තැපැල් වර්ජකයන්ගේ ඉල්ලීම් දෙකක් වන ඇඟිලි සලකුණු යන්ත්‍ර ඉවත් කිරීම හෝ අතිකාල දීමනා වැඩි කිරීම යන ඉල්ලීම් ඉටු කිරීමට නොහැකි බවත් තීරණ සමඟ යාමට කැමති තැපැල් සේවකයන්ට සේවයේ රැඳී සිටිය හැකි බවත්, ඇඟිලි සලකුණු යන්ත්‍රවලට අකමැති පිරිස් සිටිනවා නම්, ඇඟිලි සලකුණු යන්ත්‍ර නොමැති තැනක ගොස් රැකියාවක් කළ හැකි බවත් කැබිනට් ප්‍රකාශක අමාත්‍ය නලින්ද ජයසිංහ පවසා තිබේ.

අද (19) කැබිනට් තීරණ දැනුම්දීමට එක්වෙමින් අමාත්‍යවරයා මේ බව සඳහන් කළා.

ඒ අනුව, අදාළ තීරණ අනිවාර්යයෙන්ම ක්‍රියාත්මක කරන බවත්, ඔවුන්ට සාකච්ඡා කිරීමට අවශ්‍ය නම් සාකච්ඡා කළ හැක්කේ මෙම ඉල්ලීම් දෙකට එකඟ වන්නේ නම් පමණක් බවයි.

අතිකාල දීමනා සහ බඳවාගැනීම් ගැටලු ඇතුළු ඉල්ලීම් 19ක් මුල් කරගෙන ශ්‍රී ලංකා තැපැල් සේවයේ වෘත්තීය සමිති 22ක් මේ වන විට දීප ව්‍යාප්ත අඛණ්ඩ වැඩ වර්ජනයක් ආරම්භ කර තිබේ.

මේ සඳහා ශ්‍රී ලංකා තැපැල් සේවකයන්ගෙන් 97%ක් පමණ මෙම වැඩවර්ජනයට සහභාගී වී සිටින බවට ඒකාබද්ධ තැපැල් වෘත්තීය සමිති පෙරමුණේ සම කැඳවුම්කරු වන චින්තක බණ්ඩාර පවසා ඇත.

කෙසේ නමුත් අගෝස්තු 17 වන දින රජයේ ප්‍රවෘත්ති දෙපාර්තමේන්තුවේ පැවති ප්‍රවෘත්ති සාකච්ඡාවකට එක් වෙමින් තැපැල්පති රුවන් සත්කුමාර පැවසුවේ, තැපැල් සේවකයන්ගේ වැඩවර්ජනයට අදාළ ඉල්ලීම්වලින් බහුතරයකට මේ වන විටත් විසඳුම් ලබා දී ඇති බව ය.

පසුගිය අගෝස්තු 17 වන දා පැවති මාධ්‍ය හමුවේදී තැපැල්පතිවරයා ප්‍රකාශ කළේ, ඇඟිලි සලකුණු යන්ත්‍ර ක්‍රියාත්මක කිරීමට අදාළව වෘත්තීය සමිති ක්‍රියාමාර්ගයක් හරහා විරෝධය පළ කිරීම පදනම් විරහිත බව ය.

“තැපැල් දෙපාර්තමේන්තුවේ පාලන කාර්යාල සහ මෙහෙයුම් කාර්යාල බොහොමයක පැමිණීම සහ පිටවීම ඇඟිලි සලකුණු යන්ත්‍ර මගින් සටහන් කරන්නේ නෑ. පහුගිය අවුරුද්දේ විගණන විමසීම් 200කට අධික ප්‍රමාණයක් තිබුණා. එතනින් බහුතරයක් තිබුණේ පැමිණීම පිටවීම සලකුණු නොකර වැටුප් සහ අතිකාල ලබා ගැනීම සම්බන්ධයෙන්,” තැපැල්පතිවරයා සඳහන් කරයි.

ඒකාබද්ධ තැපැල් වෘත්තීය සමිති පෙරමුණේ සම කැඳවුම්කරු වන චින්තක බණ්ඩාර පවසා ඇත්තේ “අපි ඇඟිලි සලකුණුවලට විරෝධය පළ කරන්නෙ නෑ. ඒක බොරුවක්,”

“නමුත් ඇඟිලි සලකුණු යන්ත්‍ර සවි කළා ම යම් කෙනෙක් අතිකාලයක් කළොත් ඒක ඇඟිලි සලකුණු යන්ත්‍රයන් තහවුරු කරන්න ඕනේ. නමුත් මේ තැන්වල පස් දෙනෙක් ඉන්න ඕනේ තැන ඉන්නේ එක්කෙනයි. එතකොට ඒ කීප දෙනෙක්ගේ වැඩ තනි කෙනෙක් රෑ දෙගොඩහරිය වෙනකන් කරන්න ඕනේ. සමහර වැඩ ඒ ළමයි ගෙදර ගිහිල්ලා කරන්නේ,” ඔහු පැවසුවේ ය.

