තනි අරගලයක හුදකලා නිහඬබවට වඩා සාමූහික අරගලයක හඬ ප්‍රබළය.
ඒ සාමූහික ඉල්ලීමත් අලුත් රටක්,නීතිය සුරකින රටක් උදෙසානම් තවත් හඬ ප්‍රබලය.
මේ අද කරාපිටියේ සිට ගාල්ල දක්වා එසවුණු පාද සමූහයයි.
පාට ගොඩක්,අදහස් ගොඩක්,වර්ග ගොඩක්.
නමුත් ඉල්ලීම එකක්!!!!
Tag: world
-
කරාපිටිය රෝහලේ සිට ගාල්ල ගෝඨාගෝගම දක්වා පෙළපාලිය
-
මනුෂගේ පාර්ලිමේන්තු කතාවේ අවසන් භාගය ජනතාව බිය ගැන් වීමේ පිටපතේ ජවනිකාවක් ද?
මනුෂ නානායක්කාර ජුලි 5 නිදා පාර්ලිමේන්තුවේදී තම කතාවේ අවසන් අදියරේ කළ ප්‍රකාශය සුළඟේ පා කර හරින්න පුළුවන් කමක් නැතැයි සිතේ. එළඹෙන සතියෙන් පසුව රටේ උද්ගතව ඇති පෝලිං ප්‍රශ්න විසඳෙන බව හු එහිදී ප්‍රකාශ කරනවා. ඒවා විසඳීමට රජය ගෙන ඇති ක්‍රියාමාර්ග කිහිපයක් පිළිබඳ වත් ඔහු සඳහන් කරනවා. එම පැහැදිලි කිරීමෙන් පසුව ඔහු එළඹෙන්නේ අරගලයට සහ ඒ වෙනුවෙන් පෙනී සිටින දේශපාලන පක්ෂ ,සාමූහික කණ්ඩායම් වලට ප්‍රහාරයක් එල්ල කිරීමටයි. පෝලිං නැතිවී මෙන් පසුව විපක්ෂයට රට තුළ උද්ඝෝෂණ ව්‍යාපාරය ගෙන යන්නට බැරි බව ඔහු කියනවා. එනිසා 9 දා රට තුළ ගැටුම්කාරී කැළඹිලි සහගත තත්වයක් ඇතිකර උගන්ඩාවේ ආදර්ශයට අනුව ජනතාව ගැටුම්කාරී තත්ත්වයකට යොමු කරන්න අරගලයට මුවාවී කල්ලි කණ්ඩායම් සූදානම් වෙමින් සිටින බව ඔහුගේ කතාව තුළ ඉස්මතු කරන්න උත්සාහ දරනවා.
9 වෙනිදා රට තුළ මිනිස් ඝාතන සිදු කරන්න ලේ විලක් ඇති කරන්න සැලසුම් නිර්මාණය වෙනවා කියලා කියනවා . එය එසේ කරන්න සූදානම් වන්නේ ඔවුන්ගේ සැලසුම් වලට අනුව ඉදිරි කාලය තුළ මේ සියලු ප්‍රශ්න විසඳෙන නිසා. මනුෂ නානායක්කාරට අනුව ජූලි නව වැනි දා ජනතා අරගලය කඩාකප්පල්කාරී ක්‍රියාවක්. වැඩිදුරටත් අදහස් දක්වමින් ඔහු කියනවා රටේ මිනිස්සු ඒ තරම්ම මෝඩ නැහැ කියලා. මැයි නම වෙනිදත් රටේ මිනිස්සු පාඩම් ඉගෙන ගත්තලු. නම වැනිදා අරගලය වෙලාවේ අරගලයට උදව් කරපු මධ්‍යම ඉහල පාන්තික ජනතාවටත් මේ අරගලය තුළින් පීඩාවට පත් වෙන්න සිද්ධ වුණු බව ඔහු හොඳ හැටි දන්නවලු. ලොකු ලොකු වාහන වල ගිය අයට ඒසී ඕෆ් කරන්න යන්න කිව්වලු. වීදුරු පහළ කරන්න යන්න කිව්වලු . අරගලය තුළ ඇති නැති පරතරය නිර්මාණය කළා ලු. අරගලයක් නිර්මාණය වෙන්නෙම ඇති නැති පරතරය උත්සන්නවීම නිසා බව මනුෂ නානායක්කාර ක දැන් අමතක වී තිබෙන්නේ ඔහු දැන් ගෝඨාභයගේ සපත්තු පොලිස් කරන්නා බවට පත් වී සිටින නිසා විය හැකිය.
එළඹෙන නම වෙනිදා ට සූදානම් වන්නේ ලොකු ලොකු වාහන වලට ගිනි තියන්න. දකින දකින ලොකු ගෙවල් වලට ගිනි තියන්න. ඇති මිනිස්සු ටික නැති කරන්න. අරගලයේ අරමුණ මනුෂ නානායක්කාර දකින්නේ එහෙමයි.
ඉදිරි 9 වනදා පිළිබඳව ඔහු ප්‍රකාශ කරන්නේ දහස්ගණනක් රටේ මිනිස්සුන්ව මරලා, මරණ මතින් බලයට එන්න දේශපාලනගේමක් සැකසෙන බවයි.කවුරුහරි බලයට එන්න පාස්කු ප්‍රහාරය පාවිච්චි කලානම් ඒකයි මේ දැන් විපක්ෂය කරන එකයි අතර කිසි වෙනසක් නෑ කියලත් ඔහු කියනවා. නමුත් මනුෂ්‍ය ට නැවත අමතක වෙනවා පාස්කු ප්‍රහාරය ගෝඨාභය රාජපක්ෂ බලයට එන්න පාවිච්චි කලා කියලා මම පසුගිය කාලේ කළ විවේඡනය. හෙල්මට් කල්ලියක් පිළිබඳවද ඔහු ප්‍රකාශ කරනවා. මේ කරන්නේ රාජපක්ෂගේ හෙල්මට් කල්ලිය පිළිබඳව විය හැකියි.පසුගිය අවස්ථා ගණනාවක ම හෙල්මට් දාගත් හෙල්මට් අතින් ගත් පුද්ගලයෙක් මිනිසුන්ට පහර දී තුවාල සිදුකර බරපතළ හානි සිදු කර පලා ගියේ ඔය මනුෂ්‍ය කියන ආකාරයටමයි. බලය හොබවන පක්ෂයේ ඉඳගෙන මනුෂ නානායක්කාර පාර්ලිමේන්තුවේ දී කියන්නේ කියන්නේ මේවා පරීක්ෂණ කරලා හොයන්න ඕන කියලා.මනුෂට අපි කියනවා කරුණාකරලා බලය තියෙන්නෙ උඹලට උඹලා හොයපල්ලා. කවුද මේ මිනීමරු හොර කල්ලි කියන එක.
හෙට දවසේ කුමක් හෝ සිදු වුණොත් මැරෙන්න වෙන්නේ ග්‍රහ ලෝකෙන් ආපු කාටවත් නෙමෙයි රටේ ඉන්න ජනතාවට ඔබේ තාත්තට ඔබේ සහෝදරයාට ඔබේ මල්ලිට වෙන්න පුළුවන්. රටේ ජනතාවට මනුෂ නානායක්කාර කියන්නේ නම වෙනිදා විරෝධතාවයට ඒකරාශී නොවී සිටින්න කියන පණිවිඩයයි.
