Tag: muslims

  • මාස 09 ක් PTA යටතේ රඳවා තබාගත් සුහයිල් ‘නිදොස් කොට නිදහස්’

    මාස 09 ක් PTA යටතේ රඳවා තබාගත් සුහයිල් ‘නිදොස් කොට නිදහස්’

    සමාජ මාධ්‍ය ඔස්සේ ඊශ්‍රායලයට විරෝධය දැක්වූ බව පවසමින් ත්‍රස්තවාදය වැළැක්වීමේ පනත යටතේ මාස 9කට අධික කාලයක් රක්ෂිත බන්ධනාගාර කර සිට පසුව ඇප මත මුදාහැරි මාවනැල්ලේ පදිංචි මුහම්මද් සුහයිල් නම් සැකකාර තරුණයා නිදොස් කර නිදහස් කිරීමට ගල්කිස්ස අතිරේක මහෙස්ත්‍රාත්වරිය අද (16) නියෝග කර තිබේ.

    සැකකාර තරුණයාට එරෙහිව නඩුව තවදුරටත් පවත්වාගෙන යාමට නොහැකි බවට නීතිපති උපදෙස් ලබා දී ඇති බව දෙහිවල පොලිසිය වැඩිදුර වාර්තාවක් ඉදිරිපත් කරමින් අධිකරණයට දන්වා සිටීම හා නඩුවේ ඉදිරි කටයුතු සඳහා ප්‍රමාණවත් සාක්ෂි නොමැතිවීම ආදී කරුණු සැලකිල්ලට ගනිමින් මෙම නියෝගය නිකුත් කර තිබේ.

    21 හැවිරිදි මෙම තරුණයා ත්‍රස්තවාදය වැළැක්වීමේ පනත යටතේ පසුගිය වසරේ ඔක්තෝබර් මස 25 වන දින දෙහිවල පොලිසිය විසින් අත්අඩංගුවට ගනු ලැබූ අතර, පසුව ගල්කිස්ස අතිරේක මහෙස්ත්‍රාත් අධිකරණය වෙත ඉදිරිපත් කරනු ලැබී තිබේ.

    මේ තරුණයා ත්‍රස්තවාදය වැළැක්වීමේ තාවකාලික විධිවිධාන පනත යටතේ මාස නවයක් රඳවා තබාගත්තේ ඊශ්‍රායලය කොඩිය පාගන අන්දමේ වීඩියෝ කොටසක් ඉන්ස්ටග්‍රෑම් හරහා පළ කිරීම හේතුවෙනුයි.

    පළමු අවස්ථාවේදී,( ඔක්තොම්බර් 23) සිය ජාතික හැඳුනුම්පත රැගෙන යාමට අපොහොසත් වීම හේතුවෙන් දෙහිවල පොලිසිය විසින් ඊශ්‍රායල කොන්සියුලර් කාර්යාලය අසලදී ඔහුව අත්අඩංගුවට ගෙන තිබූ අතර ඊට පසු දින (24) එම ලේඛනය අධිකරණයට ඉදිරිපත් කිරීමෙන් පසුව ඔහුව නිදහස් කර තිබුණි.

    කෙසේවෙතත් එදිනම දෙහිවල පොලීසිය විසින් කට උත්තරයක් ගැනීමට යැයි පවසමින් ඔහු යළිත් පොලීසියට රැගෙන ගොස් ඇති අතර, දින දෙකකට පසුව වැඩබලන මහේස්ත්‍රාත්වරයා වෙත ඉදිරිපත් කිරීමෙන් පසුව මෙසේ මාස 9කට ආසන්න කාලයක් රක්ෂිත බන්ධනාගාරගත කර තිබේ.

    කෙසේ නමුත් සුහයිල්ට සිදු වූ අත්තනෝමතික හා සාක්ෂි නොමැති අත්අඩංගුවට ගැනීමේ ක්‍රියාව වෙනුවෙන් ශ්‍රී ලංකාවේ ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ද ගොනු කිරීමට පියවර ගෙන ඇති බව ද සඳහන් වේ.

    මීට පෙරද ඊශ්‍රායලයට විරෝධය දක්වමින් ස්ටිකරයක් ඇලවූ මොහොමඩ් රුෂ්ඩි නම් තරුණයෙකු පොලීසිය විසින් ත්‍රස්තවාදය වැළක්වීමේ පනත යටතේ රඳවා ගැනීමේ ආන්දෝලනාත්මක සිදුවීමක් ගැන වාර්තා විය. ඔහුගේ මානව හිමිකම් උල්ලංඝණය කර ඇතැයි ශ්‍රී ලංකා මානව හිමිකම් කොමිෂන් සභාව තීන්දු කර තිබුණි.

