Tag: food price

  • පුද්ගලයෙකුට මූලික අවශ්‍යතා සපුරා ගැනීමට අවශ්‍ය මුදල පසුගිය වසර හා සමානයි

    පුද්ගලයෙකුට මූලික අවශ්‍යතා සපුරා ගැනීමට අවශ්‍ය මුදල පසුගිය වසර හා සමානයි

    නිල දරිද්‍රතා රේඛා සටහනෙහි පෙබරවාරි මාසය සඳහා වන දත්ත ජනලේඛන හා සංඛ්‍යාලේඛන දෙපාර්තමේන්තුව විසින් ප්‍රකාශයට පත්කර තිබෙන අතර ඒ හරහා පැහැදිලිවන්නේ ජනතාව මත පැටවී ඇති ජීවන වියදම වෙනස්කමකට ලක්ව නොමැති බවයි.

    2025 පෙබරවාරි මාසය වෙනුවෙන් නිකුත් කර ඇති මෙම නවතම සටහන අනුව පුද්ගලයෙකු හට සිය මූලික අවශ්‍යතා සපුරා ගැනීම සඳහා මාසයක​ට අවශ්‍ය කෙරෙන අවම මුදල රු. 16,318 ක් ලෙස සඳහන් වේ. ඒ අනුව 4 දෙනෙකුගෙන් යුතු පවුලක් සඳහා මාසයක් වෙනුවෙන් සිය මූලික අවශ්‍යතා සපුරා ගැනීමට අවශ්‍ය අවම මුදල රු. 65,272 ක් ලෙසින් ගණනය කළ හැකිය.

    දිස්ත්‍රික්ක වශයෙන් සිය මූලික අවශ්‍යතා සපුරා ගැනීම වෙනුවෙන් දැරිය යුතු වැඩිම මුදල කොළඹ දිස්ත්‍රික්කයෙන් වාර්තා වන අතර එම මුදල රු. 17,599 කි.

    එමෙන්ම එම දෙපාර්තමේන්තුව සඳහන් කරන්නේ, එහි අඩුම අගය මොණරාගල දිස්ත්‍රික්කයෙන් වාර්තා වන අතර එම අගය රු. 15,603 ක් ලෙසයි.

    2025 පෙබරවාරි මාසයේදී වාර්තා වූ ජාතික පාරිභෝගික මිල දර්ශකයේ (NCPI) අගය පෙර මාසයට සාපේක්ෂව පහළ මට්ටමක පැවතීම මෙලෙස නිල දරිද්‍රතා රේඛාව පහළ යාමට හේතු වී ඇති බව ජනලේඛන හා සංඛ්‍යාලේඛන දෙපාර්තමේන්තුව වැඩිදුරටත් සඳහන් කර තිබේ.

    ජනලේඛන හා සංඛ්‍යාලේඛන දෙපාර්තමේන්තුව විසින්, 2024 දෙසැම්බර් මාසය සඳහා පුද්ගලයෙකු හට සිය මූලික අවශ්‍යතා සපුරා ගැනීම සඳහා මාසයක​ට අවශ්‍ය කෙරෙන අවම මුදල ලෙස සඳහන් කරන ලද්දේ රු. 16,017කි.

    ඊට පෙර මාසයේ එනම් 2024 නොවැම්බර් මාසයේ දී මෙම අගය රු. 16,017 ක් ලෙසින් වාර්තා වී තිබුණි. 2024 ඔක්තෝම්බර් මාසයේ එම අගය රු. 15,994 ක් විය.

    මේ අනුව පැහැදිලි වන්නේ පුද්ගලයෙකුට ජීවත්වීම සඳහා අවශ්‍ය කෙරෙන මුදලේ ප්‍රමාණය පසුගිය වසරේ සිට ළඟ ළඟ අගයන්වල පවතින බවයි. මෙහි සඳහන් වන්නේ මූලික අවශ්‍යතා සඳහා අවශ්‍ය ප්‍රමාණය පමණි. එසේම ඇත්ත වියදම මීට වඩා බොහෝ වැඩිවිය යුතුය. එසේම එක් පුද්ගලයෙකු සඳහා යන වියදම පවුලක් ලෙස ගණන් හැදීමේදී එන මුළු මුදල ගෙන බැලීමේදී එවැනි ආදායමක් ලැබෙන පිරිස ඉතා අඩු බව පැහැදිලිවේ.