මනුෂ කියන මේ කතාව ඉතා වැදගත්. අවධානයෙන් සිටිය යුතුයි. එක ඉන්ධන පිරවුම් හලක් ගාවින් ගිනි ඇවිලුනොත් මුළු රටම ගිනි ගන්නවා. මනුෂ්‍ය අමතක කරනවා පසුගිය දිනක ඉන්ධන බවුසරය ට ගිනි තියන්න ගිය පුද්ගලයා ආරක්ෂක අංශ සමග සිට පැමිණි කෙනෙකු බව. දිනම ඉන්ධන පිරවුම්හලට ගිනි තියන්න ගිහින් සාමාන්‍ය ජනතාව තමයි එම විනාශය වළක්වා ගත්තේ. මෙතෙක් වාර්තා වී තිබෙන කිසිදු ප්‍රචණ්ඩ ක්‍රියාවක් සාමාන්‍ය ජනතාව අතින් හෝ අරගලයට මූලිකත්වය දෙන කිසිදු පුද්ගලයෙක් අතින් සිදුවී නැහැ. යම් සිදුවීමක් සිදු වුනා නම් ඒ සියලුම සිදුවීම් ආණ්ඩුව පාර්ශ්වයෙන් හෝ ආණ්ඩුවට සම්බන්ධ කුමන හෝ තැනක සැකයක් ඉතිරි කරමින් නිර්මාණය කරපු විනාශයන්.
මනුෂ නානායක්කාර මේ පාර්ලිමේන්තු කථාව තුළ ඉතා භයංකර චිත්‍රයක් නිර්මාණය කරනවා එළඹෙන 9 වෙනිදා ජනතා පෙළගැස්මට එරෙහිව. ඔහු පූර්ව නිගමනය ඉන්න බව පේනවා 9 වෙනිදා ගැටුම්කාරී තත්ත්වයක් නිර්මාණය වෙයි කියා .ඒ තුළ මිනීමැරුම් , දේපළ හානි සිදු වේවි, නන්නාදුනන කල්ලි කණ්ඩායම් එදාට ක්‍රියාත්මක වේවි කියා.
මනුෂ මේ කළු චිත්‍රය ජනතා මනස මත අඳින්නෙ ආරක්ෂක ලේකම් සහ පොලිස්පති ඔය කියන ආකාරයේ ගැටුමක් පිළිබඳව සකසා තිබෙන පිටපතක් හෙළිදරව් කළ දිනට පසුදින වීම නිසාම ඔහුගේ කතාව අර පිටපතේ ම කොටසක් ද කියන සැකය සහිත ව සිතන්න අපිව පොලඹවනු ලබනවා. අරගල කරුවන් සහ පීඩාවට පත් වී සිටින රටේ ජනතාව එක්ව ගෝඨාභය රාජපක්ෂ සහ රනිල් වික්‍රමසිංහ ආණ්ඩුව පන්නා දැමීමට පුළුල් ජන බලයක් ගොඩ නැගෙමින් තිබෙන මොහොතක මෙවැනි ඉඟි පළ කිරීම පූර්ව නිගමන ඉදිරිපත් කිරීම ද සැක සහිත ව විමර්ශනය කර ගත යුතුයි.
අවසාන වශයෙන් මනුෂ්‍ය ට මතක් කර දිය යුතු කරුණක් තිබේ. මැයි නම වෙනිදා රට තුළ ගැටුම්කාරී තත්ත්වයක් නිර්මාණය කළේ තමන් දැන් ආරක්ෂා කරන රාජපක්ෂලා බවත් තමන් ලෙවකමින් සිටින පොහොට්ටුවේ සගයන් බවත් මතක තබා ගත යුතුයි. මේ මොහොත එළඹෙන තුරු රටේ ජනතාව කිසිදු ප්‍රචණ්ඩකාරී ක්‍රියාවකට ගියේ නැති බව මනුෂට දැන් අමතක වී තිබෙන්නේ රාජපක්ෂගේ රෙදි හෝදන්න කැමැත්තෙන්ම තෝරා ගත් හින්දා වෙන්නට ඇති.
-
විසිදෙවන ව්‍යවස්ථා සංශෝධනය පිළිබඳව “ප්‍රතිසංස්කරණ සඳහාවූ සාමූහිකයේ” ප්‍රවෘත්ති නිවේදනය
“ප්‍රතිසංස්කරණය සඳහාවූ සාමූහිකය” පසුගිය සති කිහිපයේදී ශ්‍රී ලංකාවේ පාර්ලිමේන්තුවේ සියලුම දේශපාලන පක්ෂ මුණගැසී, දැනට ගාලු මුවදොර අත්දකින සහ ශ්‍රී ලංකාව පුරා පැතිරී ඇති අරගලයන්, ආර්ථික දුෂ්කරතා, ජනතාව මුහුණදෙන දරිද්‍රතාවයන්ට මූලිකවූ දේශපාලන හා ආර්ථික ක්‍රියාවලීන් සාකච්ඡා කළෙමු.
රජයේ දේශපාලන ප්‍රතිපත්ති, තීරණ, ක්‍රියාවලීන් නිසා රට විනාශමුඛයට පත්ව ඇති බවත්, එම සංකූලතාවනට පිළියම් සෙවීමේදී ආර්ථික ප්‍රතිකර්ම මෙන්ම, රාජ්‍යකරණය හා සඵල, ප්‍රජාතන්ත්‍රවාදී, වගවන පිළියම් සඳහා නෛතික හා ව්‍යවස්ථානුකූලව ප්‍රතිසංස්කරණයන් කළයුතු බවත් පැහැදිලිය. ඒ ගැන අප සාමූහිකයේත්, සමගාමී එවන් කර්තව්‍යයෙහි නියැලී සිටින අන් සංවිධාන හා ක්‍රියාකාරීන් තිහකට අධික කුලකයක් සමගින් දීර්ඝ සංවාදයන් භෞතිකව හා සූම් තාක්ෂණය හරහාත් පැවැත්වූයෙමු.
රජයේ ව්‍යවස්ථා ප්‍රතිසංස්කරණය 2022-05-29 දින ගැසට් පත්‍රයකින් ඉදිරිපත්වුයේ 22 වන ව්‍යවස්ථා සංශෝධන කෙටුම්පත නමිනි. ඉන් පෙර ජනාධිපතිතුමා 2022-05-11 දින ජාතිය ඇමතුවිට පාර්ලිමේන්තුවට වඩා බලතල ලැබෙන ආකාරයට දහනවවන සංශෝධනයේ අන්තර්ගත දෑ නැවත බලාත්මකවන පරිදි “ව්‍යවස්ථා සංශෝධනයක්” කිරීමට බලාපොරොත්තුවන බව පැවසීය. නව අගමැතිවරයෙකු පත්කොට, රට ස්ථාවරභාවයට පත්වූ පසු ජනාධිපති ධුරය අවසන් කිරීමට හැකි බවද එතුමා එදින පැවසීය. එහෙත් ඉදිරිපත්වී ඇති 22 වන ව්‍යවස්ථා සංශෝධනය සමගින් එතුමා අසත්‍ය ප්‍රකාශයෙකු වීදැයි විමතියක් ඇතිකෙරේ. තවද, මේ කෙටුම්පත දුටුවිට ජනාධිපතිතුමාගේ ‘සම්මා සතිය’ කෙනෙකු ප්‍රශ්න කිරීමට ඉඩක් ඇත්තේ එමගින් දහනවය සිදබිඳ ඇතිහෙයිනි.
අප සාමූහිකය විසින් අංශ එකොලහක් පාදකව අර්බුදයට වහාම පිළියම් සැපයීමේ පළමු පියවර ලෙස කරුණු එකොලහක් ඇතුළත් යෝජනාවලියක් ත්‍රෛනිකායික මහානායක හිමිවරුන් ඇතුළු මහා සංඝරත්නයටත්, අන්‍ය ආගමික නායකයින්ටත්, කලින් පැවසූ දේශපාලන බලධාරීන්ටත් පිලිගැන්වුණි. එම ක්‍රියාදාමය නිමා වුයේ පසුගිය සතියේ අගමැතිතුමන් සමගවූ සංවාදයකිනි. මෙකී හමුවීම්වලදී අප සාමූහිකයට ඔවුන්ගේ ඇගයීමද පිදිනි.
