සාම්පූර්, චේනයූර්හි ප්රදේශයට කඩාවැදුණු සාම්පූර් පොලිසියේයැයි කියන පිරිසක් විසින් කාන්තාවන් තිදෙනකු හා පිරිමි පුද්ගලයෙකු අත්අඩංගුවට ගෙන තිබෙනවා.
පොලිස් නිල ඇඳුම් ඇඳගත් මෙම පිරිස කෘර හා අමානුෂික ලෙස කාන්තාවන් ඇදගෙන යන ආකාරය වීඩියෝ දර්ශනවල දැක්වෙනවා.
1985 සහ ඊට ආසන්න කාලවලදීද මෙලෙස කඩාවැදී මෙම ප්රදේශවල දෙමළ ජනතාවගේ නිවාසවලට ගිනිතැබීම ගැන රජයට චෝදනා එල්ල වූ අතර එවැනි ක්රියා ජනවාර්ගික ගැටුම්වලට හේතුපාදක වුණා.
මියගිය ඥාතීන් සිහිකිරීම හේතුවෙන්, ඊයේ (12) රාත්රී මෙම පිරිස මෙලෙස ඇදගෙන යෑමට හේතු වී ඇති බව හෙළි වී තිබෙනවා.
මියගිය ඥාතීන් සිහිපත් කිරීමට ඇති අයිතිය තහවුරු කරන ලෙස මානව හිමිකම් කොමිසම 2016 දී රජයට නිර්දේශ කර තිබියදී මෙලෙස පොලිසිය හිරිහැර කිරීම බරපතල තත්ත්වයක් ලෙස සැලකිය හැකියි.
එම පිරිස අත්අඩංගුවට ගන්නා මොහොතේ පැහැදිලිව දෙමළ බසින් කියා තිබුණේ තමන් යුද්ධයේදී මිය ගිය ඥාතීන් සැමරීම පමණක් කරන බවයි. ඇය ශෝකය සිහිපත් කරමින් කැද හෙවත් කංජි බෙදීමක් සිදු කර තිබුණා.
මේ පිළිබඳ පොලිසියෙන් කළ විමසීමකදී සඳහන් කළේ අධිකරණ නියෝග කඩ කරමින් ස්මරණය කළ කාන්තාවන් දෙදෙනකු සහ පිරිමි පුද්ගලයකු අත්අඩංගුවට ගත් බවයි.
අත්අඩංගුවට ගැනීමට බාධා කිරීම සම්බන්ධයෙන් විශ්ව විද්යල ප්රවේශය බලාපොරොත්තුවෙන් සිටින තරුණියක ද අත්අඩංගුවට ගත් බව පොලිසිය පවසනවා.
මෙම හතර දෙනා ලබන 27 වැනිදා තෙක් රිමාන්ඩ් කරන ලෙස මුතූර් මහේස්ත්රාත් අධිකරණය නියෝග කර තිබේ.
මෙම පිරිස අයි.සී.සී.පී.ආර් පනත යටතේ ගැණෙන වරදක් කර ඇත්දැයි සෙවීමට විමර්ශනය කරන හෙයින් ඔවුන් රිමාන්ඩ් කරන ලෙස පොලිසිය ඉල්ලා ඇතැයි වාර්තා වේ.
(තරිදු ජයවර්ධන)