  • PTA යටතේ රඳවා සිටි තරුණයට ඇප – චෝදනාවලින් නිදහස් කර නැහැ

    PTA යටතේ රඳවා සිටි තරුණයට ඇප – චෝදනාවලින් නිදහස් කර නැහැ

    ස්ටිකරයක් ඇලවීම නිසා අත් අඩංගුවට ගෙන ත්‍රස්ත පනත යටතේ සති දෙකකට ආසන්න කාලයක් රඳවාගෙන සිටි මොහමඩ් රුෂ්ඩි නැමති මුස්ලිම් තරුණයා ඇප මත නිදහස් කර තිබේ. නමුත් ඔහුට විරුද්ධව නගා ඇති චෝදනා එලෙසම පවතින බව පෙනේ.

    මෙම තරුණයා ත්‍රස්තවාදය වැළක්වීමේ පනත යටතේ රඳවා ගැනීම සඳහා ජනාධිපති අනුර කුමාර දිසානායක අත්සන් තැබීම සම්බන්ධයෙන් විශාල විරෝධයක් මතුවිය. බොහෝ පිරිසක් සමාජ මාධ්‍ය ජාල හරහා අදහස් දක්වමින් සඳහන් කර තිබුනේ ත්‍රස්තවාදය වැළක්වීමේ පනත හරහා පීඩාවට පත්වූ දේශපාලන ව්‍යාපාරයක් ඒ පනත යොදාගැනීම ගැන ලැජ්ජා විය යුතු බවයි. එසේම ඊශ්‍රායලයට විරෝධයක් පළකරමින් ඇලවූ ස්ටිකරයක් හේතුවෙන් අත්අඩංගුවට ගැනීම ගැනද විශාල විරෝධයක් එල්ල වී ඇත. එයට හේතුව මේ ආණ්ඩුවේ ප්‍රබල ඇමතිවරයෙකු වෙන බිමල් රත්නායක පලස්තීන සහයෝගීතා ව්‍යාපාරයේ සභාපති ලෙස කටයුතු කිරීමයි.

    එසේම මෙම සිදුවීම සම්බන්ධයෙන් පොලිසිය බොරු ගණනාවක් ගොතන ලදී. ඉන් එකක් වූවේ ‘යම් ආකාරයකින් ත්‍රස්තවාදී ක්‍රියාවක් කිරීමට ප්‍රවෙදිතාවයක් දක්වන පුද්ගලයකු බවට තිබු සාධාරණ සැකය මත’ මොහොමඩ් රුෂ්ඩි අත්අඩංගුවට ගන්නා ලද බවයි.

    “මෙම සැකකරුගේ ක්‍රියා කලාපය සම්බන්ධව දීර්ඝ ලෙස විමර්ශන කරමින් පවතින අතර එහිදී හෙළිදරව් වූ කරුණු අනුව මොහු අන්තර්ජාලය භාවිත කරමින් සහ වෙනත් ක්‍රමවේද උපයෝගී කර ගැනීම හේතුවෙන් යම් මානසික අභිප්‍රේරණයකට ලක්වී ඇති පුද්ගලයෙකු බවට නිරීක්ෂණය වී ඇති බැවින්, එම මානසික තත්ත්වය මත ආගමික අන්තවාදී ක්‍රියාවක් සිදුකිරීමට ඔහුට ඇති ප්‍රවේදීතාවය පිළිබඳව වැඩිදුර විමර්ශන කටයුතු සිදු කරමින් පවතියි,” යනුවෙන් පොලිසිය නිකුත් කළ නිවේදනයක සඳහන් වේ.

    අත් අඩංගුවට ගන්නා ලද තරුණයා උලමා සභාව වෙත ඉදිරිපත් කරන ලදුව ‘මුස්ලිම් ජාතිකයෙකුට එහා ගිය තත්ත්වයක් තිබෙන’ රුෂ්ඩි පුනරුත්ථාපනය කළ යුතු බව එම සභාව ප්‍රකාශ කළේ යයි පොලිස් ප්‍රකාශක ජ්‍යෙෂ්ට පොලිස් අධිකාරි බුද්ධික මනතුංග පවසා තිබුණි.

    සමස්ත ලංකා ජමියතුල් උලමා සභාව (ACJU) මෙම ප්‍රකාශය පසුව ප්‍රතික්ෂේප කර තිබුණි.

  • සුමන්තිරන්, මනෝ ගනේෂන් සහ හකීම්ලා නව සන්ධානයක්?

    සුමන්තිරන්, මනෝ ගනේෂන් සහ හකීම්ලා නව සන්ධානයක්?

    ඉදිරි මහ මැතිවරණයට ඉදිරිපත්වීම සඳහා දෙමළ සහ මුස්ලිම් පක්ෂ කිහිපයක් එක්ව නව සන්ධානයක් ගොඩ නැගීම සම්බන්ධයෙන් සාකච්ඡා
    ආරම්භ කර තිබේ.