මේ අතර සමගි ජන බලවේගය කලින්ම ව්‍යවස්ථා යෝජනාවලියක් පාර්ලිමේන්තුවට ඉදිරිපත් කළ නමුදු අධිකරණයේ සීමාවන්ට එය යටත් විය. ඒවාද අප අවධානයට හා අධ්‍යයනයට ලක්විණි. අන් දේශපාලන කණ්ඩායම්ද, වෙන් වශයෙන් තවත් ව්‍යවස්ථාමය හා රාජ්‍යකරණ ස්ථාවරයන්ගේ පිහිටා සිටිති. අප සාමූහිකයට අයත් නොවූ තවත් සිවිල් සමාජ කණ්ඩායම්ද ව්‍යවස්ථාමය හා අන් ක්‍රියා මාර්ග සද්භාවයෙන් ඉදිරිපත් කරති. කෙසේවුවද, අප සැමගේ ඒකායන අරමුණ වී ඇත්තේ පවත්නා ආර්ථික දුර්දාන්තය, දේශපාලනික, ආර්ථික හා රාජ්‍ය කළමනාකරණයෙනුත්, දූෂණය පිටු දැකීමෙනුත්, නෛතිකවත්, නීතියේ ස්වාධිපත්‍යය රැකගැනීමෙනුත් ජයගත යුතු බවය.
මෙම ක්‍රියාමාර්ගවල අවශ්‍යතාවය අන්තර්ජාතික මූල්‍ය අරමුදල ඇතුළු අන් බහුපාර්ශවීය මූල්‍ය හා ආධාර කරන කණ්ඩායම්හි සහ බලවත් රාජ්‍යයන්ගේ ප්‍රකාශවලද හුයක් සේ දිවෙයි. එහෙත්, ජනාධිපතිතුමාගේ උපුටන ලද ප්‍රකාශ හා අන් බලගතු මැදිහත්වීම් හොඳින් දන්නා රජයෙන් ඉදිරිපත්වුණු 22 ව්‍යවස්ථා සංශෝධනය, යහ රාජ්‍යකරණය හා ව්‍යවස්ථාමය අපේක්ෂාවන්ට විලංගු දමා, අරගලයේ යෙදෙන, නොයෙදෙන, දරිද්‍රතාවයෙන් පෙලෙන ජනතාවගේ ප්‍රජාතන්ත්‍රීය, රාජ්‍යකරණ අපේක්ෂා භංග කර ඇත.
වත්මන් ජනාධිපතිතුමාගේ රාජ්‍යකරණ සමයේ එතුමාම පිළිගෙන ඇති අන්දමටම විධායක බලය යටතේ ගත් ක්‍රියාමාර්ග නිසා රට දුර්දාන්ත භාවයට පත්ව සිටින හෙයින් විධායක ජනාධිපති ක්‍රමය හා බැඳුනු බල සංකේන්ද්‍රණය තර කළ 20 වන සංශෝධනය මකා දැමීමට වන දැඩි ඉල්ලීම ඉතා සාධාරණය. එහෙයින් 22 වන ව්‍යවස්ථා සංශෝධනයෙන් එම තත්ත්වය අකාමකා දැමීම අපේක්ෂා කළෙමු. එහෙත්, දක්නට ඇත්තේ ජනාධිපති බලය තවත් තර කෙරෙන තත්ත්වයකි. මේනිසා, අප සාමූහිකය 22 වන ව්‍යවස්ථා සංශෝධන යෝජනාවට අපගේ දැඩි අනනුකූලතාවය, විරෝධය හා ප්‍රතික්ෂේපය ප්‍රකාශ කරමු. මෙම තීරණයට එළඹුණේ රජයේ ස්ථාවරයන්ගෙන් මදක් හෝ බැහැරවීමට රජයේ අධිකාරීන් දක්වන අකර්මන්‍ය ස්වභාවයද, ජනාධිපතිවරයා ඉල්ලා අස්විය යුතුයයි රට පුරා හා දේශ දේශාන්තර සියලුම ඩයස්පෝරාවන් මහ හඬ නගන අවස්ථාවක, ඔහු තනතුරකට අරක්ගෙන සිටීමට ගන්නා මේ ව්‍යංග, වක්‍ර තැත අභව්‍ය හෙයිනි. එයට ආධාරක වීම ශ්‍රී ලාංකීය දිලින්දන්ගේ නාමයෙන් මහා පාපකර්මයකි. අපි ඊට අත් නොඔසවමු.
රටේ දුර්දාන්ත ස්වභාවය හා නෛතික අනනුතාවයන් මත 22 වන ව්‍යවස්ථාවට සහාය දීම වෙනුවට විකල්ප දෙස බැලුවෙමු. අධිකරණයේදී බාධාවන් නොමැති, රාජ්‍යකරණය ප්‍රජාතන්ත්‍රවාදීව, ආර්ථික වර්ධනයට මගපාදන ව්‍යවස්ථාමය තත්ත්වයක්, ක්ෂණිකවම නිර්මාණය කළ හැක්කේ 19 වන ව්‍යවස්ථා සංශෝධනය මගිනි. එකී ලක්ෂණ සහිත රාජ්‍යකරණයක් නොමැති වුවහොත් රට ගොඩනැගීමට අවශ්‍ය විදේශ සම්පත් ලබාගැනීමට අපහසුද වේ.
19 ව්‍යවස්ථාව සම්මතවූ අවස්ථාවේ ජාත්‍යන්තරය සාධනීයව, සන්තුෂ්ටිය හා ඇගයීම පිරිනැමීය. එය නැවත දිනාගැනීමට නම් 20 වනසංශෝධනය කුරුටුගා, දළ කැඩීමෙන් දුබලවූ 22 වන ව්‍යවස්ථා කෙටුම්පත සම්මත කිරීමේ යෝජනාව ඉවතලා 19 වන ව්‍යවස්ථා සංශෝධනය නැවත කරලියට ගෙන ඒමට අපි යෝජනා කරමු. එමගින් වියයුතු උච්චතම අපේක්ෂාවන් සියල්ලම සාක්ෂාත් නොවුවද, වැඩි ස්වාධීන රාජ්‍යකරණයක්, නෛතිකව ඉටුකර ගත හැක්කේ, දැනටමත් එයට ශ්‍රේෂ්ඨාධිකරණ අනුමැතිය ලැබී ඇති හෙයින් හා වර්තමාන රජයේ හා විපක්ෂයේ අතිබහුල සංඛ්‍යාවක් 19 වන සංශෝධනය සමග 2015 දී සාධනීයව සිටි හෙයිනි.
සමාජයේ පිළිගත් අදහස වී ඇත්තේ 19 වන ව්‍යවස්ථා ප්‍රතිපාදන තවදුරටත් ශක්තිමත් කළ යුතු බවය. 2015 කාල පරිච්චේදයේදී සමාජය අත්දුටු ඍණාත්මක සිද්ධීන් ඊට හේතුවී ඇත. ඒ සඳහා 19 වන සංශෝධනය යලි ස්ථාපනය ආරම්භක පියවරක් ලෙස සලකමු. තවද අන්තර් ජාතික මූල්‍ය අරමුදල හා ආධාර දෙන ආයතන හා විදේශීය ඉල්ලීම්ද ඒ සමග සැසඳේ. දුබල ලෙස ඔවුන්ද, අපද හඳුනාගන්නා අංශයන් ගැන අප සාමූහිකය ඉදිරිපත් කළ මූලික යෝජනා එකොළහ තුළ පිළියම්ද ඇත. ඒවා වහාම නීතිගත හෝ ව්‍යවස්ථාගත කිරීමට සෑම උත්සාහයක්ම දරන අතර, ඉදිරි ප්‍රශ්නාභිමුඛ කාල පරිච්චේදයේදී නොහැකි වුවහොත්, ඊළඟට පිහිටුවන රජයකින් එය ඉටුකර ගැනීම අප සාමූහිකයේ බලාපොරොත්තුවයි.
