කිසිඳු සෞඛ්‍යාරක්ෂිත වැඩපිළිවෙළක් නොමැතිව කඩිමුඩියේම පාසල් ආරම්භ කිරීමට හැකිවීමත්, වසර දෙකකට ආසන්න කාලයක් පුරා වසා දමා තිබෙන විශ්වවිද්‍යාල ආරම්භ කිරීමට කටයුතු නොකිරීමත්, පිළිබඳව කරුණු විමසමින් අ.වි.ශි.බ.ම අද අධ්‍යාපන අමාත්‍යවරයා වෙත ලිපියක් යොමු කළ අතර ඒ පිළිබඳව මාධ්‍ය හමුවක් පවත්වමින් කරුණු අනාවරණය කරන ලදී.

මාධ්‍ය හමුවේදී අ.වි.ශි.බම වෙනුවෙන් අදහස් දැක්වූ ගල්වැව සිරිධම්ම හිමියන් ප්‍රකාශ කළේ පාසල් හදිසියේ ආරම්භ කිරීමත්, විශ්වවිද්‍යාල තවදුරටත් වසා තැබීමත් ආණ්ඩුවේ දේශපාලන උවමනාව මත සිදුකරන බවයි.

අධ්‍යාපනඥයින් ,විශ්ව විද්‍යාල ආචාර්යවරුන් සහ ගුරු සංගම් එක්ව සාකච්ඡා කර විශ්ව විද්‍යාල ආරම්භ කිරීම සදහා අවශ්‍ය වැඩ පිළිවෙල හිටපු අධ්‍යාපන ඇමතිවරයාට ලබා දුන් බවත් මේ වන තෙක් වගකිව යුතු සියලුම දෙනා නිහඬ ප්‍රතිපත්තියක් අනුගමනය කරමින් සිටින්නේ ආණ්ඩුවේ උවමනාව මත බවද අන්තර් විශ්ව විද්‍යාල ශිෂ්‍ය බල මණ්ඩලය පෙන්වා දෙයි.

මෙරට පාසල් ශිෂ්‍යයන් ලක්ෂ 40ක් පමණ සිටින බවත් විශ්ව විද්‍යාලවල සිටින්නේ ශිෂ්‍යයන් 160 000ක්, ආචාර්යවරු 6400ක් සහ අනධ්‍යන සේවකයින් 15 000 පමණක් බවත් මෙම පිරිස් වයස අවරුදු 18ට වැඩි පිරිස් බැවින් බහුතරය එන්නත් කරණය පවා සිදුකර ඇති බවඅ මෙහිදී පෙන්වා දී ඇත.

එබැවින් ආණ්ඩුවේ උවමනාව මත විශ්ව විද්‍යාල ආරම්භ කිරීම තව දුරටත් ප්‍රමාද නොකට කඩිනමින් විශ්ව විද්‍යාල ආරම්භ කිරීම සදහා කටයතු කළ යුතු බව අන්තර් විශ්ව විද්‍යාල ශිෂ්‍ය බල මණ්ඩලය පෙන්වා දෙයි.