සඳ හැරමිටිය ඇන ඇන
ගාටයි අහස මුඳුනට තව
තරුණ තරු පොකුරු මැද
කියයි හන්දි වේදනා ගැන
සුරඟන කතා කියූ මුව
බණ පදයකට සැරසෙත
එ දවස මුව අයාගෙන
සුරඟන කතා ඇසූ තරු
මෙදවස බණ පදයකට
මුව බිමට හරවත
මෙගා ටෙලි විකසිත
පැය ගණන් ගතවෙත
කොමල පෙම් දෙබසින්
සාලය ම පිරවෙත
සඳ ඔහේ මුල්ලක
රිදෙන තැන් අතගගා
තෙල් බෙහෙත් ගල්වත
හර්මයිනි සින්ඩරෙල්ලා
පුංචිමවුන්ගෙ තොල් අග
හාවගෙ ඉබ්බගෙ තරඟය
ගැන කිව්වම හිනාවෙත
මේ ගැන බෝ හිත හිත
සඳ අහසින් බැස යත
සඳ හැරමිටිය ඇන ඇන
ගාටයි අහස මුඳුනට තව
