සහල් ආනයනය කිරීමේදී කිලෝග්‍රෑම් එකකට රේගුව විසින් අයකරනු ලබන රුපියල් 65ක බදු මුදල යම් ප්‍රමාණයකින් අඩුකර දෙන ලෙස වෙළෙඳුන් රජයෙන් ඉල්ලා ඇතැයි වාර්තා වේ.

වෙළෙඳුන් මෙන් පාරිභෝගික සංවිධාන පවසා ඇත්තේ, ආනයනික සහල් බදු අඩු කළහොත් පාලන මිලට සහල් වෙළෙඳපොළේ පවතිනු ඇති බවයි.

මාස දෙකක පමණ සිට පවතින සහල් අර්බුදයට පිළියම් ලෙස උපරිම තොග හා සිල්ලර මිල ඉහළ දැමීම මෙන්ම විදේශ රටවලින් සහල් ආනයනය කිරීමටත් රජය තීරණය කර තිබේ.

සහල් ආනයනයට අවසර හිමිවූ දෙසැම්බර් 20 වැනිදා දක්වා සහල් මෙට්‍රික්ටොන් 67,000ක් ආනයනයකර තිබූ බව ශ්‍රී ලංකා රේගුව පවසයි.

ඉන් මෙට්‍රික්ටොන් 38,500ක් නාඩු සහල් වන අතර සෙසු මෙට්‍රික්ටොන් 28,500ක් කැකුළු සහල්.

මෙම සහල් තොග වෙනුවෙන් ශ්‍රී ලංකා රේගුව රුපියල් බිලියන 4.3ක් ආනයන බදු ලෙස අයකර ඇත්තේ කිලෝග්‍රෑම් එකකට රුපියල් 65 බැගිනි.

සහල් ප්‍රශ්නය විසදීම සඳහා ආණ්ඩුව ගත් එක් ක්‍රියමර්ගයක් වූ පාලන මිල ඉහළ දැමීම නිසා අවසානයේ වාසි ලැබුවේ මහා පරිමාණ සහල් මෝල් හිමියන්ය. එසේම දැන් සහල් ආනයනය හරහා බදුවලින් නිදහස් වි අධික ලාභයක් ලැබීම ආනයනකරුවන් ගේ අදහස බව පෙනේ. ඔවුන්ද උත්සාහ කරන්නේ අවස්ථාව පාවිච්චි කරමින් ලාභ ලැබීමටයි.