පසුගියදා ලංකාවේ සිදුවූ ලාබාලතම කොවිඩ් මරණය ලෙස වාර්තා වූ දින 20ක් වයසැති දරුවා ආදාහනය කර ඇත්තේ දෙමව්පියන්ගේ අවසරයකින් තොරව බව වාර්තා වේ. එසේම දරුවා මිය ගිය බව තමන් රෝහලට දුරකථන ඇමතුමක් දී විමසන තුරු තමන්ට නොදැන්වූ බවද දරුවාගේ පියා සඳහන් කර තිබේ.

දින 20ක් වයසැති බිලිඳාගේ පියා වන එම්. එස්. එම් ෆාහිම් සමඟ හිටපු පාර්ලිමේන්තු මන්ත්‍රී සෙයිද් අලි සාහිර් මව්ලානා සිදුකළ දුරකථන සංවාදයකදී මෙම කරුණු අනාවරණය වී තිබේ.

එම්. එස්. එම් ෆාහිම් පවසන පරිදි දරුවා රිජ්වේ ආර්යා ළමා රෝහලට ඇතුළත් කිරීමෙන් පසු කරන ලද පී.සී. ආර්. පරීක්ෂණයේදී දරුවා පමණක් කොවිඩ් ආසාදිත බව තහවුරුව ඇතත් මව සහ පියා ආසාදිත බව තහවුරුව නැත.

දරුවා ආදාහනය කරන අවස්ථාවේ දෙමව්පියන්ගේ අවසරකින් තොරව ආදාහනය කළ හැකිදැයි දරුවාගේ ඥාතීන් විමසූ අවස්ථාවේ බලධාරීන් පවසා ඇත්තේ නීතිය අනුව එයට බාධාවක් නොමැති බවයි.

උපුටා ගැනීම lankaviews