පාර්ලිමේන්තුවට ඉදිරිපත් කර ඇති කොළඹ වරාය නගර විශේෂ කොමිෂන් සභා පනත් කෙටුම්පතට එරෙහිව පෙරටුගාමී සමාජවාදී පක්ෂය අද (19) කොළඹ උපරිමාධිකරණ සංකීරණය අසල විරෝධතාවයක නිරත විය.
එහිදී අදහස් දැක්වූ එම පක්ෂයේ අධ්‍යාපන ලේකම් පුබුදු ජයගොඩ ප්‍රකාශ කළේ වෙරළ තීරයට දැඩි හානි සිදු කරමින්, සියලු පාර්ශ්වවල විරෝධයද නොසලකා වරාය නගර ව්‍යාපෘතිය ක්‍රියාත්මක වූ බවයි. එසේ ගොඩනැගූ වරාය නගරය තුළ ලෝක බලවතුන්ට, කලාපීය බලවතුන්ට, ගෝලීය ප්‍රාග්ධනයට රිසි සේ කටයුතු කිරීමට අවශ්‍ය පසුබිම සකස් කිරීම මෙම පනත් කෙටුම්පත හරහා සිදුවන බවට ඔහු චෝදනා කර තිබේ. එසේම මෙරට තුල ක්‍රියාත්මක අන පනත් උදාහරණයක් ලෙස මූලික කම්කරු නීති පවා මේ පනත හරහා කප්පාදු කරන බව පුබුදු ජයගොඩ පැවසීය.