දුෂ්කර කාල පරිච්ඡේදයකට මුහුණපා ඇති රට ගලවා ගැනීම දැන් අත්දකින අන්දමේ දේශපාලන ධ්‍රැවීකරණයෙන් විසඳිය නොහැකිය. ජාතියේ හා දිළිඳුබවින් විනාශයේ දොරකඩට පත්ව, මහෝඝයක ගිලීමට යන ජනතාව ගලවා ගැනීම වෙනුවට, තම පක්ෂ සාමාජිකත්වය හෝ නායකයින් හා ඔවුන්ගේ හිතෛශීන් පමණක් ගලවා ගැනීම දේශපාලන පක්ෂ සියල්ලම ප්‍රතික්ෂේප කළ යුතුය. රජයේ 22 වන ව්‍යවස්ථා වෑයම එවැනි ඍණාත්මක උත්සාහයකට මනා උදාහරණයකි. තෝරාගත් පුද්ගලයින් සඳහා නොව ජනතාව සදහා ව්‍යවස්ථා නිමවිය යුතුය. එහෙයින් ජාතියේ, ජනතාවගේ, උපන් නූපන් ශ්‍රී ලාංකික දැරූ මුණුපුරන්ගේ නාමයෙන් වත්මන් රජය වෙනුවට, නිශ්චිත කාල පරිච්චේදයකට හෝ සර්ව පාක්ෂික රජයක් පිහිටුවා, එම කාලය අවසානයේදී මහ මැතිවරණයක් මගින් නව රජයක් පිහිටුවීම සුදුසුයි අපි යෝජනා කරමු.
මෙම දෘඪ වගකීම එසේ ක්‍රියාත්මක නොකළහොත් කල් නියම නොකළැකි ඉතා නුදුරු අනාගතයේදීම දරිද්‍රතාවයෙන් පෙලෙන ජනතාව බලධාරීන් පලවා හැරීමට හා මැයි 09 වන දින වුවාට වඩා අතිශය මහා විනාශයන් කිරීමත් වැළැක්විය නොහේ. එමනිසා, ආර්ථික, සාමාජික හා දේශපාලනික අර්බුදයට තිරසාර පිළියම් යෙදීම වහාම ආරම්භ කළ යුතුය. කල් මැරීමට නොහැකිය. අවංකව, නෛතිකව, යහ රාජ්‍යකරණය ඉටුනොවුනහොත්, අපට ශ්‍රී ලංකාවයැයි පැවසීමට දේශයක් ඉතිරි නොවනු ඇත. මෙම සත්‍යයට ජනාධිපතිතුමා ඇතුළු වත්මන් රජයටත්, විපක්ෂයේ සියලුම දේශපාලන අධිකාරීන්ටත්, රජය මෙහෙයවන පරිපාලනය හා හමුදා, පොලිසිය වැනි ආයතයනටත් සාක්ශ්‍යාත් වේවා යන්න අපේ පිවිතුරු පැතුමයි; අවධාරණයයි. එය සිදු නොවුවහොත් අපේ විනාශයයි.
-
යාල විනාස කරන මැණික් ජාවාරම්කරුවෝ පිටුපස ඉන්නේ දේශපාලකයෝ
නිලධාරීන් නිහඬ ව සිටිය දී යාල ජාතික වනෝද්‍යානය මැණික් ව්‍යාපාරිකයන් වනසයි
යාල නැතහොත් රුහුණු ජාතික වනෝද්‍යාන සංකීර්ණයේ කලාප අංක 4 හි කුඹුක්කන්ඔය ආශ්‍රිත කයිලකුඹුර ප්‍රදේශයේ දැවැන්ත මැණික් කැනීම් ජාවාරමක් ක්‍රියාත්මක වේ. ඔක්කම්පිටිය ප්‍රදේශයේ මැණික් ව්‍යාපාරිකයන් කිහිපදෙනෙකු ගේ මෙහෙයවීම යටතේ සේවකයන් 300 ක් පමණ යොදා ගෙන ජාතික වනෝද්‍යානයේ අක්කර සියයක් පමණ විනාශ කර මෙම ජාවාරම සිදු කෙරේ. බැකෝ යන්ත්‍ර හා යාන්ත්‍රික මැණික් ඉල්ලම් සේදුම් යන්ත්‍ර භාවිත කර සංවිධානාත්මක ව මෙම ජාවාරම ක්‍රියාත්මක කරයි.
මෙම නීතී විරෝධී ක්‍රියා හේතුවෙන් අලි – ඇතුන්ට ජාතික වනෝද්‍යානය තුළ ම රැකවරණය අහිමි වී එම සතුන් අවට ගම්මානවලට හා වගා බිම්වලට පිවිසීමෙන් අලි – මිනිස් ගැටුම් අලුතින් නිර්මාණය විය හැකි ය. එපමණක් නොව උග්‍ර නියං සමයක් පවතින මෙම කාල වකවානුව තුළ කුඹුක්කන්ඔයට මැණික් ඉල්ලම් සේදීමේ දී එක් වන අධික රොන්මඩ හේතුවෙන් එහි ජෛව ප්‍රජාව සම්පූර්ණයෙන් ම විනාශ වී යනු ඇත.මෙම සියලු ක්‍රියාවන් සිදු කරන්නේ වන සත්ත්ව හා වෘක්ෂලතා ආරක්ෂක ආඥා පනත උල්ලංඝනය කරමිනි. මෙම පනතේ 2 වන වගන්තියට අනුව 1969 ඔක්තොම්බර් මස 9 වන දින අංක 14875 දරන ගැසට් නිවේදනයට යටතේ හෙක්ටයාර 26418 ක් වන යාල ජාතික වනෝද්‍යානයේ කලාප අංක 4 ප්‍රකාශයට පත් කර තිබේ. මෙම පනතේ 5 වන වගන්තියට අනුව බලපත්‍රයක් නොමැති ව ජාතික වනෝද්‍යානයට ඇතුළු වීම ද නීති විරෝධී වෙයි. පනතේ 6 වන වගන්තියට අනුව ජාතික වනෝද්‍යානයේ ශාක විනාශ කිරීම, ඉඩම් එළි කිරීම, පතල් හෑරීම ඇතුළු සියලු ක්‍රියාවන් නීති විරෝධී වේ.
පනතේ 67ආ1 උප වගන්තියට අනුව ජාතික වනෝද්‍යානයක ඕනෑ ම නීති විරෝධී ක්‍රියාවක නිරත වන පුද්ගලයකු වරෙන්තුවක් නොමැතිව අත් අඩංගුවට ගත හැකි ය. එම ක්‍රියාවල නිරත වූ පුද්ගලයන්ට වනජීවී සංරක්ෂණ දෙපාර්තමේන්තුවේ නිලධාරීන්ට ඇප ලබා දීමේ හැකියාව නොමැති අතර පනතේ 63 වන වගන්තියට අනුව මහේස්ත්‍රාත් අධිකරණයක් වෙත ඉදිරිපත් කළ යුතු ය. මහේස්ත්‍රාත් අධිකරණයක් ඉදිරියේ වරදකරුවකු කරනු ලබන පුද්ගලයකුට රුපියල් විසි දහසත් ලක්ෂයත් අතර දඩයකට හෝ වසර 2 ත් 5 ත් අතර බන්ධනාගාර ගත කිරීමකට හෝ මෙම දඩුවම් දෙකට ම යටත් කළ හැකි ය.