    මෙම වියදම් වැඩිවීමට හේතුවී ඇත්තේ සැළකිය යුතු ප්‍රමාණයකින් භාණ්ඩ හා සේවා මිල පහළ යාමක් සිදු නොවීමයි.

  • බිත්තර මිල වැඩිවෙන්න හේතුව

    බිත්තර මිල වැඩිවෙන්න හේතුව

    බිත්තර මිල සම්පූර්ණයෙන්ම කුකුල් කෑම මත තීරණය වන බව ඉඩම්, කෘෂිකර්ම, පශු සම්පත්, වාරිමාර්ග සහ ධීවර හා ජලජ සම්පත් අමාත්‍යංශයේ ලේකම් එම්.පී.එන්.එම්.වික්‍රමසිංහ පවසනවා

    කුකුල් කෑම සඳහා යොදා ගන්නා බඩ ඉරිගු ලබන කන්යේ ආනයනයේදී රුපියල් 125 – 130 වැනි මුදලකට කිලෝවක් මිල දී ගත හැකි ක්‍රමවේදයක් සකස් කරන බව එම්.පී.එන්.එම්.වික්‍රමසිංහ සඳහන් කරනවා.

    වෙළඳපොළේ බිත්තර තොග මිල ඉහළ ගොස් තිබෙන අතර මේ සම්බන්ධයෙන් අදහස් දක්වමින් ලේකම්වරයා ප්‍රකාශ කළේ කුකුල් කෑම මිල ඉහළ යාම මේ සඳහා බලපා ඇති බවයි.

    මෙරට බඩ ඉරිගු අවශ්‍යතාවය මෙට්‍රික් ටොන් ලක්ෂ 06ක් වන අතර, නිෂ්පාදනය කරනු ලබන්නේ ලක්ෂ 03ක් පමණක් බව සඳහන්.

    ඒ හේතුවෙන් තවත් ලක්ෂ 03ක්ම ආනයනය කිරීමට සිදු වන අතර ඉදිරියේදී, මෙය සමතුලිත කර ස්ථාවර මිලක තබා ගැනීමට උත්සහ කරන බව ද ඔහු සඳහන් කළා.

  • රනිල්ට පුළුවන් – මන්දපෝෂණය වැඩිකරන්න

    රනිල්ට පුළුවන් – මන්දපෝෂණය වැඩිකරන්න

    උද්ධමනය දිගින් දිගටම අඩුවෙමින් පවතින බවට රජයේ මහ බැංකුව වාර්තා නිකුත් කරමින් තිබියදී රට තුළ මන්දපෝෂණ තත්ත්ව ඉහළ ගොස් ඇති බව දිනෙන් දින විවිධ වාර්තා නිකුත් වෙමින් පවතියි.

    පසුගිය 04වනදා මහ බැංකු අධිපතිවරයා පාර්ලිමේන්තුවට ගොස් ආර්ථික තත්ත්වය පැහැදිලි කරමින් පැවසුවේ උද්ධමනය 5% දක්වා අඩුවී ඇති බවයි. නමුත් එදිනම පාර්ලිමේන්තුව තුළ සිදුවූ විවාදයේදී රෝහිනී කවිරත්න මන්ත්‍රීවරිය පැවසුවේ අපේ රටේ දරුවන්ගෙන් තුනෙන් එකක් මන්දපෝෂණයෙන් පෙළෙන බව යුනිසෙෆ් වාර්තා කර ඇති බවයි.

    මේ අතර ළමා මන්දපෝෂණ තත්ත්වය පිළිබඳ සොයා බැලීමට පත්කළ පාර්ලිමේන්තු විශේෂ කාරක සභාවේ වාර්තාව පාර්ලිමේන්තුවට ඉදිරිපත් කර තිබෙනවා.

    මෙම වාර්තාව මගින් පෙන්වා දී ඇත්තේ ද අඩු බර, මිටිභාවය, කෘෂභාවය, සහ ක්‍ෂුද්‍ර පෝෂක ප්‍රමාණවත් නොවීම වැදගත් විටමින් සහ ඛනිජ ලවණවල ඌනතාව යන කරුණු හතර මගින් ළමා මන්දපෝෂණ තත්ත්වය ඇති වන බවයි.

