ගොවි ජනතාව ඉතා හොඳින් බලාගෙන ඔවුන්ට වඩා හොඳ ජීවිතයක්, සමාජ වටිනාකමක් සහ ගෞරවයක් හිමි කර දීම රජයේ අරමුණ බව ජනාධිපති අනුර කුමාර දිසානායක අද අනුරාධපුරයේදී පවසා තිබේ.
පොහොර සහනාධාරය දෙගුණයකින් ඉහළ නැංවීම, දිට්වා සුළි කුණාටුව හමුවේ විනාශ වූ වගා බිම් සඳහා ඉතිහාසයේ වැඩිම වන්දි මුදල් ලබා දීම, වී මිලදී ගැනීම සඳහා ඉතිහාසයේ වැඩිම මුදල් වෙන් කිරීම මෙන්ම මහා පරිමාණ වාරි ජල ව්යාපෘතිවල කටයුතු යළි ආරම්භ කරමින් වගා කටයුතු සඳහා අවශ්ය ජලය සැපයීමට පියවර ගැනීම ඇතුළු ගොවි ජනතාව වෙනුවෙන් සැලකිය යුතු වැඩ කොටසක් රජය ඉටු කරමින් තිබෙන බවද ජනාධිපතිවරයා පවසා ඇත.
ජනාධිපති අනුර කුමාර දිසානායක මේ බව සඳහන් කළේ අනුරාධපුර උතුර ජල සම්පාදන ව්යාපෘතියේ දෙවන අදියර ආරම්භ කිරීමේ අවස්ථාවට අද (10) එක් වෙමිනි.
වී මිලදී ගැනීම සඳහා ඉතිහාසයේ වැඩිම මුදල වෙන් කළ බව පැවසුවද තවමත් ආණ්ඩුව වී මිලදී ගැනීම ආරම්භ කර නැති බව ගොවීන් නගන චෝදනාවයි. එසේම ආණ්ඩුව සඳහන් කරන මිලට වී මිලදී නොගන්නා බවද ඔවුන් පවසයි. ඒ වෙනුවට ආණ්ඩුවේ ඇමතිවරුන් ගොවීන් හෑල්ලුවට ලක් කරමින් විවිධ තැන්වල කටමැත දොඩවනවා පමණක් දක්නට ලැබේ.
දැන් ගොවීන්ට අවශ්ය වන්නේ තවත් පොරොන්දු නොව වී මිලදී ගැනීමේ ප්රශ්නය විසදීම වෙනුවෙන් වූ වැඩපිළිවෙලකි.