    ඒ අනුව අදාළ සාකච්ඡාවල දෙවන අදියරේ සාකච්ඡා අද (28) දිනයේ පැවැත්වීමට නියමිතව තිබුණි.

    දෙමළ ප්‍රගතිශීලී සන්ධානයේ නායක මනෝ ගනේෂන්, ශ්‍රී ලංකා මුස්ලිම් කොංග්‍රසයේ නායක රවුෆ් හකීම් සහ දෙමළ ජාතික සන්ධානය නියෝජනය කරමින් එම්.ඒ සුමන්තිරන් යන හිටපු මන්ත්‍රීවරුන් අතර මෙම සාකච්ඡාව පැවැත්වෙනු ඇත.

    මෙහි පළමු වටයේ සාකච්ඡා පසුගිය සතියේ පැවති අතර එහිදී ඉදිරි මැතිවරණවල දී දෙමළ මුස්ලිම් පක්ෂ එක්ව තරග කිරීම සම්බන්ධයෙන් අවධානය යොමුව තිබුණි.

    කෙසේ වෙතත් මෙහිදී නව සන්ධානයක් බිහි කිරීම පිළිබඳ අවසන් එකඟතාවයකට පැමිණ නොමැති බවද වාර්තා විය.

    මේ වන විටත් ශ්‍රී ලංකා මුස්ලිම් කොංග්‍රසය සහ දෙමළ ප්‍රගතිශීලී සන්ධානය සමගි ජන බලවේගය පක්ෂයේ හවුල්කරුවන් වන අතර දෙමළ ජාතික සන්ධානය ද ඊට එක්කර ගැනීම පිළිබදව ද එහිදී අදහස් පළ ව තිබේ.

    කෙසේ වෙතත් පසුගිය දා පැවති ජනාධිපතිවරණයේ දී දෙමළ ජාතික සන්ධානයේ සහාය සමගි ජන බලවේගයේ ජනාධිපති ධුර අපේක්ෂක විපක්ෂ නායක සජිත් ප්‍රේමදාස ට හිමිවිය.

    මෙවැනි තත්ත්වයක් තුළ විපක්ෂයේ දේශපාලන පක්ෂ ඒකාබද්ධව තරග කළහොත් පාර්ලිමේන්තුවේ මන්ත්‍රී ආසන විශාල සංඛ්‍යාවක් ඔවුන්ට හිමිකර ගත හැකි බව මෙම පක්ෂ වල මතය වී තිබේ.

    උපුටා ගැනීම – අද දෙරණ

  • අහනෆ් ජසීම් නිදොස් කොට නිදහස්

    අහනෆ් ජසීම් නිදොස් කොට නිදහස්

    වර්ගවාදය හා අන්තවාදය ඉගැන්වීමේ ව්‍යාජ චෝදනා යටතේ ත්‍රස්ත මර්දන හා විමර්ශනය කිරීමේ කොට්ඨාසය මඟින් අත්අඩංගුවට ගනු ලැබූ අහනෆ් ජසීම් නිදොස් කොට නිදහස් කිරීමට පුත්තලම මහාධිකරණ විනිසුරු නදී අපර්ණා සුවඳුරුගොඩ විසින් අද (12) නියෝගයක් නිකුත් කර තිබෙනවා.

    අහනෆ් ජසීම්ට එරෙහිව නීතිපති දෙපාර්තුමේන්තුව විසින් සාක්ෂි මෙහෙයවීම අවසන් කළ බවට මින් පෙර අධිකරණය වෙත දැනුම් දී තිබු අතර එහිදී අහනෆ් ජසීම් වෙනුවෙන් පෙනී සිටි පාර්ශවය විත්තියේ සාක්ෂි නොකැඳවාම ඔහු නිදහස් කරන ලෙස අධිකරණයෙන් ඉල්ලීමක් කර තිබුණා.

    එම ඉල්ලීම සලකා බැලූ පුත්තලම මහාධිකරණ විනිසුරවරිය නීතිපති දෙපාර්තුමේන්තුව අහනෆ්ට විරුද්ධ චෝදනා සාධාරණ ලෙස ඔප්පු කර නොමැති බව පෙන්වා දෙමින් ඔහු නිදොස් කොට නිදහස් කිරීමට අද (12) තීන්දු කළා.

    එහිදී, අහනෆ් ජසීම් වෙනුවෙන් සිටි නීතීඥ සංජීව විලසන් ජයසේකර අධිකරණය හමුවේ කරුණු දක්වමින් අහනෆ්ට අයත්ව තිබූ ලැප්ටොප් පරිගණකය සහ නවරසම් පොතේ පිටපත් 100 ගණනක් අත්අඩංගුවට ගෙන ඇති අතර එය නිදහස් කරන ලෙස නියෝගයක් ලබා දෙන ලෙස ඉල්ලා සිටියා.