    ග්‍රෑම් 2500 ක් හෝ ඊට අඩු උපත් බරක් සහිතව උපදින දරුවන් අඩු උපත් බරක් ඇති දරුවන් ලෙස සැලකෙන අතර 2022 දී සිදු කරන ලද ජාතික පෝෂණ හා ක්ෂුද්‍ර පෝෂක සමීක්ෂණයට අනුව, ජාතික වශයෙන් නියෝජනය වන නියැදියක් මගින් අඩු උපත් බර ව්‍යාප්තිය 15.9%ක අගයක පැවති බව මෙම වාර්තාවෙන් පෙන්වාදී තිබෙනවා.

    තවද සෑම දරුවන් හතර දෙනෙකුගෙන්ම එක් අයෙක් මධ්‍යස්ථ හෝ දැඩි ලෙස අඩු බර සහිත දරුවන් ලෙස හඳුනාගෙන ඇති බවත් මෙම වාර්තාවේ සඳහන්.

    2023 වසරේ ජුනි මාසයේදී කෘෂභාවයට ලක් වූ දරුවන්ගේ අනුපාතය 10% ක් ලෙස එහි දැක්වෙන අතර අවුරුදු 5 ට අඩු සියලුම දරුවන්ගෙන් 1.2% ක් දරුණු උග්‍ර මන්දපෝෂණයෙන් පීඩාවට පත්ව සිට ඇති බවත් සඳහන් වනවා.

    සංඛ්‍යාත්මකව ළමුන් 16,000 කට ආසන්න ප්‍රමාණයක් එලෙස උග්‍ර මන්ද පෝෂණ තත්ත්වයෙන් පිඩා විඳ ඇති බවත් එම වාර්තාවෙන් පෙන්වා දෙනවා.

    2023 පෝෂණ මාසයේ වාර්තාව මගින් වයස අවුරුදු පහට අඩු දරුවන් අතර මිටි බව 10.3% ක වර්ධනයක් පෙන්නුම් කර ඇති අතර එය පෙර වසරට වඩා 9.2% ක වැඩිවීමක් බවට අනාවරණය වී තිබෙනවා.

  • ඡන්දය වෙනුවෙන් භාණ්ඩ කිහිපයක මිල අඩු කරයි

    ඡන්දය වෙනුවෙන් භාණ්ඩ කිහිපයක මිල අඩු කරයි

    සතොස අත්‍යවශ්‍ය භාණ්ඩ කිහිපයක මිල පහළ දමා තිබේ.

    ඒ අනුව, පහත සඳහන් අත්‍යවශ්‍යය භාණ්ඩ වල මිල පහත දමන අතර, දිවයින පුරා ඇති සියලුම ලංකා සතොස අලෙවිසැල් මගින් මෙම භාණ්ඩ පාරිභෝගිකයින්ට අද (02) දින සිට ලබා ගැනීමට හැකියාව පවතින බව පැවසේ.

    මේ පිළිබඳ මත දක්වන බොහෝ පිරිසක් පවසන්නේ මේවා මැතිවරණය වෙනුවෙන් දියත් කරන ප්‍රචාරක ව්‍යාපෘති බවයි. සෑම භාණ්ඩයකම සහ සේවාවකම යාමට බලපානු ලැබුවේ වැට් බදු ඉහළ යාමයි. බදු අඩුකිරිමකින් තොරව සොච්චම් මුදලකින් භාණ්ඩ කිහිපයක මිල අඩු කිරීමෙන් ප්‍රශ්නය විසදිය නොහැකි බව මත දක්වන්නන්ගේ අදහසයි.

  • බඩු මිල අඩුකරන්න බැරි ආණ්ඩුව මිල පරාසයක් අරගෙන එයි

    බඩු මිල අඩුකරන්න බැරි ආණ්ඩුව මිල පරාසයක් අරගෙන එයි

    අත්‍යවශ්‍ය භාණ්ඩ වර්ග 18ක් සඳහා ඇස්තමේන්තු මිල පරාසයක් නිකුත් කර තිබේ.

    මහජනතාව සහ වෙළෙඳ ප්‍රජාව දැනුවත් කිරිම සඳහා මෙම සතිය වෙනුවෙන් මෙම මිල පරාසය නිකුත් කළ බව පාරිභෝගික කටයුතු පිළිබඳ අධිකාරියේ සභාපති ටී.අයි. උඩුවර පැවසීය.

