කෘෂිකාර්මික නොවන කර්මාන්ත සඳහා රසායනික ද්‍රව්‍ය ආනයනය කිරීමට අවසර ලැබෙන බව ආනයන හා අපනයන පාලක දෙපාර්තමේන්තුව ප්‍රකාශ කරයි.
ඒ අනුව මේ මොහොතක පූර්ණ වශයෙන් එම තහනම ක්‍රියාත්මක නොකොට විශේෂ ආනයන බලපත්‍ර රෙගුලාසිවලට අනුව මැයි මස 6 වන දායින් පසුව ඇතැම් ද්‍රව්‍යයන් ගෙන ඒමට අවසර ලබාදෙමින් ගැසට් පත්‍රයක් මුදල් අමාත්‍යාංශය මගින් නිකුත් කර තිබේ. රසායනික පොහොර, පළිබෝධනාශක සහ වල්නාශක ආනයනය කිරීම තහනම් කිරීමට රජය තීරණ කිරීමත් සමඟ රසායනික ද්‍රව්‍ය ආනයනය කිරීමට නිකුත් කර තිබූ සියලුම බලපත්‍ර අවලංගු විය.
මුදල් අමාත්‍ය මහින්ද රාජපක්ෂ විසින් පසුගිය 6 වැනිදා 2226/48 දරන ගැසට් පත්‍රයෙන් මේ සම්බන්ධව නිවේදනය කර තිබේ.
ඒ සම්බන්ධයෙන් අදහස් දක්වන ආනයන අපනයන පාලක ජනරාල්, දමයන්ති කරුණාරත්න පවසන්නේ, කෘෂිකාර්මික නොවන කර්මාන්ත සඳහා අවශ්‍ය රසායන ද්‍රව්‍ය පූර්ව අනුමැතියකින් පසුව ගෙන්වීමට අවසර ලබා දෙන බවයි.
අදාළ කර්මාන්තවල අවශ්‍යතාව තහවුරු කර ගැනීමෙන් පසුව ඒ සඳහා අවශ්‍ය බලපත්‍ර ඉදිරියේ දී ලබාදීමට කටයුතු කරන බවද ඇය සඳහන් කර තිබේ.
රසායනික පොහොර සහ කෘෂි රසායන ද්‍රව්‍ය ආනයනය කිරීම සම්පූර්ණයෙන්ම තහනම් කර තිබූ මොහොතක නැවත රජය ගෙන තිබෙන මෙම තීරණයත් සමඟ රසායනික පොහොර සහ කෘෂි රසායන ද්‍රව්‍ය ආනයනය කරන සමාගම් ව්‍යාකූලත්වයකට පත් වී ඇති බව වාර්තා වේ.