එපමණක් නොව එම වරද නැවත අවස්ථාවක දී සිදු කර අධිකරණයෙන් වරදකරුවකු කරනු ලැබූ විට රුපියල් හතලිස් දහසත් ලක්ෂ දෙකත් අතර දඩයකට හෝ වසර 5 ත් 10 ත් අතර බන්ධනාගාර ගත කිරීමට හෝ මෙම දඩුවම් දෙකට ම යටත් කළ හැකි ය. මෙම පනතේ 59 වන වගන්තියට අනුව ජාතික වනෝද්‍යානයක නීති විරෝධී ක්‍රියාවක නිරත වීමට ආධාර හෝ අනුබල ලබා දෙන තැනැත්තෙකු ද එම වරදට ම වරදකරුවකු වන්නේ ය.නමුත් ඉන්දන අර්බුධයට මුහුණ දී සිටින වනජීවී සංරක්ෂණ දෙපාර්තමේන්තුවේ නිලධාරීන්ට නීති විරෝධී ක්‍රියාවල නිරත පුද්ගලයන් අත් අඩංගුවට ගෙන මෙම නීතී ක්‍රියාත්මක කිරීමට මෙහෙයුම් සිදු කිරීමට නොහැකි වී තිබේ. එහෙත් ජාවාරම්කරුවන් ඔක්කම්පිටිය ප්‍රදේශයේ ඉන්දනහල් වලින් ඉන්දන ලබා ගෙන අඛණ්ඩ ව ජාතික වනෝද්‍යානය විනාශ කරමින් මැණික් ජාවාරමේ නිරත වේ.
වනජීවී සංරක්ෂණ දෙපාර්තමේන්තුව අත්‍යවශ්‍ය සේවා යටතට එක් කර ප්‍රමාණවත් පරිදි වාහනවලට ඉන්දන ලබා නොදීම නිසා මෙම ජාවාරම්කරුවන් අත් අඩංගුවට ගෙන නීති ක්‍රියාත්මක කිරීමට නොහැකි ව තිබේ. එහෙත් වනජීවී සංරක්ෂණ දෙපාර්තමේන්තුවේ ඉහල නිලධාරීන් මේ සඳහා මැදිහත් නොවීම නිසා පොලීසියේ හා විශේෂ කාර්යය බලකායේ උදව් මත මෙම ජාවාරම මැඩලීම සඳහා යොමු වීමට ද නොහැකි වී ඇත.අලි – ඇතුන් ඇතුළු ව ඉතා විශාල ජෛව ප්‍රජාවකට වාසස්ථාන සපයන මෙරට සුවිශේෂී ම ජාතික වනෝද්‍යාන සංකීර්ණය තුළ මේ තත්ත්වය ඇති වී තිබීම හා එම තත්ත්වය පාලනය කිරීම සඳහා නිලධාරීන්ට හැකියාව නොමැති වීම කණගාටුවට කරුණකි. සංවිධානාත්මක ව සිදු කරන මෙම ජාවාරම මැඩ පැවැත්වීම සඳහා අදාළ සියලු අංශවල මැදිහත්වීම ලබා දිය යුතු බව විශේෂයෙන් අවධාරණය කළ යුතු ය. එසේ නොමැති වුවහොත් නීතියේ ආධිපත්‍යය අහිමි කිරීම, ප්‍රජාතන්ත්‍රවාදී ව්‍යුහය බිඳ දැමීම, දූෂණ හා වංචා වර්ධනය කිරීමේ ප්‍රතිඵලයක් ලෙස හා එම තත්ත්වයන් මැඩපැවැත්වීමට ක්‍රියාමාර්ග නොගැනීමේ ප්‍රතිඵලයක් ලෙස දැනට දරුණු ලෙස වර්ධනය වී ඇති ආර්ථික හා දේශපාලන අර්බුදයට අමතර ව මෙම මැණික් ජාවාරම් හේතුවෙන් දැවැන්ත පාරිසරික අර්බුදයකට ද අපට ඉදිරියේ දී මුහුණ දීමට සිදු වනු ඇත.
-
දකුණේ දෙනෝදාහක් මැද්දෙ මෙහෙමනං, උතුරේ කැලෑ අස්සෙ මුං කොහොම කරන්න ඇත්ද?
අසාධාරණ ලෙස හමුදාව තම අභිමතය පරිදි ඉන්ධන ලබා ගැනීමට එරෙහිව හඬ නැගූ තරුණයකුට ජූලි තුන් වෙනිදා කුරුණෑගල දඹුල්ල මාර්ගයේ යක්ගහපිටිය ප්‍රදේශයේ ලාෆ්ස් ඉන්ධන පිරවුම් හලේ දී පහරදීමක් සිද්ධ කරනවා. මේ පහරදීම සිද්ධ කරන්නේ වැහැර කෑම්ප් එකේ හමුදා නිලධාරියෙක්. පහර දීම පිටුපස තිබෙන්නේ බලය අයුතු ලෙස යොදාගැනීමයි. තම අභිමතයට ඉඩ නොදෙන සාමාන්‍ය ජනතාවට හමුදා උෂ්ණය පෙන්වීමයි. එපමණක්ද නොව මෙය ආණ්ඩුවේ උවමනාව බවද අප තේරුම් ගත යුතුයි. තැනින් තැන මර්දනය දියත් කර ජනතාව බිය වැද්දීම මෙහි අරමුණයි. සිවිල් නීතිය ක්‍රියාත්මක කිරීමට පොලිසිය එතන සිටියදීත් මේ හමුදා නිලධාරියා ඔහුට අයත් නැති රාජකාරියක් වරා ගනිමින් තරුණයාට පහර දෙන්නේ රැස්ව සිටින ජනතාව බිය වැද්දීමට ත්‍රස්ත කිරීමට.
අපි ජනතාවගෙන් මේ මොහොතේ අහනවා, ආරක්ෂක අංශ වලට තමන්ගේ හිතුමතයට ඉන්ධන ලබා ගැනීමට ඉඩ දීමට තව දුරටත් එකඟද කියා. ඔබගේ ජීවිතය වෙනුවෙන් පෙනී සිටින සෞඛ්‍ය සේවකයන්ට අත්‍යවශ්‍ය සේවා යටතේ ඉන්ධන ටික ලබා ගැනීමට ඉඩ නොදී ප්‍රශ්න කරමින් ඉවත් කරන ඔබ ඔබව මර්දනය කරන්නට ෆුල් ටෑන්ක් ඉන්ධන ගසන මුන්ට එරෙහි වන්න බියවන්නේ ඇයි.
එපමණක්ද නොව මේ පිළිබඳව සිතා බලන්න ඉන්ධන නොමැති බව පවසා ඔබගේ දරුවාගේ අධ්‍යාපනය කඩාකප්පල් කර තිබෙනවා. ඉන්ධන නොමැති බව පවසා ඔබට රැකී රක්ෂාවක් කරන්න තිබෙන අයිතිය උල්ලංඝනය කර තිබෙනවා. අසනීපයක් හැදී ඔබගේ ජීවිතය පිළිබඳ ප්‍රශ්නයක් ඔබ හමුවට එන විට ඊට අදාළ කරන බෙහෙත් ටික ඔබට ගන්න බැරි තැනට පත් කර තිබෙනවා. රනිල් වික්‍රමසිංහ ගෝඨාභය ඇතුළු මේ ආණ්ඩුව ජීවිතය අත්‍යවශ්‍ය නොවන අනවශ්‍ය දෙයක් බව අපිට ඔප්පු කර පෙන්වා තිබෙනවා. සියලු අපහසුතා මැද නිල් වික්‍රමසිංහ ගෝඨාභය රාජපක්ෂලා ඇතුළු කණ්ඩායම ඔවුන්ගේ ජීවිතය තවමත් පෙර සේම සුව පහසුවට ගෙවමින් පසුවෙනවා.
