2023 වසරේ මාතර, වැලිගම ප්‍රදේශයේ පිහිටි W 15 හෝටලයට වෙඩි ප්‍රහාරයක් එල්ල කිරීමේ සිද්ධිය සම්බන්ධයෙන් තමන්ව අත්අඩංගුවට ගන්නා ලෙස මාතර මහෙස්ත්‍රාත් අධිකරණය විසින් දී තිබෙන නියෝගයක් ක්‍රියාත්මක කිරීම වළක්වාලන අතුරු තහනම් නියෝගයක් නිකුත් කරන ලෙස ඉල්ලා‍ පොලිස්පති දේශබන්දු තෙන්නකෝන් මහතා විසින් ඉදිරිපත් කළ රිට් පෙත්සමක් අභියාචනාධිකරණය විසින් අද (17) නිෂ්ප්‍රභ කර තිබේ.

පෙත්සම නිශ්ප්‍රභ කරමින් දේශබන්දු තෙන්නකොන් වහාම අත්අඩංගුවට ගෙන අධිකරණයට ඉදිරිපත් කරන ලෙස අපරාධ පරීක්ෂණ දෙපාර්තමේන්තුවට නියෝග කර තිබෙන අතර රුපියල් 10,521ක දඩ මුදලක් ගෙවිමටද වැඩ තහනමට ලක්ව සිටින පොලිස්පති දේශබන්දු තෙන්නකෝන්ට නියෝග කර ඇත .

මේ සම්බන්ධයෙන් අත්අඩංගුවට ගැනීම වළක්වාලමින් නියෝග නිකුත් කරන ලෙස ඉල්ලිම් රාශියක් තිබුණද එම සියලුම ඉල්ලීම් අභියාචනාධිකරණය විසින් ප්‍රතික්ෂේප කර තිබේ.

මාතර මහේස්ත්‍රාත් අධිකරණයේ තීන්දුව නීතියට අනුකූල බවත්, එම නියෝගයට බලපෑම් කිරීමට අභියාචනාධිකරණය බලාපොරොත්තු නොවන බවත් අභියාචනාධිකරණයේ වැඩබලන සභාපති ලෆාර් තාහීර් ප්‍රකාශ කර ඇත.

මීට අමතරව දේශබන්දු තෙන්නකෝන් හට සැගවි සිටිමට උදව්කළ අය සඳහාද නීතිය ක්‍රියාත්මක කරන ලෙස අභියාචනාධිකරණය නියෝග කර තිබේ.

මෙම වෙඩි තැබීමේ සිද්ධිය සිදුවූ පසු පොලිස් මාධ්‍ය ප්‍රකාශක නිහාල් තල්දූව පැවසුවේ විශේෂ මෙහෙයුමක් සඳහා කොළඹ අපරාධ කොට්ඨාශයේ නිලධාරීන් කොළඹින් පිටත්ව ගොස් සිටියදී වැලිගම W 15 හෝටලය අසල රැඳී සිටි සැකකටයුතු පුද්ගලයෙකු ඇල්ලීමට යාමේදී හෝටලෙන් නිලධාරීන්ට වෙඩි තබා තිබේ.

නමුත් මෙම සිදුවීම සිදුවී කාලයක් තුළ මාධ්‍ය හමුවකදී අදහස් දක්වමින් සමාජවාදී පක්ෂය මේ සිද්ධිය සම්බන්ධයෙන් හෙළිදරව් කරන ලදී. එම මාධ්‍ය හමුවේදී අදහස් දැක්වූ පැවසුවේ දෙමටගොඩ අපරාධ කොට්ඨාශය භාවිතා කරන නිල නොවන ඝාතක කණ්ඩායමක් සිටින බව පැහැදිලි වන බවයි. මෙහිදී ඔහු වැඩිදුරටත් පැවසුවේ වැලිගම හෝටලයේ අයිතිකරු වන ජමල්ඩින් සහ එවක මහජන ආරක්ෂක අමාත්‍ය ටිරාන් අලස් අතර ඇතිවූ ව්‍යාපාරික ආරවුලක් මත මෙලෙස පොලිසිය යොදවා වෙඩි තබා ඇති බවයි. ඒ අනුව පොලීසිය ඒ මොහොතේ සිදුකල ප්‍රකශය අස්තයක් බව පුබුදු ජයගොඩ සාක්ෂි සහිතව පෙන්වා දෙන ලදී.

දැන් මාස කිහිපයකට පසු දේශබන්දු අත්අඩංගුවට ගැනීමේ නියෝගය හරහා එම මාධ්‍ය හමුවේදී හෙලිකල කරුණු සත්‍ය බව ඔප්පු වී තිබේ.