    එහිදී විනිසුරුවරිය ප්‍රකාශ කළේ අදාළ භාණ්ඩ කිසිවක් නඩු භාණ්ඩ ලෙස මහාධිකරණයට ඉදිරිපත් කර නොමැති බවයි.

    කෙසේවෙතත්, මෙම නියෝගයේ පිටපතක් රැගෙන ගොස් එම භාණ්ඩ කොහේ හෝ රඳවා තිබේ නම් නියෝගය මහේස්ත්‍රාත් උසාවියට ඉදිරිපත් කර එම භාණ්ඩ නිදහස් කර ගැනීමට කටයුතු කරන ලෙසද විනිසුරුවරිය විසින් උපදෙස් ලබා දී තිබුණා.

    නවරසම් යනුවෙන් කාව්‍ය ග්‍රන්ථයක් රචනා කළ අහනෆ් ජසීම් 2020 මැයි මාසයේදී අත්අඩංගුවට ගනු ලැබූ අතර ඔහුට එරෙහිව චෝදනා ගොනු කිරීමකින් තොරව දින 579කට ආසන්න කාලයක් ඇප ලබා දීමෙන් තොරව රඳවා ගැනීමටද කටයුතු කර තිබුණා.

    එමෙන්ම එහිදී හිජාස් හිස්බුල්ලාට විරුද්ධව සාක්ෂි ලබා දෙන ලෙස තමාට බලපෑම් කළ බවද අහනෆ් ජසීම් පසුව අධිකරණය හමුවේ දැනුම් දී තිබෙනවා.

  • උසාවිය ඇප මත නිදහස් කළ අහ්නාෆ් ජසීම් කවියා ආණ්ඩුවට ත්‍රස්තවාදියෙක්

    උසාවිය ඇප මත නිදහස් කළ අහ්නාෆ් ජසීම් කවියා ආණ්ඩුවට ත්‍රස්තවාදියෙක්

    කවියෙකු සහ ගුරුවරයෙකු ලෙස කටයුතු කළ අහ්නාෆ් ජසීම් ත්‍රස්තවාදී ක්‍රියාකාරකම් සඳහා නම් කළ පුද්ගලයකු ලෙස ශ්‍රී ලංකා රජය විසින් තව දුරටත් ලැයිස්තුගත කර තිබේ.

    2023 ජුනි මස 8වැනිදා ආරක්ෂක අමාතාංශයේ ලේකම් කමල් ගුණරත්න විසින් නිකුත් කරන ලද අංක 2335/16 දරණ අතිවිශේෂ ගැසට් නිවේදනය මගින් පුද්ගලයන් 301 ක් හා සංවිධාන 15 ක් නම් කර ඇත.

    “කලින් කලට සංශෝධිත සහ 2022 අගෝස්තු මස 1 වන අංක 2291/02 දරන අති විශේෂ ගැසට් පත්‍රයේ පළ කරන ලද, ලැයිස්තුවට කරන ලද සංශෝදන මගින් අවසන් සංශෝධිත, 2014 මාර්තු මස 21 වන දින අංක 1854/41දරන අති විශේෂ ගැසට් පත්‍රයේ පළ කරන ලද නම් කරන ලද තැනැත්තන්, කණ්ඩායම් සහ අස්ථිත්ව ලැයිස්තුව එහි උපලේඛන ඉවත් කර ඒ වෙනුවට පහත දැක්වෙන උපලේඛන ආදේශ කිරීම මගින් තවදුරටත් මෙයින් සංශෝධනය කරනු ලැබේ,” යි එම අතිවිශේෂ ගැසට් පත්‍රයේ සදහන්ව තිබේ.

    2022 වසරේ අගෝස්තු මස පළමුවැනිදා ආරක්ෂක ලේකම් කමල් ගුණරත්න විසින් නිකුත්කළ අංක 2291/02 දරණ අතිවිශේෂ ගැසට් නිවේදනය මගින් පුද්ගලයන් 316 ක් හා සංවිධාන 15ක් නම් කර තිබු අතර අහ්නාෆ් ජසීම්ගේ නම එයට ඇතුලත්ව තිබුනි.

    අහ්නාෆ්ගේ නීතිඥ සංජය විල්සන් ගුණසේකර ට්ව්ටර් පනිවිඩයක් හරහා පෙන්වා දෙන්නේ ආරක්ෂක අමාත්‍යාංශයේ ලේකම්ගේ සහ ශ්‍රී ලංකාවේ පාලක පන්තියට පින්සිදුවන්නට අහ්නාෆ් ජසීම් රැකියාවක් පවා සොයා ගත නොහැකිව මේ වන විට ගොවිතැන් කරන බවයි.

    “ඔහු අත්අඩංගුවට ගැනීම මානව හිමිකම් උල්ලංඝනය කිරීමක් බවට UNWGAD හඳුනාගෙන තිබේ.” එම ට්ව්ටර් පනිවිඩයේ වැඩි දුරටත් සදහන්ය.