ඒ තරුණයාට පහර දුන් හමුදා නිලධාරියා තමන්ගේ ගිනි අවිය සහ නිළ ඇඳුමේ බලය තමයි පෙන්වූයේ. ඔබ සංවිධානාත්මක ඒකරාශී වුණා නම් ඔවුන්ට ඔබගේ බලය පෙන්වන්න තිබුණා. මොවුන් ඔබට ඔබගේ ජීවිතය අහිමි කර තිබෙන මොහොතක ජීවිතයත් එක්ක සූදු කෙළින මොහොතක ඔබ මුහුණ දී සිටින අසාධාරණයට එරෙහිව නැගී සිටින ඔබගේ අනෙකාව ආරක්ෂාකිරීමට පෙනී සිටින්න. මර්දන යාන්ත්‍රණය යොදාගෙන මර්දනය කරන්නට සූදානම් වනවිට ඊට එරෙහි වන්න.
-
දකුණු ආසියානු මීටර් 100 වාර්තාව යුපුන්ම පිහිටවලා යුපුන්ම කඩලා දානවා.
ස්ටෝක්හෝම් ඩයමන්ඩ් ලීග් එකේ 04 වෙනි තැනට පත් වුණාට résisprint international එකේ දී Eliminator වටෙන් තප්. 10.11 වාර්තා කරලා, Final එකේදී තප්. 9.96ක් වාර්තා කරනවා. දකුණු ආසියාතිකයෙක් එතෙක් මෙතෙක් ඉතිහාසය තුළ ජාත්‍යන්තර තරගයක් තුළ මීටර් 100ට වාර්තා කරපු හොඳම කාලය.
විශේෂත්වය කියන්නේ මේ මීටර් 100 අවසාන තරගය තියෙන්නේ A, B, C කියලා කාණ්ඩ 03ක් යටතේ. මේ කාණ්ඩ 03න්ම හොඳම කාලය වාර්තා කරලා තියෙන්නෙත් යුපුන්. යුපුන් තරග වැදුනේ A කාණ්ඩයේ අවසන් වටයට. B කාණ්ඩයේ පළවෙනියා තප්. 10.01ක්, C කාණ්ඩයේ පළවෙනියා 10.23ක්. යුපුන්ට අභියෝගයක් වුණේ එයාගේම A කාණ්ඩයේ හිටපු Mena Reynier කියන කියුබානු ක්‍රීඩකයා එයා තප්. 9.99ක්.
දකුණු ආසියානු මීටර් 100 වාර්තාව යුපුන්ම පිහිටවලා යුපුන්ම කඩලා දානවා.මේවා තමා වාර්තා.. නියම වාර්තා.. ජාත්‍යන්තරය ඉස්සරහ රටේ නම ලියන නියම වාර්තා. මේක දැක්කාම ඇඟේ හිරිගඬු පිපුණා. මොකද මගෙත් ස්කෝල කාලේ ස්පෝට් ඉවෙන්ට් එක මීටර් 100 නිසා.
-
රටෙි විදුලි කප්පාදුවට එරෙහිවු ලිිබියානු විරෝධතාකරුවෝ එරට පාර්ලිමෙින්තුවට ගිනි තබති !
රටෙි අසීමාන්තික ලෙස කපා හරින විදුලිය
දිනපතා ඉහළයන අතවශ්‍ය ආහාරවල මිල
රටේි පවතින දේශපාලන අස්ථාවරභාවය නිසාවිරෝධතාකරුවන් ලිබියාවේ ටොබ්රුක් හි පාර්ලිමේන්තු ගොඩනැගිල්ලට කඩා වැදී එය ගිනි තබා ඇත.එක්සත් ජාතීන්ගේ සංවිධානය සහ යුරෝපා සංගමය විසින් පාර්ලිමේන්තු ගොඩනැගිල්ලට කඩා වැදී එය ගිනි තැබූ විරෝධතාකරුවන් හෙළා දැක තිබේ. විදුලි කප්පාදුව පුලුල්ව පැතිරීම මුලිකවම විරෝධතාකරුවන්ගේ කෝපයට හේතු වී ඇත.
ප්‍රදේශීය රූපවාහිනී නාලිකා වාර්තා කළේ සිකුරාදා විරෝධතාකරුවන් ටොබ්රුක් හි පාර්ලිමේන්තු ගොඩනැගිල්ලට කඩා වැදී විනාශකාරී ක්‍රියා සිදු කළ බවයි. ගොඩනැගිල්ලේ පිටතින් කළු දුමාරයේ තීරු ද පින්තූරවල දැක්වේ. පාර්ලිමේන්තුව ආරක්ෂා කරන ආරක්ෂක හමුදා එම ස්ථානයෙන් ඉවත් වූ බව ඇසින් දුටු සාක්ෂිකරුවෙකු උපුටා දක්වමින් රොයිටර් පුවත් සේවය වාර්තා කළේය.
ලිබියාව පිළිබඳ එක්සත් ජාතීන්ගේ විශේෂ උපදේශක ස්ටෙෆනි විලියම්ස්, රජයේ ගොඩනැගිල්ලට කඩා වැදීම “සම්පූර්ණයෙන්ම පිළිගත නොහැකි” ලෙස හැඳින්වූ අතර “සාමකාමීව විරෝධතා දැක්වීමට ජනතාවගේ අයිතියට ගරු කළ යුතු අතර ආරක්ෂා කළ යුතු” බව අවධාරනය කළාය. ඇය සෑම පැත්තකින්ම “සංයමය” ඉල්ලා සිටියාය.
ලිබියාවේ යුරෝපා සංගමයේ නියෝජිත කණ්ඩායම් ප්‍රධානී ජෝස් සබාඩෙල් සෙනසුරාදා පැවසුවේ “විරෝධතා සාමකාමීව සිදු කළ යුතු අතර ඕනෑම ආකාරයක ප්‍රචණ්ඩත්වයකින් වැළකී සිටිය යුතු” බවත්, “බිඳෙනසුලු තත්ත්වය අනුව විශේෂ සංයමයක් අවශ්‍ය බවත්ය ‘‘
ඒ අතර ට්‍රිපොලි හි ප්‍රාණ පරිත්‍යාගික චතුරශ්‍රයේ, වසර ගණනාවක් තිස්සේ පාලක ප්‍රභූවට එරෙහිව අගනුවර පැවති විශාලතම විරෝධතාවන්හි දී, සන්නද්ධ කන්ඩායම් සහ දේශපාලනඥයන් විවේචනය කරමින් වහා මැතිවරනයක් සහ විදුලිය ඉල්ලා සටන් පාඨ කියමින් දහස් ගනනක් ජනයා රැස්ව සිටියහ.
ලිබියාවේ ජාතික එකමුතුවේ රජයේ ප්‍රධානී අබ්දුල් හමීඩ් ඩ්බෙයිබා කියා සිටියේ තමන් විරෝධතාකරුවන්ට සහාය දක්වන බවයි. රජය ඇතුළු සියලුම ආයතනවලින් ඉවත් වන ලෙස ඉල්ලා සිටි ඔහු එය කළ හැක්කේ “මැතිවරණයෙන්” පමණක් බව ද පැවසීය. -
IMF – ශ්‍රී ලංකා සාකච්ඡා පිළිතුරක් නොමැතිව අවසන් වේ! – CNBC වෙබ් අඩවිය
ජාත්‍යන්තර මූල්‍ය අරමුදල ශ්‍රී ලංකාව සමග පැවැත්වූ සාකච්ඡා අවසන් කොට ඇත්තේ දින 10කට පසුවද ණය පැකේජයක් පිළිබද අවසන් තීරණයකට එළැඹීමට නොහැකිවයි.
