ජනාධිපතිවරයාට සහ ආණ්ඩුවට වහාම ඉවත්වන ලෙස බලකරමින් අද (28) ක්‍රියාත්මක වූ දීපව්‍යාප්ත වැඩවර්ජනය අති සාර්ථක වී තිබේ.
වර්ජනයට සමගාමීව කොළඹට අමතරව ප්‍රධාන දිස්ත්‍රික්ක රැසක ක්‍රියාත්මක විරෝධතා සඳහා රාජ්‍ය සහ පෞද්ගලික අංශයේ සේවකයන් දහස් ගණනින් එක්ව සිට ඇත.
මාතර, කුරුණෑගල, මහනුවර, අනුරාධුපර, හලාවත, කෑගල්ල සහ ගම්පහ නගරවල මෙන්ම ආයෝජන ප්‍රවර්ධන කළාප පිහිටි කටුනායක සහ කොග්ගල යන ප්‍රදේශ ඇතුළු රට පුරා ප්‍රධාන නගර සහ සෙසු නගර කේන්ද්‍රකරගනිමින් විරෝධතා 1000 කට අධික සංඛ්‍යාවක් පැවැති බව වාර්තා වේ.
රටේ විවිධ ගැටලුකාරී අවස්ථාවලදී විරෝධතාවල කේන්ද්‍රස්ථාන වන මාතර, කුරුණෑගල, මහනුවර සහ අනුරාධපුර යන නගරවලට විරෝධතාවයකට රැස්වූ විශාලතම ජනකාය අද රැස්ව සිටි බව බොහෝ දෙනා පවසති.
