පෙකණි වැලකින් බැදි බිළින්දා
මරන්නට මට නොහැකි හින්දා
උඹව රකිනා කෙනෙක් කැන්දා
රැගෙන යයි මම මෙන්න වැන්දා
ආදරේ මහ ගොඩක් තිබුනට
සාගතේ බර දැනෙයි ගෙදරට
උඹත් ලෝකෙට ගෙනා වරදට
අඩනවා මම කදුළු හිරකොට
හොදට ඔතලා සුවය සදලා
උඹව නිදිකර මුහුණ ඉඹලා
එනකොටත් දුම්රියෙන් බැහැලා
කිරිබරින් උඩුකයම තෙමිලා
සමාවෙන්නට කියා නොකියමි
මෙහෙම වීමට කරුණු විමසමි
ඉතින් මම මගෙ කදුළු පිසලමි
අපිව වෙන්කළ ක්‍රමය පෙරලමි