    තිරිඟු පිටි, සුදු සීනි, පරිප්පු, අර්තාපල්, ලොකු ලූණු, රතු ලූණු, වියළි හාල්මැස්සන්, වියළි මිරිස්, බිත්තර, ටින් මාළු, කැකුළු සහල්, නාඩු සහල් සහ කුකුල් මස් සඳහා මෙසේ මිල පරාසයක් නිකුත් කළ බව ද සභාාපතිවරයා කීය.

    මෙම මිල පරාසය පාරිභෝගික මහජනතාව දැනුවත් කිරිම සඳහා ප්‍රකාශයට පත්කරනු ලබන අතර මින් වෙළෙඳපොළ තුළ තරඟකාරිත්වය තුලින් පාරිභෝගික මහජනතාව වෙත සාධාරණ මිලකට භාණ්ඩ මිලදී ගැනීමට අවස්ථාව සැලසීම බලාපොරොත්තු වන බවත් එම අධිකාරියේ සභාපතිවරයා වැඩිදුරටත් සඳහන් කර ඇත.

    සාමාන්‍ය තත්ත්වය වන්නේ පාලන මිලක් දමා තිබියදී වුවද මිල පාලනය කිරීමට රජය අපොහොසත් වීමයි. මෙවැනි මිල පරාසයන් දැමීම හරහා කිසිදු ආකාරයකින් භාණ්ඩ මිල අඩු නොවන අතර ජනතාවට කිසිදු වාසියක් නොලැබෙනු ඇත.

  • සහල් මිල වැඩිකිරීම ගැන උතුරේ කාන්තාවන්ගේ විරෝධය

    සහල් මිල වැඩිකිරීම ගැන උතුරේ කාන්තාවන්ගේ විරෝධය

    ශ්‍රී ලංකා රජයට වහාම සහල් මිල අඩු කරන ලෙස බලපෑම් කරමින් උතුරු නැගෙනහිර කාන්තා එකතුව විරෝධතා ආරම්භ කර තිබේ.

    කිලිනොච්චි, මන්නාරම ඇතුළු නගර කිහිපයක මෙලෙස විරෝධතා පවත්වා තිබේ. එම විරෝධතා සදහා හේතු සදහන් කරමින් උතුරු නැගෙනහිර කාන්තා එකතුව නිකුත් කළ නිවේදනය පහත දැක්වේ.

    ’සමස්ත ශ්‍රී ලාංකික ජනතාවගේ ප්‍රධාන ආහාරය බත් ය.

    මේ ආකාරයට අපේ ශ්‍රී ලාංකීය රටේ පවතින ආර්ථික අර්බුදයත්, භාණ්ඩ මිල ඉහළ යාමත් නිසා ගම් මට්ටමේ දිළිඳු හා මධ්‍යම පාන්තික පවුල්වල කාන්තාවන් හා දරුවන් අතර දැවැන්ත ආහාර හිඟයක් පමණක් නොව පෝෂණ ඌනතා ද ඇති වී තිබේ. බොහෝ දෙනෙකුට තම වෘත්තීය අවස්ථා අහිමි වී යයි. විශේෂයෙන්ම ශ්‍රී ලංකාවේ අතීතයේත් වර්තමානයේත් සහල් මිල ඉහළ යාම නිසා දෛනික වැටුප් ලබන පවුල්වලට සහ අමතර සාමාජිකයන් සිටින පවුල්වලට තුන්වේල වෙනුවට වේලක් දෙකක් පමණක් ලැබෙන තත්ත්වයට පත්ව ඇත. සමහර පවුල් බත් නැතුව කැඳ බොනවා. සහල් මිල ඉහළ යෑම නිසා කාන්තා මූලික නිවාස තවදුරටත් සාගතයට තල්ලු වී ඇත.

