පසුගිය වසර 05ක කාලය තුළ පොලීසියට එරෙහිව පොලිස් කොමිසම වෙත මහජන පැමිණිලි 9295ක් ලැබී ඇති බව වාර්තා වේ. මෙම පැමිණිලි ලැබී ඇත්තේ නීති විරෝධී අත්අඩංගුවට ගැනීම්, ව්‍යාජ චෝදනා එල්ල කිරීම්, පහරදීම්, වධ බන්ධනයට ලක් කිරීම්, පක්ෂපාති ලෙස ක්‍රියාකිරීමේ සිදුවීම්, බලය අයුතු ලෙස පාවිච්චි කිරීමේ සිදුවීම් සහ රාජකාරි නිසිපරිදි ඉටු නොකිරීමේ සිදුවීම් යන ආදිය සම්බන්ධයෙනි.
මේ සම්බන්ධයෙන් අනාවරණයක් සිදුකරන ඩේලි මිරර් පුවත්පත පවසන්නේ දිනකදී ලංකාවේ මහා මාර්ගවල සිදුවන සිදුවීම් දෙස බැලීමේදී පොලිසිය විසින් සිදුකරන විෂමාචාර ක්‍රියා ලැබී ඇති පැමිණිලි ප්‍රමාණයට වඩා වැඩිවිය යුතු බවයි.
කෙසේ වෙතත්, පුරවැසියන්ට කෲර සැළකීම ඇතුළු විෂමාචාර සම්බන්ධයෙන් නිලධාරීන්ට නඩු පවරනු ලබන්නේ කලාතුරකින් බවත් සුළු වශයෙන් වැරදිකරුවන් වන නිලධාරීන්ට සුළු විනයානුකූල පියවර හෝ අනතුරු ඇඟවීම් ලබා දෙනු ලබන බව මෙම පුවත් වාර්තාව පෙන්වා දෙයි. පොලිස් නිලධාරීන් තමන් සිදුකරන විෂමාචාර ක්‍රියා සම්බන්ධයෙන් වගකීමට සිදුවෙනු ඇති බව විශ්වාස නොකරන බව ද එම වාර්තාව පවසයි.
2015 ඔක්තෝම්බර් මාසයේදී 19 වන ආණ්ඩුක්‍රම ව්‍යවස්ථා සංශෝධනය යටතේ ජාතික පොලිස් කොමිෂන් සභාව පිහිටුවන ලද්දේ පොලීසියේ නීති විරෝධී ක්‍රියාවන්ගෙන් සහ/හෝ අකාර්යක්ෂමතාවයෙන් මහජනතාව ආරක්ෂා කිරීමේ අරමුණ පෙරදැරිවයි. ඒ වෙනුවෙන් වාර්ෂිකව වැඩි වැඩියෙන් මහජන මුදල් වැය කෙරේ. නමුත් පොලිස් කොමිසම පිහිටුවීමේ අරමුණ කොතරම් දුරට ඉටුවී ඇද්ද යන කාරණය ප්‍රශ්නයක් බව ඩේලි මිරර් පුවත්පත වැඩිදුරටත් පවසයි.
