රුපියල් මිලියන 70ක මුදලක් අයථා ලෙස උපයා ගැනීම සම්බන්ධයෙන් පාර්ලිමේන්තු මන්ත්රී නාමල් රාජපක්ෂ ඇතුළු විත්තිකරුවන්ට එරෙහිව ගොනුකර ඇති ක්රිෂ් ගනුදෙනුවට අදාළ නඩුව ලබන අප්රේල් මස 02 වනදා යළි කැඳවීමට කොළඹ මහාධිකරණය අද (19) නියම කර තිබේ.
මෙම නඩුව අද දින කොළඹ මහාධිකරණ විනිසුරු නදී අපර්ණා සුවඳුරුගොඩ මහත්මිය ඉදිරියේ කැඳවනු ලැබූ අතර, එහිදී විත්තිකාර නාමල් රාජපක්ෂ අධිකරණය හමුවේ පෙනී සිට ඇත.
මෙම සිද්ධියට මූලික වන්නේ 2012 වසරේදී කොළඹ කොටුව ප්රදේශයේ අක්කර 4.3ක භූමි භාගයක් Krrish Tranceworks Square ව්යාපෘතිය සඳහා ඉන්දියානු සමාගමකට බදු දීමයි. මෙම ව්යාපෘතිය සිදුවන අතරතුර, ශ්රී ලංකාවේ රග්බි ක්රීඩාව දියුණු කිරීම සඳහා යැයි පවසමින් ක්රිෂ් සමාගමේ අධ්යක්ෂවරයෙකුගෙන් රුපියල් මිලියන 70ක මුදලක් ලබාගත් බවට නාමල් රාජපක්ෂට චෝදනා එල්ල විය.
2015 වසරේදී යහපාලන රජය බලයට පත්වීමත් සමඟ මෙම ගනුදෙනුව පිළිබඳව මූල්ය අපරාධ විමර්ශන කොට්ඨාසය පුළුල් පරීක්ෂණයක් ආරම්භ කර තිබුණි. එහිදී අනාවරණය වූයේ අදාළ මුදල රග්බි ක්රීඩාව වෙනුවට වෙනත් පෞද්ගලික කාර්යයන් සඳහා භාවිත කර ඇති බවයි. මේ සම්බන්ධයෙන් 2016 ජූලි මාසයේදී නාමල් රාජපක්ෂ අත්අඩංගුවට ගෙන රක්ෂිත බන්ධනාගාර ගත කෙරුණු අතර පසුව ඔහු ඇප මත නිදහස් විය.
දීර්ඝ කාලයක් තිස්සේ මහේස්ත්රාත් අධිකරණයේ විභාග වූ මෙම කරුණු සම්බන්ධයෙන් නීතිපතිවරයා විසින් පසුගිය 2025 වසරේ මුල් භාගයේදී කොළඹ මහාධිකරණය හමුවේ අධිචෝදනා ගොනු කරන ලදී. නාමල් රාජපක්ෂ දිගින් දිගටම පවසා සිටින්නේ මෙම නඩුව දේශපාලනික වශයෙන් තමන් දඩයම් කිරීම සඳහා සිදුකරන පියවරක් බවයි.