    රට තුළ පවතින යුද්ධය, කෝවිඩ් බලපෑම, ගංවතුර, සාගතය සහ වත්මන් ආර්ථික අර්බුදය පතුලේ ජීවත් වන දුප්පත් ජනතාවගේ ආහාර අවශ්‍යතා කෙරෙහි විශාල බලපෑමක් ඇති කර තිබේ. දරුවන්, ගැබිනි මව්වරුන්, කාන්තාවන් යන සියලු දෙනාම කුසගින්න නිවා ගැනීමට පෝෂ්‍යදායී නොවන ආහාර අනුභව කිරීමට සිදු වේ. මේ තත්ත්වය නිසා රටේ මන්දපෝෂණයෙන් පෙළෙන දරුවන් බිහිවෙනවා. ඔවුන් ද ආසාදනය වෙමින් පවතී. දරිද්‍රතා රේඛාවට පහළින් ජීවත් වන පවුල්වල දරුවන් දරිද්‍රතාවය නිසා ආහාර නොගෙන පාසල්වල නිදාගැනීම් පිළිබඳ ද වාර්තා වී ඇත. “වැඩිහිටියන්, රැකියා විරහිත පිරිමින්, දුප්පත් කාන්තාවන් සහ ළමයින් ආහාර සඳහා පාරට බසිනු ශ්‍රී ලංකාව පුරා දැකිය හැකිය.”
    එබැවින් ශ්‍රී ලංකා රජය ජනතාවගේ ඉල්ලීම සහ සාගින්නෙන් පෙළෙන භයානක තත්ත්වය සැලකිල්ලට ගෙන වහාම ශ්‍රී ලංකාවේ සහල් මිල රුපියල් සියයකට වඩා අඩු කළ යුතු බව අපි අවධාරණය කරමු. ජනතාවගේ දුප්පත්කම නැති කරලා ජනතාවට තුන්වේල බඩගින්නේ නැතුව බත් කන්න පුළුවන් විදියට පියවර ගන්න කියලා අපි ඉල්ලා සිටිනවා.
    ජනතාවගේ සහල්වලට අත නොතබා රුපියල් 100ට අඩු සහල් මිල අඩුකර ජනතාවගේ ආර්ථික බර අඩු කිරීමට ශ්‍රී ලංකා රජය වහා පියවර ගත යුතුය.

    උතුරු නැගෙනහිර කාන්තා එකමුතුව‘

  • ලංකාවේ දුප්පතුන් ලක්ෂ 57ක් වෙලා

    ලංකාවේ දුප්පතුන් ලක්ෂ 57ක් වෙලා

    ශ්‍රී ලංකාවේ පනස් හත් ලක්ෂ හැත්තෑ හත් දහසකට ආසන්න පිරිසක් දරිද්‍රතාවයෙන් පෙළෙන බව ලෝක බැංකුව විසින් නිකුත් කෙරුණු අලුත්ම වාර්තාවක සඳහන් වන්නේ යැයි පේරාදෙණිය විශ්ව විද්‍යාලයේ ආර්ථික විද්‍යා සහ සංඛ්‍යාන අධ්‍යයන අංශයේ මහාචාර්ය වසන්ත අතුකෝරල මහතා පැවසීය.

    මේ පිරිස දරිද්‍රතාවයට පත්ව ඇත්තේ ඉහළ ගිය උද්ධමනය, ජනතාවගේ ආදායම් වැඩි නොවීම, රැකියා අහිමිවීම සහ ආදායම් කඩා වැටීම යනාදී හේතූ නිසා බවද ලෝක බැංකුව සඳහන් කරන්නේ යැයි ඔහු සඳහන් කළේය.

    ලෝක බැංකුව පහළ මධ්‍යම ආදායම්ලාභී දරිද්‍රතා රේඛාව වන දිනක වියදම ඩොලර් 3.65 සීමාව සැලකිල්ලට ගෙන කළ අධ්‍යයනයකදී මෙම තොරතුරු අනාවරණය කරගෙන ඇත.

  • එළවළු මිල ඉහළ යාම – පාරිභෝගික ජනතාවට එළවළු කන්නත් නැහැ, ගොවීන්ට ලාභයකුත් නැහැ

    එළවළු මිල ඉහළ යාම – පාරිභෝගික ජනතාවට එළවළු කන්නත් නැහැ, ගොවීන්ට ලාභයකුත් නැහැ

    ඉතිහාසයේ ප්‍රථම වතාවට කැරට් කීලෝව රැපියල් 2000 දක්වා මිල ඉහළ නැග ඇති බව වාර්තා වේ.

    ඒ හා සමානව අනෙකුත් උඩරට එළවළු මිලගනන්ද ඉහළ ගොස් තිබුණි.

    එළවළු මිල ගනන් ඉතා ඉහළ යාමේ හේතුවෙන් ජනතාව විශාල පිරිසක් එළවළු මිලදි ගැනිමෙන් වැලකි සිටින බව වාර්තා වේ.

    ආර්ථික මධ්‍යස්ථානවල බෝංචි කිලෝවක තොග මිල රැපියල් 1,000.00 සිල්ලර මිල 1,400.00 ,අමුමිරිස් කිලෝවක තොග මිල රැපියල් 1,000.00 ක්ද එහි සිල්ලර මිල කිලෝව රැපියල් 1,300.00 ක් වශයෙන් ඉහළ ගොස් ඇති බවද වාර්තා වේ.

