ආණ්ඩුව විසින් කොතලාවල ආරක්ෂක විශ්වවිද්‍යාල පනත නමින් නව පනතක් සම්මත කරමින් අධ්‍යාපන ක්ෂේත්‍රයේ අයිතිවාසිකම් කප්පාදු කර පෞද්ගලිකකරණය කිරීමට අමතරව අධ්‍යාපන ක්ෂේත්‍රය මිලිටරීකරණය කිරීමට එරෙහිව අන්තර් විශ්ව විද්‍යාලයීය ශිෂ්‍ය බල මණ්ඩලය පැවැත්වූ සාමකාමී විරෝධතාව මැදට පොලිසිය කඩා පැන කලබලයක් ඇති කර තිබේ.
විරෝධතාවය පැවැත්වීමට සිවිල් ඇඳුමින් හා නිල ඇඳුමින් සැරසුණු ආරක්ෂක නිලධාරින් දිගටම බාදා කළ අතර පහර දීම්, බැන වැදීම්, තරජනය කිරීම් ද සිදුකරන ලදී. අවසානයේ විරෝධතාව සඳහා ගෙනැවිත් තිබුණු පඹයකු සහ පසුව විරෝධතාව සඳහා ගෙනැවිත් තිබූ මිනි පෙට්ටියක අනුරුවක් සිසුන්ගේ විරෝධය මැද පොලිසිය විසින් පැහැර ගෙන යනු දක්නට ලැබිණි.
2018 වර්ෂයේ දී ජනතාවගේ විරෝධතා මැද රනිල්-මෛත්‍රී ආණ්ඩුව විසින් හකුලාගත් කොතලාවල පෞද්ගලික විශ්වවිද්‍යාල පනත නැවත වටයකින් ආණ්ඩුව විසින් සම්මත කරගැනීමට කටයුතු සූදානම් කර ඇත. පසුගිය මාර්තු 26 දින මේ සදහා කැබිනට් අනුමැතිය ලබා ගත් අතර අද දින (22) ආරක්ෂක අමාත්‍යාංශයේ උපදේශක කාරක සභාව තුළ කොතලාවල පනත සාකච්ඡා කිරීමට නියමිතව ඇත.
වසංගතට මුවා වී සම්මත කරගැනීමට නියමිත නිදහස් අධ්‍යාපනය වනසන කොතලාවල පනතට එරෙහිව අන්තර් විශ්වවිද්‍යාලයීය ශිෂ්‍ය බලමණ්ඩලය විසින් ඊයේ විරෝධතාවයක් සංවිධානය කර තිබුනේ එබැවිනි.