    UNWGAD යනු අත්තනෝමතික ලෙස අත් අඩංගුවට ගෙන රඳවා තබා ගැනීම පිළිබඳ විමර්ශනය කරන එක්සත් ජාතීන්ගේ ක්‍රියාකාරී කණ්ඩායමයි.

    2017 දී ලියා පලකළ නවරසම් (நவரசம்) පද්‍ය සංග්‍රහය ගැන සහ සිය ශිෂ්‍යයන් ‘අන්තවාදී මතවාදවල’ අනුගාමිකයන් බවට පත් කිරීමේ අභිලාෂයෙන් ඔවුන් ‘අන්තවාදී’ කරුණුවලට නිරාවරණය කළ බවට චෝදනා කරමින් 2020 මැයි 16 දා පන්ඩාරවේලියේ පිහිටි ඔහුගේ නිවසේදී අත් අඩංගුවට ගන්නා ලද අහ්නාෆ් ජසීම් ත්‍රස්තවාදය වැලැක්වීමේ පනත යොදා ජාත්‍යන්තර මානව හිමිකම් වල විරෝධය නොතකා දින 579ක් සිරගත කොට තිබුනි.

    අධිකරණය විසින් ඇප මත නිදහස් කර යැවීමෙන් පසුත් ත්‍රස්තවාදී ක්‍රියාකාරකම් සඳහා නම් කළ පුද්ගලයකු ලෙස ශ්‍රී ලංකා රජය විසින් ඔහු ලැයිස්තුගත කර තිබේ.

  • නැටවෙන රූකඩ

    නැටවෙන රූකඩ

    සෞදි අරාබියේ 92 වන ජාතික දිනය සැමරීමේ උත්සවය කොළඹ ෂැංග්‍රිලා හෝටලේය්දී ඊයේ (23) පස්වරුවේ උත්සවාකාරයෙන් පැවැත්විණි.

    මෙම ජාතික දින උත්සවයේ විශේෂ අවධානයට ලක්වූයේ මැති ඇමතිවරුන්ට අමතරව බොදු බල සේනා සංවිධානෙය් මහ ලේකම් ගලගොඩඅත්තේ ඥානසාර හිමි විශේෂ ආරාධිතයෙක් ලෙස මෙම අවස්ථාවට එක්ව තිබීමයි.

    මුස්ලිම් අන්තවාදයක් රට තුළ ක්‍රියාත්මක බව පවසමින් ඒ පිලිබද දැඩි ලෙස ක්‍රියාකල හා විවේචනය කළ ඥානසාර හිමිගේ පැමිණීම සමාජ මාධ්‍ය තුළ විශේෂ කතා බහකට ලක්ව තිබේ.

    බොදු බල සේනා සංවිධානයේ ප්‍රධාන විධායක නිළධාරී කථිකාචාර්ය දිලන්ත විතානගේ ද විශේෂ ආරාධිතයකු ලෙස මෙම අවස්ථාවට සහභාගී වී තිබිණ. අග්‍රාමාත්‍ය දිනේෂ ගුණවර්ධන, කතානායක මහින්ද යාපා අෙබ්වර්ධන, ජනාධිපති ජ්‍යෙෂ්ඨ උපදේශක සාගල රත්නායක ඇතුළු සම්භාවනීය ආරාධිතයින් රැසක් මීට එක්ව සිට තිබේ.

    වසරකට ඇමෙරිකා ඩොලර් බිලයන 6ක ඉන්ධන වසර පහක කාලයක් සඳහා අඛණ්ඩව ණය පදනම යටතේ ලබාදීමට සෞදි අරාබි රාජ්‍ය මූලික එකඟතාවය පළ කර ඇතැයි පසුගියදා වාර්තා විය. ජනාධිපතිවරයාගේ විශේෂ නියෝජිතයකු ලෙස සෞද අරාබි රාජ්‍යයේ සංචාරයක නිරත වූ පරිසර අමාත්‍ය නසීර් අහමඩ් ශ්‍රි ලංකාවේ ආයෝජනය කරන්නැය ද එරට බලධාරීන්ගෙන් ඉල්ලා තිබේ.

    කෘෂිකර්මික, පොහොර නිෂ්පාදනය ඛනිජතෙල් ගබඩා පහසුකම් ඉදිකිරීම ඉන්ධන සැපයුම් ස්ථාන පිහිටුවීම පිරිපහදුව නවීකරණය සහ පුළුල් කිරීම ඛනිජ සම්පත් අවස්ථා සහ පුනර්ජනනීය බලශක්තිය ප්‍රවාර්ධනය කිරීම සඳහා සෞදි ආයෝජන ශ්‍රි ලංකාවට ලබා ගැනීම පිළිබඳව එහිදී සකච්ඡාකර ඇතැයි වාර්තා විය. ඒ අනුව රටක් ලෙස ආර්ථික අර්බුදයෙන් බැට කන අවස්ථාවක සෞදි රාජ්‍යයේ මැදිහත්වීම අපේ රට කෙරෙහි තීරණාත්මකව බලපානු ඇත. ඒ සඳහා ලංකා රජයට සෞදි අරාබිය ශේප් කරගැනීම අවශ්‍යව තිබෙන්නට ඇත.

