මෙතෙක් කලක් දේශපාලනඥයින්ගේ වත්කම් පිළිබඳ දැනගැනීමට ජනතාවට අවස්ථාවක් නොතිබුණු බවත් ඔවුන්ට එම අවස්ථාව ලැබුණේ වත්මන් රජය බලයට පැමිණීමෙන් අනතුරුව බවත් කෘෂිකර්ම හා පශූ සම්පත් නියෝජ්‍ය අමාත්‍ය නාමල් කරුණාරත්න පවසයි.
“දැන් මෙහෙමනෙ, මේ මැති ඇමතිවරුන්ගෙ හරි කාගෙ හරි වත්කම් ජනතාවට දැකගන්න අවස්ථාවක් තිබුණෙ නැහැනෙ. දැන් ඒ අවස්ථාව ලැබිලා තියෙනවානෙ. අපි ගන්න ඕනෙ ඒක. දැන් වත්කම් ගත්තාම මමත් අවුරුදු ගාණක සිට වත්කම් බැරකම් ප්‍රකාශ බාරදීලා තියෙනවා. ඒ අඛණ්ඩව බාරදීගෙන ආපු එක තමයි අපි මේ වසරක් පාසා කරන්නෙ. එතකොට අපි මොකක්වත් හංගලා නෑ. හංගන්න බෑ. අපෙ ඇත්ත වත්කම් තමා අපි පෙන්නලා තියෙන්නෙ. මේවා ඇතුළෙ කිසිම තැනක අයථා මුදල් නෑ. අයථා දේපළ නෑ. අපිට අපේ පරම්පරාවලින් අපේ අම්මා තාත්තාගෙන් ආපු දේපළ මොනවා හරි තියෙනවා නම් ඒවා, අපි හම්බ කරගත්ත ඒවා, අපෙ පවුල්වල අය විවිධ වෘත්තීන්වල යෙදෙනවා, එතකොට ඒගොල්ලො ඒවා, මේ ඔක්කොම එකතු වුණාම තමයි මේ වත්කම් හැදෙන්නෙ. ඉතින් ඒ තත්වයත් එක්ක අපි හැමෝගෙම ඒ වත්කම් ඉදිරිපත් කරලා තියෙනවා. ඕනෙම කෙනෙකුට මේක අභියෝගයට ලක්කරන්න පුළුවන්. එහෙම නම් මොනවා හරි සැක සංකාවක් තියෙනවා නම් පැමිණිල්ලක් දාන්න පුළුවන් මේකට පරීක්ෂණයක් කරන්න කියලා. ඒක නිසා දැන් කවුරුවත් මේගොල්ලො මේ හොයාගත්තුවා නෙවෙයි මේ. මේ අපේ මැති ඇමතිවරු අපි අත්සන් කරලා ඉදිරිපත් කරපු වත්කම්. මේවා කොළේ වහලා ගහලා නෑ. මේ වෙලාවේ ලොකු මාතෘකාවක් වෙලා තියෙනවා වසන්ත සමරසිංහ කියන චරිතය. එහෙම නම් වසන්ත සමරසිංහ ඇමතිතුමාට තිබුණා නෙ ඕක එහෙම මෙහෙම කරලා අඩුකරලා දාන්න තිබුණානෙ. එහෙම දාලා නැහැනෙ. මේ දාලා තියෙන්නෙ ඇත්ත වත්කම්. ඒ තත්වයත් එක්ක ඒවා අයථා විදියට උපයපු ඒවාද, පගා ගහලා තියෙනවාද, කොමිස් ගහලා තියෙනවාද, ඕනෙ කෙනෙකුට ඒවා හොයන්න පුළුවන්. මේවා විවෘතයි. මේකෙදි අපි සතුටු වෙන්න ඕනෙ කාරණය තමයි මෙතෙක් ඔය දේශපාලනඥයින්ගේ වත්කම් කොහොමද කියලා දැනගන්න රටේ ජනතාවට අවස්ථාවක් තිබුණෙ නෑ. හැබැයි දැන් වර්තමාන ආණ්ඩුව ආවාට පස්සෙ, දැන් මුළු රටම දන්නවා ජනාධිපතිගෙ, අගමැතිගෙ, ඇමතිලාගෙ වත්කම් කොහොමද කියලා. හැබැයි විපක්ෂ නායක වත්කම් බාරදීලාත් නැහැනෙ ? එතකොට ඒක ලොකු මාතෘකාවක් නෙවෙයිද ? දැන් රටේ මැති ඇමතිවරුන් වත්කම් බැරකම් ප්‍රකාශ බාරදෙනකොට 2029 සිහින ජනාධිපති විපක්ෂ නායක වත්කම් බැරකම් ප්‍රකාශ බාරදීලාත් නැහැනෙ”
නාමල් කරුණාරත්න නියෝජ්‍ය අමාත්‍යවරයා මේ බව පැවසුවේ ඊයේ (25) දිනයේදී මාධ්‍ය වෙත අදහස් දක්වමිනි.
කෙසේවෙතත් 2023 අංක 09 දරන දූෂණ විරෝධී පනතේ දක්වා ඇති ආකාරයට ජනාධිපතිවරයා, පාර්ලිමේන්තුවේ සාමාජිකයන්, තානාපතිවරුන් ඇතුළු උසස් නිල තල දරන පුද්ගලයන් මෙන් ම මහ බැංකු අධිපතිවරයා ද සිය වත්කම් සහ බැරකම් ප්‍රකාශ අල්ලස් හෝ දූෂණ විමර්ශන කොමිෂන් සභාවට ලබා දිය යුතු ය. මෙම පනත ගෙන එන ලද්දේ රනිල් වික්‍රමසිංහ විසිනි.
එසේම ආණ්ඩුවේ ඇමතිවරු වත්කම් බැරකම් ප්‍රකාශ ගැන විවිධ පරස්පර කතා කියමින් සිටියි. පසුගියදා රූපවාහිනී වැඩසටහනකට සහභාගී වූ සුනිල් හඳුන්නෙත්ති පැවසුවේ වත්කම් බැරකම් සම්බන්ධ ප්‍රශ්න නොඅසන ලෙසත් ප්‍රශ්නයක් ඇත්නම් ඒ ගැන අල්ලස් කොමිසමට පැමිණිලි කරන ලෙසයි. එසේම කැමැත්තෙන් දෙන දෙයක් කැමැත්තෙන් බාරගන්නේ නම් අනිත් අයට පාන්ද? යනුවෙන් කරන ප්‍රකාශය සම්බන්ධයෙන් සමාජය තුළ කතා බහක් ඇතිවිය.
