කොළඹ විශ්ව විද්‍යාලය අවට පසුගිය මාර්තු 7 හා 8 දෙදින පැවති උද්ඝෝෂණ සහ කැලණිය විශ්ව විද්‍යාලය අවට මාර්තු 8 වැනිදා පැවති උද්ඝෝෂණ පාලනය කිරීම සඳහා පොලිසිය ක්‍රියාත්මක වූ ආකාරය පිළිබඳ පරීක්ෂණයක් පැවැත්වීමට ශ්‍රී ලංකා මානව හිමිකම් කොමිෂන් සභාව තීරණය කර තිබෙනවා.
එම පරීක්ෂණයට අදාළව මාර්තු 13 වැනිදා කොමිෂන් සභාව හමුවේ පෙනී සිටින ලෙස මහජන ආරක්ෂක අමාත්‍ය ටිරාන් අලස්ට දැනුම් දී ඇතැයි කොමිෂන් සභාව නිවේදනය කළා.
ඒ උද්ඝෝෂණ මැඩපැවැත්වීම සඳහා පොලිසිය අනුගමනය කරන ලද ක්‍රියාපිළිවෙත් පැහැදිලි කර ගැනීම සඳහායි.
විශ්ව විද්‍යාල සිසුන් සිදුකළ එම උද්ඝෝෂණ පාලනය කිරීම සඳහා පොලිසිය අමානුෂික ලෙස කටයුතු කළ බවට දිගින් දිගටම චෝදනා එල්ල වූ අතර කොළඹ විශ්ව විද්‍යාලයේ නීති පීඨය තුළට පවා පොලිසිය කඳුලු ගෑස් ප්‍රහාර එල්ල කළා.
මේ අතර විශ්වවිද්‍යාල පරිශ්‍ර තුළට පොලීසිය ඇතුලු වීම සම්බන්ධයෙන් පියවර ගන්නැයි, අධ්‍යාපන අමාත්‍යවරයා අභ්‍යන්තර කටයුතු අමාත්‍යාංශයෙන් ඉල්ලීමක් ද කර තිබෙන බව වාර්තා වේ.