    ගලබොඩඅත්තේ හිමිට ජාතිය අමතක වී ඇත්තේ ඒ නිසා වියහැකිය යන සැකය බොහෝ දෙනා මතුකරමින් සිටියි.

  • බුර්කාව මතක්වෙන්නෙ ICU ඇඳන් මදිවෙන නිසාද?

    බුර්කාව මතක්වෙන්නෙ ICU ඇඳන් මදිවෙන නිසාද?

    නිසි ක්‍රියාමාර්ග නොගැනීම නිසා උත්සන්න වෙමින් පවතින කොවිඩ් වසංගතය හමුවේ සෞඛ්‍ය පහසුකම් ප්‍රමාණවත් නොවන තත්ත්වයක රෝගීන් මිය යද්දී රජයේ ඇමතිවරුන් බුර්කා තහනම් කිරීමට කැබිනට් අනුමැතිය හිමිවීම ගැන සමාජ මාධ්‍ය තුළ සංවාදයක් ඇතිව තිබේ.

    අනන්‍යතාවය සැඟවෙන ආකාරයේ මුහුණු ආවරණ තහනම් කිරීමට කැබිනට් අනුමැතිය හිමිවූ බව සරත් වීරසේකර පවසා තිබේ. මෙම කැබිනට් යෝජනාව ඉදිරිපත් කර ඇත්තේත් ඔහු විසින්මයි. මෙම තීරණය මහජනතාවට දැනුම් දීම සඳහා ඔහු ඉතා තදියමකින් සිට ඇති බව ඔහු මෙම තීරණය ගැන දැනුම්දෙමින් දමා ඇති facebook පණිවිඩවලින් දක්නට ලැබේ.

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

    පසුගිය මාර්තු 16 වනදා සරත් වීරසේකර පවසා සිටියේ මුස්ලිම් කාන්තාවන් පළදින බුර්කාව තහනම් කිරීමට වන ගැසට් පත්‍රයට තමන් අත්සන් කර අවසන් බවත් එය කැබිනට් මණ්ඩලයට ඉදිරිපත් කරන බවත්ය.

    කෙසේ වෙතත් ඊට පසුදින කැබිනට් රැස්වීමට එය ඉදිරිපත් කර තිබුණේ නැත.

    එම යෝජනාවට රජයේ ඇතැම් පාර්ශවයන්ගෙන් මෙන්ම ජාත්‍යන්තරයෙන්ද විරෝධය එල්ල වී තිබුණි. ආණ්ඩුව විටින් විට බුර්කා තහනමේ කතාව මතුකිරීම සහ නැවත යට යැවීම හිතා මතාම කරන්නක් බව දක්නට ලැබෙන බව සමාජ මාධ්‍ය පරිශීලකයන්ගේ අදහස වී තිබේ. ඔවුන් ප්‍රශ්න කර සිටින්නේ කොවිඩ් රෝගීන් වැඩිවෙමින් තිබෙන මොහොතක සෞඛ්‍ය පහසුකම් වැඩිකිරීම ගැන තීරණ නොගෙන මෙවැනි ජාතිවාදී තීරණ ගනු ලබන්නේ රටේ ප්‍රශ්න අමතක කිරීමට විය නොහැකිද යන්නයි.

    මාවනැල්ල මූලික රෝහලේ ප්‍රතිකාර ලබමින් සිටි රෝගියෙකු දැඩි සත්කාර ඒකක පහසුකම් ලබාගැනීමට නොහැකිවීම නිසා මිය ගොස් ඇති බව ලංකා සී නිව්ස් වාර්තා කර තිබුණේ අද දිනයේයි.

    මෙසේ මියගොස් ඇත්තේ මෙම රෝහලේම වෛද්‍යවරයකුගේ සොහොයුරකු බව පැවසේ.

    මෙම වෛද්‍යවරයාගේ සොහොයුරාට 24 දා ඇති වුණ කැස්ස හා සෙම්ප්‍රතිශ්‍යාව නිසා ප්‍රතිකාර ලබා ගැනීමට රෝහල වෙත ගිය මොහොතේ කොවිඩ් 19 වයිරසය ආසාදනය වී ඇතැයි සැක කළ වෛද්‍යවරුන් ඔහුව පීසීආර් පරීක්ෂණයක් සඳහා යොමු කිරීමෙන් අනතුරුව එම රෝගියා අනෙක් රෝගීන්ගෙන් වෙන්කර ප්‍රතිකාර කිරීම ආරම්භ කර ඇත.

