තම මවගේ වෛද්‍ය ප්‍රතිකාර සඳහා මුදල් සොයා ගැනීමට නොහැකි වීම හේතුවෙන් එක්සත් අරාබි එමීර් රාජ්‍යයේ ඩුබායි හි ගෘහ සේවයට පැමිණියත් තමාගේ එකම සිහිනය ජාත්‍යන්තර තරඟයක දී රිටි පැමිණේ ඉසව්වෙන් පදක්කමක් දිනාගැනීම බව මෙරට කාන්තා රිටි පැනීමේ ඉසව්වේ ජාතික ශූරිය සචිනි කෞශල්‍යා පෙරේරා පවසා තිබෙනවා. ඇය මේ බව කියා ඇත්තේ එක්සත් අරාබි එමීර් රාජ්‍යයේ ‘The National’ මාධ්‍යට. එහි වෙබ් අඩවියේ ඇය හා කළ සංවාදයේ වීඩියෝවක් ද පළකර තිබුණා. ඒ සංවාදය කර තිබුණේ රමෝලා තල්වාර් බදම් (Ramola Talwar Badam) මාධ්‍යවේදිනිය සමඟින්.

තවමත් 24 හැවිරිදි වියේ පසුවන සචිනි කියන්නේ තම මවගේ අසනීප තත්වය හේතුවෙන් සිය පවුල රැකබලාගැනීම සඳහා ඩුබායි හි ගෘහ සේවයට පැමිණ ඇති බවයි. තමන් රැකියාවෙන් ගෘහ සේවිකාවක් වුවත් සිතින් තවමත් ජිම්නාස්ටික් සහ මලල ක්‍රීඩිකාව බව සචිනි පෙරේරා පවසා තිබෙනවා.
දවල් කාලයේ දී ගෘහ සේවිකාවක් ලෙස ඩුබායි හී දරුවන් රැක බලා ගත්තත් ශ්‍රී ලංකාවේ පුහුණුකරු ලබා දී තිබෙන ව්‍යායාම කාල සටහන පිළිපැදීමට අමතක නොකරන බවත් ඒ සඳහා සේවය කරන නිවසින්ද විශාල සහායක් ලැබෙන බවත් ඇය කියා තිබෙනවා. පියවරෙන් පියවර තමන් නැවතත් රිටත් සමඟ පියාසර කිරීමට සූදානම් බවත් කෙදිනක හෝ තම සිහිනය ඉටු කර ගන්නා බවත් සචිනි පවසනවා.

පසුගිය වසරේ ජූලි මාසයේ දී ඇය එක්සත් අරාබි එමීර් රාජ්‍යයට සංක්‍රමණය වීමෙන් පසු ඉංග්‍රීසි භාෂාවෙන් ඇයගේ පළමු සම්මුඛ සාකච්ඡාව කරමින් The National වෙත කියා ඇත්තේ “මට දැන් මෙය මගේ ලෝකය බව හැඟේ. මම පියවරෙන් පියවර පියාසර කරමි. මම වැඩ කරනවා. ඒක එක් එක් පියවරක්. ඊළඟ පියවර මගේ සිහිනය නැවත පියාසර කිරීම” යනුවෙන්.

ඇය කුඩා දරුවෙකු රැකබලා ගන්නා අතර ඩුබායි නිවසක දිවා කාලයේ නිවසේ වැඩ කටයුතු කරන්නේ රැකියාවෙන් පසු ව්‍යායාම කිරීමට කාලය වෙන් කරමින බව The National වාර්තා කරනවා.
“මට අවශ්‍ය ශ්‍රී ලංකාවෙන් රිටි පැනීම සඳහා ජාත්‍යන්තර පදක්කමක් දිනන පළමු ගැහැණු ළමයා වීම. ගෘහ සේවිකාවක් වීම මගේ රැකියාවයි. නමුත් මගේ කාර්යය නෙමෙයි. මම ජිම්නාස්ටික් ක්‍රීඩිකාවක් සහ මලල ක්‍රීඩිකාවක්”බව සචිනි කියනවා.
සචිනි පිළිබඳව මාධ්‍ය වාර්තා පළවීමත් සමඟ ඩුබායි හි ශ්‍රී ලංකා කොන්සල් ජනරාල් ඇලෙක්සි ගුණසේකර පවසා ඇත්තේ ඇයට එමීර් රාජ්‍යයේ ක්‍රීඩාවට සම්බන්ධ රැකියාවක් සොයා ගැනීමට උත්සාහ කරන බවයි. The National වාර්තා කරන අන්දමට කොන්සල් ජෙනරාල්වරයා පසුගිය බදාදා ඩුබායි හි ක්‍රීඩා බලධාරීන් සමඟ පැවති රැස්වීමකට එක්ව තියෙනවා. ඒ ඇයට පුහුණුවීම් කෙරෙහි අවධානය යොමු කළ හැකි විකල්පයක් සෙවීමට බවයි කියන්නේ. ඒ පිළිබඳ විස්තර සකස් කරමින් පවතින බව ඔහු කියා තිබෙනවා.

“2018 වසරේ සිට අපරාජිතව සිටින ශ්‍රී ලංකාවේ ‘රිටි පැනීමේ රැජින’ සචිනි පෙරේරා පසුගිය වසරේ පිහිටුවා තිබූ රිටි පැනීමේ ජාතික වාර්තාව මීටර් 3.71ක්. ලෝක මලල ක්‍රීඩා වලට අනුව, මෙතෙක් කලාපීය වාර්තාව මීටර් 4.72 ක් වන අතර එය 2019 දී චීනයේ ලී ලින්ග් විසින් පිහිටුවන ලදී.
නව යොවුන් වියේදී ජිම්නාස්ටික් ක්‍රීඩාව පෙරේරාගේ ප්‍රථම ආදරය වූ අතර ඇය 2014 ග්ලාස්ගෝ හි පැවති පොදුරාජ්‍ය මණ්ඩලීය ක්‍රීඩා උළෙල ඇතුළු ජාත්‍යන්තර ඉසව් සඳහා තම රට නියෝජනය කළාය.