කෙසේ නමුත් පසුගිය බ්‍රහස්පතින්දා IMF විසින් නිකුත් කළ මාධ්‍ය ප්‍රකාශයට අනුව ජුනි මස 20 වෙනිදා ආරම්භ වූ සාකච්ඡා මාලාව තවදුරටත් සිදු කරගෙන යාමට ඔවුන් පොරොන්දු වී ඇත. ඒ අනුව විස්තීර්ණ අරමුදල් පහසුකමක් (Extended Fund Facility – EFF) ලබා දීමට ඇති හැකියාව පිළිබද තවදුරටත් සාකච්ඡා කරන බව IMF ප්‍රකාශ කරයි.
අන්තර්ජාතික මූල්‍ය අරමුදලට අනුව EFF පහසුකම නිර්මාණය කර ඇත්තේම බරපතල ගෙවුම් ශේෂ අසමතුලිතතාවයන් පවතින රටවල් වලට සහය වීම සදහායි. එමගින් දීර්ඝ කාල සීමාවක් තුළ පැවති ව්‍යුහාත්මක අසමතුලිතතාවයන් නිවරැදි කරගැනීමට අවශ්‍ය වන ප්‍රතිපත්ති වලට සහය වීම සිදු කරයි.
සතියකට පමණක් ප්‍රමාණවත් වන ඉන්ධන තොග පවතින සහ ඉන්ධන රැගත් නෞකා පැමිණීමට අවම වශයෙන් සති දෙකක කාලයක්වත් ගතවන තත්ත්වයක් තුළ ශ්‍රී ලංකාව විසින් ඉන්ධන සැපයීම සීමා කර ඇති බවත් ඒ අනුව බස්, දුම්රිය සහ සෞඛ්‍ය සේවාවන්ට සීමිත සැපයුම් ලබා දීම සිදු කරන බවත් රොයිටර් පුවත් සේවයද වාර්ථා කර තිබුණි.ශ්‍රී ලංකාවේ ණය තිරසාර නොවන බවට වන තක්සේරුව පිළිබදවද සදහන් කරමින් IMF ප්‍රකාශ කර සිටින්නේ විධායක මණ්ඩලයේ අනුමැතිය සහිත පැකේජයක් සදහා ණය තිරසාරත්වය යළි පිහිටුවන බවට ශ්‍රී ලංකාවේ ණයහිමියන් විසින් ලබා දෙන ප්‍රමාණවත් මූල්‍ය සහතිකයක් අවශ්‍ය වන බවයි. මෙවැනි සන්දර්භයක් තුළ සාකච්ඡාවන් මගින් ඉලක්ක කරනුයේ සාර්ව ආර්ථික අසමතුලිතතාවයන් නිවරැදි කිරීම, ණය තිරසාරත්වය ඇති කිරීම සහ ශ්‍රී ලංකාවේ වර්ධන හැකියාව අවබෝධ කර ගැනීම සදහා වන සවිස්තරාත්මක ආර්ථික වැඩසහටහනක් නිර්මාණය කර ගැනීමටයි යනුවෙන් මාධ්‍ය ප්‍රකාශය තුළ වැඩිදුරටත් සදහන් විය.
‘බිඳවැටෙනසුළු රාජ්‍ය’CNBC වෙත සිය අදහස් ඉදිරිපත් කළ ජෝර්ජ්ටවුන් විශ්වවිද්‍යාලයේ මාහාචාර්ය ශාන්ත දේවරාජන් ප්‍රකාශ කර සිටියේ IMF සමග එකඟතාවයකට පැමිණීමට ශ්‍රී ලංකාව ආසන්න බවයි.
“ජාත්‍යන්තර මූල්‍ය අරමුදල සමග අයවැය හිගය පහල දැමීමට සහ ණය තිරසාරත්වය ඇති කිරීමට අවශ්‍ය ප්‍රතිපත්තීන් සහ වැඩසටහන් කීපයක් සම්බන්ධයෙන් කාර්ය මණ්ඩල මට්ටමේ එකඟතාවයක් ඇති කර ගැනීමට ශ්‍රී ලංකාව ඉතා ආසන්න බව ” දේවරාජන් CNBC හි “Squawk Box Asia” වැඩසටහනට එක් වෙමින් පැවසීය.
වත්මන් අර්බුදයේ මූලය ලෙස ඔහු ඉදිරිත් කරන්නේ වසර තුනකට පෙර සිදු කළ බදු කපා හැරීමයි. ” අප දැන් මේ ඇති වී තිබෙන අවුලට හසු වී සිටින්නේ 2019 නොවැම්බර් වලදි රජය විසින් බදු විශාල ලෙස කපා හැරීම නිසයි. එකතු කළ අගය මත බදු (VAT) අනුපාතය 15% සිට 8% දක්වා පහත දැමු බව” දේවරාජන් CNBC වෙත ප්‍රකාශ කරන ලදි. ඔහු වැඩිදුරටත් ප්‍රකාශ කළේ රට බිදවැටෙනසුළු රාජ්‍යක් බවට පත් වීමේ එළිපත්තේ සිටින බවයි.
” මේ වන විට බිදවැටෙනසුළු රාජ්‍යයක සියලුම ලක්ෂණ එය සතු වේ. මහ පාරේ ඇතිවන විරෝධතා පමණක් නොව ඉන්ධන සදහා පෝලීම්ද පවති. බොහෝ ස්ථාන වල පොලිසිය සහ හමුදාව සමගද ගැටුම් ඇති වෙමින් පවතින බව තවුරටත් ඔහු ප්‍රකාශ කරන ලදි.”
“මිනිසුන් මරණයට පත් වී ඇත; ඇතැම් තැන් වලින් වෙඩි තැබීම්ද වාර්ථා වේ. මෙය ඉතාමත් භයානක තත්ත්වයක්.” -
ඩොලර් අර්බුදයේ මූලය තියෙන්නෙ රනිල්ගේ රෙද්ද අස්සේ
වර්තමාන අර්බුදයේ රනිල් වික්‍රමසිංහගේ ක්‍රියාන්විතය පිළිබඳව පසුගියදා පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ පැහැදිලි කිරීමක් සිද්ධ කළා. උද්ගතව ඇති ඩොලර් හිඟයට පාර කපන රනිල්ගේ සැලැස්ම නිර්මාණය වෙන්නෙ කොතනින්ද? ඒ සඳහා රනිල්ගේ දායකත්ව ක්‍රියාවලිය සිදුවන්නේ කෙසේද යන්න කියන එක පිළිබඳව එහිදී හෙළිදරව් කෙරුවා. රනිල් වික්‍රමසිංහ කියන්නේ මේ රටේ දූෂිත පාලන යාන්ත්‍රණය ආරක්ෂා කරන එවගේම විදෙස් රටවල් වලට ලංකාවේ සියල්ල පවරා දෙන්න සැලසුම් නිර්මාණය කරන විදෙස් බලවත් රාජ්‍යවල රූකඩයක්.
1953 අංක 24 දරන විනිමය පාලන පනත රනිල් වික්‍රමසිංහ යහපාලන ආණ්ඩු සමයේ දී අහෝසි කරනු ලබනවා. මේ පනත මගින් කරනු ලැබූවේ අපනයන ආදායම් ලංකාව තුලට ගෙන ඒම. 1953 සිට මෙම නීතිය හරහා අපනයන ආදායම් රට තුළට ගෙන ඒමට ව්‍යාපාරිකයන්ට සහ ආයෝජකයන්ට සිද්ධ වෙනවා. නමුත් මේ නීතිය 2017 රනිල් වික්‍රමසිංහ තමන්ගේ පාලන සමය තුළ අහෝසි කරනවා . 1953 විනිමය පාලන පනත අහෝසි කිරීම හරහා තමයි අද උද්ගත වී තිබෙන අර්බුද නිර්මාණය වෙන්නේ. රනිල් වික්‍රමසිංහ අද කරන්නේ අර්බුදයට විසදුම් හොයන එක නෙමෙයි තමන් විසින් නිර්මාණය කරපු අර්බුදය කළමනාකරණය කරමින් මේ මොහොතේ රාජපක්ෂලාගේ, ඔහුගේ දේශපාලන ජීවිතය ආරක්ෂා කරන්න උපාය යෙදීම පමණයි.