    පෙරේදා 25 මෙම රෝගියාට ස්වසන අපහසුතා සමග තවත් සාංකූලතා ඇති වූ හෙයින් වහාම වෛද්‍යවරුන් හා හෙද කාර්ය මණ්ඩල එක්ව කොවිඩ් 19 ආසාදිත පුද්ගලයන් සඳහා ප්‍රතිකාර කෙරෙන දැඩි සත්කාර ඒකකයක ඇඳක් සොයා ගැනීමට උත්සාහ දැරූවත් එය අසාර්ථක වී ඇත.

    රෝගියාගේ තත්ත්වය අසාධ්‍ය තත්ත්වයට පත් වී හෘදයාබාධ තත්ත්වයක් ඇතිව මියගොස් ඇත. පසුව කළ එක්ස්රේ පරීක්ෂණය මගින් ඔහුට නිව්මෝනියා තත්ත්වය ඇති වී තිබෙන බවට තහවුරු වී තිබේ.

    කෑගල්ල මහ රෝහලේ කොවිඩ් ආසාදිත සංකූලතා ඇති දැඩි සත්කාර අවශ්‍ය රෝගීන් තිදෙනකුට අවශ්‍ය ප්‍රතිකාර කළ හැකි දැඩි සත්කාර ඒකකයක් පැවතියත් ඊට අවශ්‍ය කාර්ය මණ්ඩලවල අඩුවක් නිසා ක්‍රියාත්මක නොවෙයි. එම ඒකකයේ පවතින ඇඳන් තුන සඳහා අවශ්‍ය සියලු උපකරණ තිබියදීත් කාර්ය මණ්ඩල අඩුවක් නිසා එය වසා දමා තිබීම කොවිඩ් 19 ආසාදිත රෝගීන් වැඩිවෙමින් පවතින මෙවන් මොහොතක ගැටළුවක් බව සේවකයන් පෙන්වා දී තිබුණි.

    මෙරට කොරෝනා රෝගීන්ට ප්‍රතිකාර ලබාදෙන ප්‍රධානම රෝහල ලෙස අයි.ඩී.එච්. රෝහලේ කොරෝනා ආසාදිතයන් 135ක් පමණ ප්‍රතිකාර ලැබූ අතර එහි හදිසි ප්‍රතිකාර ඒකකයේ ඇඳන් සියල්ලම පිරීගොස් ඇති බව පසුගිය 25වනදා වාර්තා විය. ඊට අමතරව අද දිනයේ අරුණ පුවත්පත වාර්තා කර තිබුණේ කළුබෝවිල රෝහලේ දැඩි සත්කාර ඒකකයද කොවිඩ් රෝගීන්ගෙන් පිරී ඉතිරී ගොස් ඇති බවයි. කළුබෝවිල රෝහලේ නියෝජ්‍ය අධ්‍යක්ෂිකා, විශේෂඥ වෛද්‍ය මුදිතා පෙරේරා පවසා ඇති පරිදි එම රෝහලේ කොවිඩ් ප්‍රතිකාර ඒකකයේ රෝහල් 110 ම ‍කොවිඩ් ආසාදිත රෝගීන් ප්‍රතිකාර ලබමින් සිටියි.

    මේ අතර කළුබෝවිල රෝහල් බළධාරීන් මේ දිනවල මුහුණ දී තිබෙන අනෙක් බරපතලම ප්‍රශ්නය වන්නේ හුස්ම ගැනීමේ අපහසුතාවයෙන් පසුව කොවිඩ් රෝගීන්ට අවශ්‍ය ඔක්සිජන් සපයා ගැනීමයි. කොවිඩ් ප්‍රතිකාර ඒකකයේ දෛනික අවශ්‍යතාවය ඔක්සිජන් සිලින්ඩර් 150 ක් වන නමුත් මේ වනවිට රෝහල සතු ධාරිතාවය සිලින්ඩර් 80 කට සීමා වී ඇති බව අරුණ පුවත්පත වාර්තා කර තිබේ.

    එසේම කොවිඩ් රෝගීන් අතරින් විශාල පිරිසකට දින තුන හතරකින් පමණ නිව්මෝනියා තත්වයක් ඇතිවන බවත් හෝමාගම රෝහලෙහි ප්‍රතිකාර ලබන කොවිඩ් රෝගීන්ගෙන් හතරෙන් එකකට පමණම කෘතීමව ඔක්සිජන් ලබාදීමට සිදුව ඇති බවත් එම රෝහලෙහි කායික රෝග විශේෂඥ වෛද්‍ය එරන්ද නාරංගොඩ පවසා තිබේ.