ජිම්නාස්ටික් පුහුණුවීම්වල දැඩි බව නිසා 2017 වසරේදී ඇය යුද හමුදාවට බැඳීමෙන් පසු ශ්‍රී ලංකා හමුදාව නියෝජනය කරමින් තරඟ සඳහා රිටි පැනීම සඳහා මාරුවීමට ඇයට උපකාර විය. මෙමඟින් රිටි පැනීම සඳහා සන්නද්ධ හමුදා පහසුකම්වල පුහුණුවීම් සඳහා අවස්ථාව විවර වූ අතර ඇය ඉක්මනින්ම වාර්තා බිඳ දැමීමට පටන් ගත්තාය” යි සචිනි හා සාකච්ඡාවේ සටහන තබමින් The National වාර්තා කරනවා.
“කෙසේ වෙතත් ඇගේ මව අර්ධ වශයෙන් අංශභාගයට පත් කළ ආඝාතයකට ගොදුරු වූ විට පෙරේරාට ඇගේ සුරතල් සිහිනවලට විරාමයක් තැබීමට සිදුවිය” යි එහි සඳහන් වෙනවා.

තමන්ගේ දෙමාපියන් නොමැතිව කිසිවක් කළ නොහැකි නිසාම තමන්ගේ අම්මා ඇඳේ සිටින විට තමන්ගේ පවුල රැකබලා නොගෙන ඉන්නේ කෙසේද කියා සචිනි විමසා සිටිනවා.
“මම ඩුබායි හි රැකියාවක් සොයා ගැනීමට තීරණය කළා. එතකොට මට අම්මාගේ ප්‍රතිකාර සඳහා වියදම් කරන්න පුළුවන්” බව සචිනි පෙරේරා පවසනවා.
“පෙරේරා ඇයගේ මාසික වැටුපෙන් වැඩි කොටසක් නිවසට යවන්නේ ඇගේ මවගේ රැකවරණය සඳහා වන අතර, ඇයට දැන් උදව්වෙන් පියවර කිහිපයක් ඇවිද යා හැකිය.

1948 නිදහසෙන් පසු ප්‍රථම වතාවට ජාතිය විදේශ ණය පැහැර හැරීමත් සමඟ මුදල් කඩා වැටීමත් සමඟ පසුගිය වසරේ ශ්‍රී ලංකාවේ ආර්ථික බිඳවැටීම ඉන්ධන, ආහාර සහ විදුලි මිල ඉහළ ගියේය. පසුගිය වසරේ රජයේ රැකියා කාර්යාංශයේ අංකවලට අනුව 311,000 කට වැඩි පිරිසක් රැකියා සෙවීම සඳහා ප්‍රධාන වශයෙන් ගල්ෆ් රටවලට පිටත්ව යාමට පොළඹවා ඇත.
මේ වසරේ විදේශ රැකියා සොයා යාමට ඒ හා සමාන සංඛ්‍යාවක් පිටව යනු ඇතැයි අපේක්ෂා කෙරේ” යි The National සටහන් කරනවා.

“මම ඩුබායි ආවේ ගෘහ සේවිකාවක් ලෙස සේවය කරන්න. ඒ මගේ පෞද්ගලික ජීවිතය. මම යනකොට මගේ මලල ක්‍රීඩා ජීවිතය ගැන කවුරුත් සැලකුවේ නැති නිසා මට මගේ පවුල බලාගන්න යන්න වුණා.
දැන් කියනවා ඇයි ගෘහ සේවිකාවක් විදියට යන්නේ, මම ආපහු එන්න ඕනේ කියලා.
මම ශ්‍රී ලංකාව ගැන කනගාටුදායක් පුවත් මවන්නේ ඇයි දැයි මිනිසුන් අසනවා. නමුත් මම කතා කරන්නේ මම, මගේ අම්මා සහ මගේ පවුලේ අයව බලා ගන්නා බව කීමට” යි සචිනි පවසනවා.

සචිනි පෙරේරා පවසන්නේ ශ්‍රී ලංකාව වෙනුවෙන් පදක්කම් දිනූ තම මිතුරන් සහ අනෙකුත් ක්‍රීඩක ක්‍රීඩිකාවන් වෙනුවෙන් හඬක් නැගීමට මෙන්ම එදිනෙදා ජීවිතය ගැටගසා ගැනීමට ද තමන් උත්සාහ කරන බවයි.
“ඔවුන් ගැන ජනතාව දැනගත යුතුයි. මගේ කතාව එක කතාවක් විතරයි. ශ්‍රී ලංකාවේ අපට බොහෝ කතා තියෙනවා. ඔවුන්ට උදව් අවශ්‍යයි. මට මගේ තරඟය, මගේ සිහින, මගේ අනාගතය මග හැරුණා. ඒක හරිම අමාරුයි. සමහර වෙලාවට මම මගේ පුහුණුකරු එක්ක, මගේ තාත්තා එක්ක අඬනවා. මට මගේ ක්‍රීඩාව නැවත ආරම්භ කිරීමට අවශ්‍යයි” ශ්‍රී ලංකා රිටි පැනීමේ වාර්තාව හිමි ජාතික ශූරිය ඩුබායි හි The National වෙත පවසා තිබෙනවා.