ලංකාව මුහුණ දෙමින් සිටින ආර්ථික අර්බුදය හමුවේ විශාල පිරිසක් රැකියා සඳහා වෙනත් රටවල් වෙත සංක්‍රමණය වෙමින් සිටියි. මෙහිදී නීතිවිරෝධීව මුහුදු මාර්ගයෙන් විදෙස් ගත වීමට උත්සාහ දරණ පුද්ගලයන් සංඛ්‍යාව ද දිනෙන් දින ඉහළ යමින් පවතියි. පසුගිය මාස කිහිපය තුළ එවැනි සිදුවීම් කිහිපයක්ම වාර්තා විය.
එලෙස මුහුදු මාර්ගයෙන් කැනඩාව බලා යාමට උත්සහා කළ පුද්ගලයින් 303 දෙනෙකු පසුගිය 07 වැනිදා සිංගප්පූරු නාවික හමුදාවේ සහාය ඇතිව ජපානයට අයත් ‘හේලියෝස් ලීඩර්’ නෞකාව ආධාරයෙන් බේරා ගනු ලැබිණි.
සිංගප්පූරු සහ වියට්නාම මුහුදු සීමාවේ දී මෙම පිරිස මුදාගෙන ඇත.
මෙම පිරිස පසුගිය 08 වැනිදා වියට්නාමයේ වුන්ග් ටෝ වරායට රැගෙන ආ ලැබූ බවත්, එහි ඇති කඳවුරක නවාතැන් ගැනීමට අවස්ථාව සලසා දී ඇති බවත් වාර්තා වේ.
බීබීසී සේවය වාර්තා කරන පරිදි උතුරු සහ නැගෙනහිර පළාතේ පදිංචිකරුවන් වැඩි පිරිසක් අදාළ යාත්‍රවේ ගමන් කළ බව එහි සිටින පුදගලයෙකුගේ සහෝදරයකු පවසා ඇත.
මෙම නෞකාවේ ගමන් ගත් පිරිස් තම දේපළ පවා විකුණා දමා නැවත ලංකාවට පැමිණීමේ අදහස අතහැර දමා කැනඩාව බලා පිටත් ව ගොස් තිබේ.
කැනඩාව බලා පිටත්ව යාමට සූදානම් ව සිටි එක් පුද්ගලයෙකුගෙන් අමෙරිකානු ඩොලර් 5000 අය කර තිබේ.
මියන්මාරයේ සිටි මෙම පිරිස පසුගිය ඔක්තෝබර් මස 10 වැනිදා කැනඩාව බලා සිය ගමන් ආරම්භ කළ මෙම යාත්‍රාව දින 28ක අසීරු මුහුදු ගමනක නිරත වූ අතර එහි දී මෙම යාත්‍රාවේ සිදුරක් නිර්මාණය වී ඇති බවත් ඒ හරහා යාත්‍රාව තුළට ජලය කාන්දු වන බවත් දැනගන්නට ලැබී තිබේ.
එය ගිලීමේ තර්ජනයට මුහුණ දී ඇති බවට වන තොරතුරු යාත්‍රාවේ සිටි සරණාගතයින් සමුද්‍රීය නිලධාරීන්ට දැනුම්වත් කිරීමෙන් අනතුරුව ඔවුන් මුදාගැනීමට කටයුතු යොදා ඇත.
එසේම මෙළෙස බේරාගන්නා ලද පිරිස් නැවත ලංකාවට පැමිණීම ප්‍රතික්ෂේප කර තිබෙන බව බිබීසී සේවය වාර්තා කර තිබේ. එයට හේතුව ඔවුන් තමන් සන්තක සියල්ල විකුණා දමා විදෙස් ගතවීමට උත්සාහ කිරීම පමණක් නොවේ. මේ පිරිසෙන බහුතරය දමිළ ජාතිකයන් නිසා ඔවුන් මෙරටට ගෙන ඒමෙන් පසු අත්අඩංගුවට ගෙන ව්‍යාජ චෝදනා එල්ල කර සිරගතකරනු ඇති බවට පවතින බිය හේතුවෙනි.
මේ අතර වියට්නාම බලධාරීන් සහ වියට්නාමයේ ශ්‍රී ලංකා තානාපති කාර්යාලය සමඟ සම්බන්ධීකරණයෙන් යුතුව සංක්‍රමණය සඳහා වූ ජාත්‍යන්තර සංවිධාන විසින් සිදු කරනු ලබන මගීන් පරීක්ෂා කිරීම කටයුතු අවසන් වූ වහාම ඔවුන් ගෙන්වා ගැනීමට කටයුතු කරන බව විදේශ කටයුතු අමාත්‍යංශය නිවේදනය කර ඇත.
