ඊශ්‍රායල හමුදා ප්‍රහාර හේතුවෙන් ගාසා තීරයේ දරුවන් ලක්ෂ 9 අධික සීතලෙන්, කුසගින්නෙන් සහ ප්‍රමාණවත් පානීය ජලය නොමැතිව පීඩා විඳින බව ගාසාහි සෞඛ්‍ය අමාත්‍යංශයේ මාධ්‍ය ප්‍රකාශක අශ්රෆ් අල් කුඩ්රා පසුගිය පැවති මාධ්‍ය හමුවකදී ප්‍රකාශ කර ඇත.

එසේම ගැබිණි මාතාවන් 50000 ක් මන්දපෝෂණයෙන් පෙළෙන බවත් එම ගැබිණි මාතාවන්ට නිසි වෛද්‍ය ප්‍රතිකාර නොලැබෙන බවත් එහිදී කුඩ්රා පැවැසුවේය.ජිවිත බේරා ගැනීම සඳහා හැකි ඉක්මණින් ප්‍රමාණවත් වෛද්‍ය පහසුකම් තිබෙන රෝහලක් වෙත රැගෙන යායුතු රෝගීන් 5300 ක් සිටින බවද අල් කුඩ්රා පවසා ඇත.

පසුගිය ඔක්තෝබර් 7 වැනිදා සිට මේ දක්වා ඊශ්‍රායල හමුදාවේ ප්‍රහාර වලින් පලස්තීන වැසියන් 22,000 ක් පමණ ඝාතනයට ලක්ව ඇති බවත් තවත් 56500 ක් පමණ තුවාල ලබා ඇති බවත් පලස්තීන බලධාරීහු ප්‍රකාශ කළහ.මේ වනවිට ගාසා තීරයේ වෙසෙන පලස්තීන ජනතාවගෙන් සියයට 40 ක් සාගතයකට මුහුණ දීමේ අවදානමකට මුහුණපා සිටින බවද පලස්තීන බලධාරීහු පෙන්වා දෙයි.

එසේම පලස්තීන වැසියන් මිලියන 1.5 කට ඊශ්‍රායල හමුදා ප්‍රහාර හේතුවෙන් මේ වන විට නිවාස අහිමි වී තිබෙන බවද පලස්තීන බලධාරීහු ප්‍රකාශ කර ඇත.