“මෙතෙක් කල් එහෙම වැඩියෙන් කරන වැඩවලට අවසරයක් ලබා දීලා තිබුණා. පැමිණීම පිටවීම ඇඟිලි සලකුණු යන්ත්‍රයෙන් සටහන් කළාට වැඩියෙන් කරන වැඩවලට අතිකාල ගෙවීම කළා. දැන් ඒක නතර කරලා තියෙනවා.”

ඒකාබද්ධ තැපැල් වෘත්තීය සමිති පෙරමුණේ සම කැඳවුම්කරු වන චින්තක බණ්ඩාර පවසන්නේ, මේ වන විට එම නිසා සේවා මුරවල වැඩ කිරීමට නොහැකි තත්ත්වයක් ගොඩනැගී ඇති බව ය. අතිකාල ගෙවීම නැවත්වීම නිසා එම අමතර වැඩ කිරීමට සේවකයන් අකමැති බව ඔහු පැවසුවේ ය. “ඒ නිසා අපි ඇඟිලි සලකුණු තැබීමට නෙවෙයි විරුද්ධ, මේ අතිකාල දීමනා ගෙවීම නැවත්වීමට යි.”

අතිකාල ගෙවීම අඩු වී තිබෙනවා ද?

ශ්‍රී ලංකා තැපැල් සේවයේ පැවති අතිකාල ක්‍රමවේදය ද මේ වන විට වෙනස් කර ඇති අතර, එය ද මෙම වර්ජනයට බලපෑ එක් හේතුවකි.

මීට පෙර පැයක අතිකාල දීමනාවක් සඳහා පැයක් සහ තවත් මිනිත්තු 15කට අදාළ ගෙවීමක් සිදු කර තිබේ. රජයේ නිවාඩු දිනයක් සහ ඉරිදා දිනයන් සඳහා ඊට වැඩි අතිකාල දීමනාවක් ගෙවා තිබේ.

නමුත් මෑතකදී රජය ගත් ප්‍රතිපත්තිමය තීරණයක් අනුව පැයක අතිකාල සඳහා සිදු කරන ගෙවීමෙන් පැයක් සඳහා ගෙවන්නේ එම ගාස්තුවෙන් 6න් 5ක ප්‍රමාණයකි.

නිදසුනක් ලෙස පැයක් සඳහා රු. 120.00ක මුදලක් අතිකාල ලෙස ගෙවන්නේ නම් මේ වන විට ගෙවන්නේ පැයක් සඳහා රු. 100.00ක මුදලකි.

කෙසේ වෙතත්, තැපැල්පතිවරයා ප්‍රවෘත්ති සාකච්ඡාවේදී පැවසුවේ, මෑතකදී සිදු කළ මූලික වැටුප් වැඩිවීම සමග ආයතන අධ්‍යක්ෂ ජනරාල්වරයා නියෝග කර ඇත්තේ, 2027 ජනවාරි දක්වා අතිකාල දීමනාවලින් 6න් 5ක කොටසක් ගෙවන ලෙසට බව ය.

“වැටුප් වැඩි කරලා තියෙනවා. ඒකට සාපේක්ෂව අතිකාල මුදලත් වැඩි කරලා තියෙනවා. ඒක කපන්න අයිතියක් නෑ. දැන් කරන්නේ පැයකට ගෙවන මුදලින් හයෙන් පහක් ගෙවන්නේ. මේ නිසා රු. 40,000.00ක වගේ වැටුපක් ගන්න කෙනෙක්ගේ අතිකාල දීමනාවෙන් රු. 8,000ක් පමණ අඩු වෙනවා,” චින්තක බණ්ඩාර පවසයි.

“සාමාන්‍යයෙන් රු. 40,000ක වැටුපක් ගන්න කෙනෙක් සම්පූර්ණ අතිකාල පැය 240 ම වැඩ කළොත් රු. 33,000ක වගේ අතිකාල දීමනාවක් ගන්න පුළුවන්,” යැයි පවසමින් ඔහු පෙන්වා දුන්නේ නව ක්‍රමවේදය යටතේ ගණනය කිරීමේදී එම අතිකාල දීමනා සඳහා මෙතෙක් හිමි වූ මුදලින් රු. 8,000ක් පමණ මුදලක් අහිමි වන බව ය.