සඳුදා කැනඩාවේ පැවති G7 රටවල් රැස්වීමේදී ඊශ්‍රායලයට සහය පළකරමින් නිවේදනයක් නිකුත් කිරීම මුළු ලෝකයේම අවධානයට යොමුව තිබේ. කැනඩාව, ප්‍රංශය, ජර්මනිය, ඉතාලිය, ජපානය, එක්සත් රාජධානිය සහ ඇමරිකා එක්සත් ජනපදය මෙම G7 කණ්ඩායමට අයත් වේ.
එම රටවල් ඒකාබද්ධ ප්‍රකාශයක් නිකුත් කරමින් පවසන්නේ ”ඉරානයට කිසිදා න්‍යෂ්ටික අවියක් තබාගත නොහැකි” බවයි.
මෙම ප්‍රකාශය නිකුත් වන්නේ ඉරානයේ න්‍යෂ්ටික මධ්‍යස්ථානවලට පහර දීම සඳහා යයි පවසමින් ඊශ්‍රායලය සිය ‘ඔපරේෂන් රයිසින් ලයන්’ මෙහෙයුම දියත් කිරීමෙන් දින කිහිපයකට පසුයි. මෙම ඒකාබද්ධ ප්‍රකාශයේ දී, G7 කණ්ඩායම ඉරානයේ න්‍යෂ්ටික අභිලාෂයන් පිළිබඳ සිය ස්ථාවරය නැවත තහවුරු කළ අතර ඊශ්‍රායලයේ ආත්මාරක්ෂාව සඳහා ඇති අයිතිය පිළිගෙන තිබේ.
“ඊශ්‍රායලයට තමන්ව ආරක්ෂා කර ගැනීමට අයිතියක් ඇති බව අපි තහවුරු කරමු,” ප්‍රකාශයේ සඳහන් විය. ඉරාන අර්බුදය විසඳීම කලාපය සන්සුන් කිරීම සඳහා පුළුල් උත්සාහයක කොටසක් විය යුතු බව නායකයින් ඉල්ලා තිබේ. ඊශ්‍රායලය සහ ඉරානය අතර උත්සන්න වන ආතතීන් හේතුවෙන් සමුළුවට සැලකිය යුතු ලෙස බාධා ඇති වූ අතර එක්සත් ජනපද ජනාධිපති ඩොනල්ඩ් ට්‍රම්ප් සඳුදා හදිසියේම සමුළුවෙන් පිටව ගොස් ඇත.
සිය නික්ම යාමට පෙර කතා කරමින් ට්‍රම්ප් ටෙහෙරානයට තියුණු අනතුරු ඇඟවීමක් කර ඇත. “ඔවුන් ගිවිසුමක් ඇති කර ගත යුතුයි,” ඔහු පැවසුවේ ඊශ්‍රායල ප්‍රහාර ආරම්භ වීමට දින 60 කට පෙර ඉරානය තම න්‍යෂ්ටික අභිලාෂයන් සම්බන්ධ පාලනයක් පිළිබඳ ගිවිසුමකට එළඹීමට අපොහොසත් වීම ගැන සඳහන් කරමිනි.
ගැටුමට එක්සත් ජනපද සෘජු මිලිටරි මැදිහත්වීමක් ඇතිදැයි විමසූ විට, ට්‍රම්ප් නිශ්චිත තොරතුරු සැපයීම ප්‍රතික්ෂේප කර ඇත. “මට ඒ ගැන කතා කරන්න ඕන නෑ,” ඔහු පැවසීය..