    මේ සම්බන්ධයෙන් වැඩි දුරටත් අදහස් දක්වමින් තඹුත්තේගම ආර්ථික මධ්‍යස්ථානයේ සභාපති සුනිල් සෙනෙවිරත්න මහතා මෙසේද පැවසිය.

    මේ පිළිබඳ අදහස් දක්වන ආර්ථික මධ්‍යස්ථාන වෙළඳුන් පවසන්නේ තම මධ්‍යස්ථාන වෙත ලැබෙන එළවලු තොග විශාල වශයෙන් අඩුවී ඇති බවයි.

    උඩරට එළවළු වගාවේ නිරත ගොවීන් පවසන්නේ එළවළු මිල වැඩි වුවද ගොවීන්ට එයින් සෙතක් නැති බවය. බීජ, පොහොර, තෙල් බෙහෙත්වලට අධික වියදමක් දැරීමට සිදු වී ඇති බවත්, එම වියදමට සාපේක්‍ෂව අස්වැන්නක් නොලැබෙන බවත් ගොවින් පවසයි. පසුගිය කාලය තුළ රට පුරා පැවැති අයහපත් කාලගුණ තත්ත්වය ද එළවළු අස්වැන්න අඩු වීමට ප්‍රබල සාධකයක් වී ඇති බව ද ඔවුන් පවසා තිබේ.

    මෙහිදී පෙනෙන්නට තිබෙන කාරණය වී ඇත්තේ අවසානයේ පාරිභෝගික ජනතාවට අඩුමිලට එළවලු ලබාගැනීමට අවස්ථාවක් හෝ ගොවීන්ට වැඩිවෙන එළවලු මිලෙන් හෝ වාසියක් නොලැබෙන බවයි.

  • අත්‍යවශ්‍ය භාණ්ඩ රැසක් ගිණි ගණන්

    අත්‍යවශ්‍ය භාණ්ඩ රැසක් ගිණි ගණන්

    වැට් බද්ද ඉහළ දැමීමත් සමඟ බොහෝ අත්‍යවශ්‍ය පාරිභෝගික භාණ්ඩවල මිල ඉහළ ගොස් ඇතැයි පාරිභෝගිකයෝ චෝදනා කරති.

    ඒ අනුව පරිප්පු, සීනි, අල, ලූණු, කරවල, ආනයනික තිරිඟු පිටි, ටින් මාළු සහ කිරී සම්බා සහ සම්බා සහල් මිල තව දුරටත් ඉහළ ගොස් ඇත.

    වැට් බද්ද ඉහළ දැමීමට පෙර රුපියල් 300 ක සිල්ලර මිලක පැවැති පරිප්පු කිලෝවක මිල මේ වන විට රුපියල් 350 ත් 400 ත් අතර මුදකට අළෙවි කරන බවත් රුපියල් 290 කක්ව පැවැති සුදු සීනි කිලෝවක මිල රුපියල් 325 ක් දක්වා ඉහළ ගොස් තිබේ.

    රුපියල් 260 ක සහ රුපියල් 230 ක උපරිම මිලක් නියමක කර ඇති කීරි සම්බා සහ සම්බා සහල් දැඩි හිඟයක් මේ වන විට වෙළෙඳපොලේ පවති බව කියන පාරිභෝගිකයෝ ඇතැම් වෙළෙඳසැල් තොග සඟවාගෙන කීරි සම්මා කිලෝවක් රුපියල් 300 කට අධික මිලකට සහ සම්බා කිලෝවක් රුපියල් 250 කට අධික මිලකට අළෙවි කරන බව ද සඳහන් වේ.

     

  • භාණ්ඩ හා සේවා රැසක මිල ඉහළ යමින් නව නවසර උදාවෙන්න සූදානම්

    භාණ්ඩ හා සේවා රැසක මිල ඉහළ යමින් නව නවසර උදාවෙන්න සූදානම්

    හෙට උදෑසන නව වසර උදාවෙන්නේ ජනතාව මත පටවා ඇති බර තවත් වැඩිකරමින් බව පෙනෙන්නට තිබේ. හෙට සිට භාණ්ඩ හා සේවා රැසකට අදාළව වැට් බදු වැඩිවීමත් සමඟ මිල ඉහළ දමන බව දැනටමත් නිවේදනය කර තිබේ.

