අනුරාධපුර මධ්‍ය මහා විදුහලේ 10 වැනි ශ්‍රේණියේ ඉගෙනුම ලැබූ15 හැවිරිදි සිසුවකු පොළඟකු දෂ්ට කිරීමෙන් පසුගිය 08වෙනිදා මියගොස් තිබෙනවා. ඔහු අනුරාධපුර කලත්තෑව ප්‍රදේශයේ විනුක් තෙවිනාත් නමැති සිසුවෙක්.
සර්පයා දෂ්ට කිරීමෙන් සිසුවා අනුරාධපුර ශික්ෂණ රෝහලට ඇතුළත් කිරීමෙන් අනතුරුව හදිසි ප්‍රතිකාර ඒකකයට ඇතුළත් කෙරුණා. විෂ උත්සන්න වීම නිසා දැඩි සත්කාර ඒකකයට ඇතුළත් කිරීමෙන් පසු ඉකුත් 08 දා සිසුවා මිය ගොස් තිබෙනවා.
අදාල සර්ප විෂට ලබාදෙන ඖෂධ ලබාදීමෙන් පසු ඇතිවන ආසාත්මික තාවයට අත්‍යඅවශ්‍ය ජීවිතාරක්ෂක ඖෂධ වර්ග නොමැති වීමෙන් මෙම මරණය සිදුව ඇති බවට වාර්තා වනවා.
සිසුවා අසාධ්‍ය වීමෙන් පසු අදාළ අත්‍යවශ්‍ය ඖෂධය රෝහලේ නොමැති බවට රෝහල් බලධාරීන් දෙමාපියන්ට දැනුම් දී තිබුණා. පසුව ඔවුන් මෙම ඖෂධය සොයා පුද්ගලික ඔසුහල් 48 කට ගොස් ඇතත් ඔෂධය සොයා ගැනීමට හැකිව නැහැ. ඒ අතර තුර කාලය ඉක්ම යාමත් සමඟ දරුවා මියගොස් තිබෙනවා.
දැනට රට තුළ පවතින මෙම අත්‍යාවශ්‍ය හා ජීවිතාරක්ෂක ඖෂධ හිගය සම්බන්ධයෙන් තමන් මාස ගණනක සිට කරුණු ඉදිරිපත් කළ ද සෞඛ්‍ය බලධාරීන් හා සෞඛ්‍ය අමාත්‍යවරයා දැඩි නිහඩ පිළිවෙතක් අනුගමනය කරන බව සමස්ථ ලංකා වෛද්‍ය නිලධාරීන්ගේ සංගමයේ ප්‍රධාන ලේකම් වෛද්‍ය ජයන්තබණ්ඩාර පවසනවා.
“මෙම ඖෂධ හිඟය නිසා රෝගී ජීවිත දැඩි අවධානමකට ලක්වෙලා. මෙම දරුවාගේ මරණය රටපු‌රා රෝහල් තුළ සිදුවන මෙවැනි මරණ වලින් එක් අනාවරණයක් පමණයි. ආණ්ඩුව වහාම මෙම ඖෂධ හිඟයට පිළියම් යෙදිය යුතුයි. නැතිනම් ආණ්ඩුව හා සෞඛ්‍ය ඇමතිවරයා මෙම මරණ වල වගකීම බාර ගත යුතුයි” යැයි වෛද්‍ය ජයන්ත බන්ඩාර වැඩිදුරටත් අවධාරණය කළා.
