රාජපක්ෂ පාර්ලිමේන්තුවේදී පැවසුවේ මෙම අගය ඩොලර් බිලියන 52ක් පමණ බවයි. එසේම රජයේ මාධ්‍ය ප්‍රකාශක බන්දුල ගුණවර්ධන පැවසුවේ එවැනි මුදලක් අපනයන සමාගම් විසින් පිටරට සඟවා ඇති නමුත් ඒවා ගෙන්වා ගැනීමට නීති නොමැති බවයි.