    මෙම භාණ්ඩ හා සේවා බොහොමයක් ඍජුව වැට් බද්දට හසුවන ඒවා නොවුනද තෙල් සහ ගෑස් වැනි මූලික දේවල්වලට වැට් බද්ද අදාළ වීමත් සමඟ මේවා ඉහළ යන බව දක්නට ලැබේ. ඒ අනුව නව වසරේ මෙම පහත සඳහන් භාණ්ඩ හා සේවාවලට අමතර දේවල් රැසක මිල ඉහළ යනු ඇත.

    ජාතික ජල සම්පාදන හා ජලාපවහන මණ්ඩලය (NWSDB) අනාවරණය කළේ 2024 ජනවාරි සිට ජල ගාස්තු 3% කින් ඉහළ යනු ඇති බවයි.

    මෙම ගැලපීම ජනවාරි 1 වැනිදා ක්‍රියාත්මක කිරීමට නියමිත සංශෝධිත අගය එකතු කළ බද්ද (VAT) සමඟ සමපාත වේ.

    ලිට්‍රෝ ගෑස් මිල සූත්‍රයට අනුව ගෘහස්ථ ගෑස් මිල සංශෝධනය සෑම මසකම 4 වැනිදා මාධ්‍යම රාත්‍රීයට යෙදී තිබුණ ද මෙවර ගෑස් මිල සංශෝධනය හෙට (1) පෙරවරුවේ සිට ක්‍රියාත්මක කරනු ඇති බව ලිට්‍රෝ ගෑස් සමාගමේ උසස් නිලධාරියෙක් අද (31) පස්වරුවේ පැවසීය.
    වැට් බද්ද හෙට සිට ක්‍රියාත්මක වන බැවින් එම මිල සූත්‍රය අසමතුළිත වීම නිසා එම තීරණය ගැනීමට සිදුවන බව කී එම නිලධාරියා හෙට පෙරවරුවේ නව මිල ගණන් නිවේදනය කරනු ඇති බව ද සඳහන් කළේය.

    ජනවාරි 1 වැනිදා සිට මෙරට සියලුම දුරකථන ජාල සේවා ගාස්තු සහ මුදල් ගෙවා නරඹන රූපවාහිනී සේවා ගාස්තු සංශෝධනය කිරීමට රජය තීරණය කර තිබෙනවා.

    ඒ අනුව, සියලු ජංගම සහ ස්ථාවර දුරකථන, අන්තර්ජාල සබඳතා සහ රූපවාහිනී සේවා ගාස්තු 15% සිට 18% දක්වා වැඩි වන බවයි වාර්තා වන්නේ.

    ප්ලේන්ට්, කිරි තේ ඇතුළු කෙටි ආහාර ද්‍රව්‍ය කිහිපයක හෙට (01) සිට ක්‍රියාත්මක වන පරිදි මිල වැඩි කිරීමට සිදුවන බව සමස්ත ලංකා ආපනශාලා හා අවන්හල් හිමියන්ගේ සංගමය පවසනවා.

    ඒ අනුව ප්ලේන්ටියක මිල රුපියල් 5 කින්, කිරිතේ මිල රුපියල් 10 කින්, කෙටි ආහාර රුපියල් 10 කින් මිල වැඩි කර තිබෙනවා.

    සමස්ත ලංකා ආපන ශාලා හා අවහන්හල් හිමියන්ගේ සංගමය වැඩිදුරටත් සදහන් කළේ, එසේම ෆ්‍රයිඩ් රයිස් හා කොත්තු මිල රුපියල් 25 කින් ඉහළ දමා ඇති බවයි.

    ත්‍රිරෝද රථ ගාස්තු ජනවාරි 1 වැනිදා සිට ක්‍රියාත්මක වන පරිදි ඉහළ දමා තිබෙනවා.

    ඒ අනුව, 2 වන කිලෝමීටරය සඳහා අය කළ රුපියල් 80ක ගාස්තුව රුපියල් 100 දක්වා ඉහළ දමා ඇති බවයි ජාතික ඒකාබද්ධ ත්‍රිරෝද රථ රියදුරන්ගේ සහ කර්මාන්තකරුවන්ගේ සංගමය සඳහන් කළේ.

    මීට අමතරව බස් ගාස්තු සහ පාසල් වෑන් රථ ගාස්තුද ඉහළ යාමට නියමිතයි.