ගෝඨාභය, මහින්ද ජනතාව ගැන හිතනවා නම් 2017 රනිල් වික්‍රමසිංහ වෙනස් කළ පනත නැවත 53 විනිමය පාලන පනත වර්තමානයට ගැලපෙන ආකාරයට නිර්මාණය කරලා මේ අර්බුද ඇතිවීම වළක්වන්න තිබුණා. නමුත් ගෝඨාභය මහින්ද කියන්නෙත් රනිල් වික්‍රමසිංහගේ යාළුවන්ගේ ගජ මිතුරන් නිසා ඔවුන්ට මාහජන මුදල් වංචා කිරීමට අවශ්‍ය කරන රනිල්ට කරන්න බැරුව ගිය යටිතල පහසුකම් නිර්මාණය කරලා දෙනවා.
ඔබ මඳක් කල්පනා කරලා බලන්න මේ අර්බුදයේ කේන්ද්‍රය බවට අද පත්වෙලා තිබෙන්නේ ඩොලර්. නමුත් ඔබ දන්නවද ගෙවීගිය මාස පහ තුළ වාර්තාගත ආදායමක් අපි ලබල තියෙනවා කියලා. 2022 ජනවාරි සිට මැයි දක්වා මාස පහ තුළ ඩොලර් බිලියන පන්දහක් ඉක්මවා යන අපනයන ආදායමක් ලබාගෙන තියෙනවා. දළ වශයෙන් මාසකට ඩොලර් බිලියනයක අගයකට අපනයන ආදායමක් ලබනවා. බොහෝ විට මේ වසර තුල වාර්තාගත අපනයන ආදායමක් ලබන්න නියමිතයි.එසේනම් කොහොමද අපිට අත්‍යවශ්‍ය ආහාර ටික, බෙහෙත් ටික, ඉන්ධන ටික, ගෙන්න ගන්න ඩොලර් නැතිවුනේ.
සාමාන්‍යයෙන් අපේ රටේ මාසෙකට ඉන්ධන සහ ගෑස් සඳහා අවශ්‍ය වන මුදල ඩොලර් මිලියන 400 ආසන්න වෙනවා. ගෙවී ගිය මාස පහ තුළ අපනයන ආදායම සමග සසදා බලන කළ මේ මුදල වෙන් කර ගැනීම අසීරු නැහැ. නමුත් අපි ඩොලර් හිගයක ඉන්නවා. එහෙම නම් මොකක්ද මේ අර්බුදයේ හේතුව.
දැන් අපිට පැහැදිලි වෙන්න ඕනේ රනිල් වික්‍රමසිංහ 2017 කළ විනිමය පාලන පනත සංශෝධනය හරහා අනිවාර්යෙන්ම රට තුලට ඇතුල් වීමට නියමිතව තිබුණු අපනයන ආදායම් කපාහැරීම සහ වංචා කිරීමට නීති සංශෝධනය කිරීම හරහා මේ අර්බුද නිර්මාණය වෙලා තියෙනවා කියන එක.
අද රටේ ජනතාව මුහුණ දෙන ප්‍රශ්න එක රැයකින් එක මොහොතින් නිර්මාණය වූවා නෙමෙයි. 74 වසරක පාලන සමය තුළ මොවුන් එකිනෙකා මාරුවෙන් මාරුවට අන්‍යෝන්‍ය සහයෝගයෙන් නිර්මාණය කළ අර්බුද නිසා රනිල් ගෝඨා පමණක් නෙවෙයි මෛත්‍රී නාමල් ඇතුළු අනාගතයේ රටේ පාලන බලය හොබවන්නට විවිධ වෙට්ටු දමමින් වංගු ගසමින් ජනතාව හමුවට එන්න ඉන්න සියලු දෙනා පන්නා දමන්න ඕන. කළු ඇඳගෙන ආවත් කහ ඇඳගෙන ආවත්කපුටා කපුටා මයි .
-
සෙබල මරණයට වගඋත්තරකරු කමල් ගුණරත්න අත්අඩංගුවට ගන්නෙ නැත්තෙ ඇයි?
ගෝඨාභය රාජපක්ෂ ජනාධිපතිවරයා විසින් ආරක්ෂක අමාත්‍යංශ ලේකම් ලෙස පත් කළ කමල් ගුණරත්නගේ නිවසක අලුත්වැඩියා කිරීම්වල යොදවා සිටි යුද හමුදා සෙබළෙක් වහලයෙන් වැටී මරණයට පත්ව ඇත.
පනාගොඩ යුද හමුදා කඳවුරේ ඉංජිනේරු රෙජිමේන්තුවේ සෙබළකු වන මිය ගිය සෙබළා කමල් ගුණරත්නට අයත් කොට්ටාව බෝගහවත්ත පාරේ නිවසක් පිළිසකර කිරීමට අනාරක්ෂිත තත්වයන් යටතේ යොදවා සිටියදී අනතුරට පත්ව ඇත.
ලංකාවේ ආරක්ෂක හමුදා සෙබලුන් අණට කීකරු වීමට පමණක් පුහුණු කරවා සෙබළකුගෙන් ඉටු විය යුතු කාර්යයන්ට අමතරව දේශපාලකයන් මෙන්ම වෙනත් ප්‍රභූන්ගේ පෞද්ගලික කටයුතුවලටද යොදාවන්නට මහින්ද රාජපක්ෂ පාලන සමයේ සිටම කටයුතු කරන ලදී. මෙම වෘත්තියමය නොවන කටයුතුවලට විරෝධයක් යුද හමුදාවෙන් පැමිණියේ නැති අතර සමාජයෙන්ද ඊට කිසිදු විරෝධයක් මතුව නැත. රජයේ සේවකයන් ලෙස මහජන අරමුදලින් වැටුප් ලබන සොල්දාදුවන් තම පෞද්ගලික මෙහෙකාරකමේ යෙදවීම සහ ඔවුන්ගේ ජීවිත අඳුරට ඇද දැමීම සම්බන්ධයෙන් දේශපාලන නායකත්වය මෙන්ම හමුදා ප්‍රධානින්ද වගකිව යුතුය.
අණට කීකරුවීමේ තත්වය තුළ ජනතා විරෝධතාවලට වෙඩිතැබීමේ සිදුවීම් නිසා මහින්ද රාජපක්ෂ පාලනය යටතේ හලාවතදී ඇන්ටනි නමැති ධීවරයා මරාදමන ලද අතර කටුනායක ආයෝජන කලාපයේදී රොෂේන් චානක මරාදමන ලදී, රතුපස්වල ධම්මික පෙරේරාගේ රබර් අත්වැසුම් කම්හලේ අපද්‍රව්‍ය නිසා ජල මූළාශ්‍ර විනාශයට පත් වූ නිසා රතුපස්වල ජනතාව ගෙන ගිය විරෝධතාවට යුද හමුදා භටයන් වෙඩි තැබීමෙන් උද්ඝෝෂනයට පැමිණි එක් අයකුද මාර්ගයේ ගමන් ගත් දෙදෙනකුද මරා දමනු ලැබිණි.
ජනතාව පාලකයන්ට විරෝධය පළ කරමින් දේශපාලන ප්‍රතිසංස්කරණ ඉල්ලා සිටින මොහොතක යුද හමුදාව ඇතුළු ආරක්ෂකයන් පාලකයන්ගේ පැත්තේ සිට ජනතාව මර්දනයට කටයුතු කිරීම නිසා ජනතා ජයග්‍රහණ ඉටුකරගැනීමට බාධා පැමිණ ඇත.