වායු ගෙඩියක් විසුල ගෙල වටට
නයිලෝන් කඹෙන් පළන්දා අභරණ
පෙරා කඳුළැලි මල මුත්‍ර දෙපා යට
ඉනාමළුවට වඩා කොල පාටයි
අපි දැකපු රතුපාට හබරණ

ගැට ගැට පිපී කුද්දෙටි සැදී
බාන්වැල්වලත් දාඩිය කැටී
කටු වට එතී ඇතිල්ලී හිඳී
මොර කැකුළුවල එහෙමයි හැටී

දැදුරු රතඳර ඉරාගෙන ලේ විදා
උගුරු දඬුවද කැඩුනෙ ජර බර ගගා
ඒ හඳට වැටකොළු මලෙන්
මැහුමක් දමා
නිල් තරු නිදන්නෙම
ඇහැක කඳුලක තමා

බෙල්ලට වඩා රිදෙන්ඩැති වකුගඩුව
පෙරහන්කඩක් නොදුන්නත් ආණ්ඩුව
හඳුනා නොගත් රෝග කාරක
ස්තුතිම වේවා
රතන සාදුට

ණය ගෙවා නොහුන බව ඇත්තයි
වම දකුණ දෙකම දැන් තිත්තයි
කෙමිකල් වසංගත සයනයේ
කොට්ටෙ විටමින් හීන පෙත්තයි

කොහොම බඩගෑවාද සමන්වැල්
හිනාවී බඹ තුනක් කුඹුකට
හිස් බඩක තනි රකින්නේ
කුඩා බඩවැල් තමයි ඉඳහිට

මේ තරම් සියුමැලිද
බ්‍රෝමන් ප්‍රාවරය
තොල් සිනිඳු කියන්නේ
ගොඩක් කවියන් බොරුවට