උසස් පෙළ උත්තර පත්‍ර ඇගයීම සඳහා සම්බන්ධ වී සිටින ගුරුවරුන්ට කිසිදු සෞඛ්‍යාරක්ෂිත පහසුකමක් නොමැති බවත් ඔවුන් දැඩි අවදානමකට මුහුණ දෙමින් සිටින බවත් ඒකාබද්ධ ගුරුසේවා සංගමයේ ලේකම් සංජිව බණ්ඩාර පවසයි. වසංගතයේ දැඩි අවදානමක් පවතින කොළඹ දිස්ත්‍රික්කය තුළ ඇති මෙම ඇගයීම් මධ්‍යස්ථානවල අවම පහසුකමවත් නොමැති බව ඔහු පවසයි.
” මේ ඇගයීම් මධ්‍යස්ථානවල විෂබීජහරණයක් කරන්නෙ නැහැ. සැනිටයිසර් නැහැ. ගුරුවරුන්ට නතර වෙන්න වෙලා තියෙන්නෙ පාසල්වල පන්ති කාමරවල. ගුරුවරු ඒ ප්‍රශ්නේ කතා කරාම අධ්‍යාපන අමාත්‍යංශයෙන් කියන්නෙ දින කිහිපයකින් එනවා ආවම ප්‍රශ්නේ කතා කරමු කියලා. එතකොට වෛරස් එක එන්නෙ අමාත්‍යංශයෙන් ආවට පස්සෙද? විභාග පැවැත්තුවේ දරුවන්ගේ ගුරුවරුන්ගේ ජීවිත නොතකා. දැන් ගුරුවරුන්ගේ ජීවිතත් බරපතල අනතුරකට ඇදලා දාලා. ලැබෙන සොච්චම් වැටුපෙන් මාස්ක්වලට, සැනිටයිසර්වලට වියදම් කරගෙන පෞද්ගලික ප්‍රවාහන ක්‍රම හදාගෙන මේක කරන්න පුළුවන් කමක් නැහැ. ගුරුවරු ජිවත්වෙන්නත් අමාරුවෙන්. “