    කළුබෝවිල රෝහලේ රෝගීන් අතර ගර්භනී කාන්තාවන් 26 දෙනෙකු සිටින අතර ඔවුන්ගෙන් එක් අයෙකුට ප්‍රතිකාර ලබාදීම සඳහා එක්මෝ යන්ත්‍රයක අවශ්‍යතාවය දැඩිව තිබෙන බවද නියෝජ්‍ය අධ්‍යක්ෂවරිය පවසා ඇත.

    දැන් ජාති බේදයකින් තොරව සියලුම ජනතාවට අවශ්‍යව ඇත්තේ සෞඛ්‍ය පහසුකම් වැඩිකිරීම සඳහාවූ තීරණ කඩිනමින් ගැනීම බව සමාජ මාධ්‍ය තුළ අදහස් පළවෙමින් පවතියි. මෙවැනි ව්‍යාජ තීරණ හරහා තවදුරටත් ජනතාව රැවටිය නොහැකි බවද ඔවුන්ගේ අදහස වී තිබේ.

  • යන්නෙ කොහෙද මල්ලෙ පොල්  – බුර්කාව තහනම් කිරීමේ කැබිනට් පත්‍රිකාවට අත්සන් තබයි

    යන්නෙ කොහෙද මල්ලෙ පොල් – බුර්කාව තහනම් කිරීමේ කැබිනට් පත්‍රිකාවට අත්සන් තබයි

    බුර්කාව තහනම් කිරීම සඳහා වන කැබිනට් පත්‍රිකාවට තමා ඊයේ (12) අත්සන් තැබු බව මහජන ආරක්ෂක අමාත්‍ය  සරත් වීරසේකර පැවසීය.

    කළුතර මුණසිංහ ආරාමයේ දී අද (13) පැවති උත්සවයකින් අනතුරුව මාධ්‍ය හමුවේ අදහස් දක්වමින් ඇමතිවරයා මේ බව සඳහන් කළේය.

    බුර්කාව ජාතික ආරක්ෂාවට තර්ජනයක් බව කී ඇමතිවරයා මෙරට ඇති දහසකට වැඩි මද්‍රසා පාසල් තහනම් කිරීමට ද ඉදිරියේ දී පියවර ගන්නා බව කීවේය.

    අන්තවාදයට හේතුවන ආකාරයේ ප්‍රකාශයක් කර ඇති හිටපු ආණ්ඩුකාර අසාත් සාලිට එරෙහිවද නීතිමය පියවර ගන්නා බව ඇමතිවරයා පැවසීය.

    සාමාන්‍යයෙන් රට තුළ ආණ්ඩුව අපකීර්තියට පත්වන සිදුවීමක් ප්‍රසිද්ධ වූ බොහෝ අවස්ථාවලදී ආණ්ඩු එය ආවරණය කරගනු ලබන්නේ ජාතීන් අතර නොසන්සුන්තා ඇතිවෙන ආකාරයේ තීරණ ගැනීමෙනි. මේ ආණ්ඩුව සහ පෙර පැවති ආණ්ඩුව රටේ විශාල ප්‍රශ්නයක් මතුවී ආණ්ඩුවට එරෙහි විරෝධය ඇවිළුණු බොහෝ අවස්ථාවලදී ජාතික ආරක්ෂාව නම් හෑල්ල මතුරනු දැකිය හැකිවිය. මේ මොහොතේ සෑම ක්ෂේත්‍රයකම පාහේ ආණ්ඩුව අපකීර්තියට පත්වෙමින් සිටිනු දැකිය හැකි වේ. ඒත් සමඟම ආණ්ඩුවට එරෙහි විරෝධයද සෑම දෙසින්ම වැඩිවෙමින් පවතියි.

    යහපාලන ආණ්ඩුව සමයේ පාස්කු ප්‍රහාරය වැලැක්වීමට පියවර නොගැනීම ගැන ආණ්ඩුවට එරෙහිව චෝදනා එල්ල වෙද්දී මෛත්‍රී – රනිල් ආණ්ඩුව ගත් පළමු පියවර වූවේ බුර්කාව තහනම් කිරීමයි.

    නමුත් පාස්කු ප්‍රහාරය සහ බුර්කාව අතර කිසිම සම්බන්ධයක් නොතිබුණි.

    මීට දින කිහිපයකට පෙර ස්විස්ටර්ලන්තයේ මුහුණු ආවරණ තහනම් කිරීම පිළිබඳ පැවති ජනමත විචාරණයකදී එම තීරණයට පක්ෂව බහුතර ඡන්ද ප්‍රමාණයක් ලැබුණි.

    මේ පිළිබඳ යෝජනාව ගෙන එනු ලැබුවේ අන්ත දක්ෂිණාංශික පක්ෂයක් වූ ස්විස් ජනතා පක්ෂයයි. (SVP – Swiss People’s Party)

    එහිදී මෙම තීරණය සම්බන්ධයෙන් නැගුණු ප්‍රබල විරෝධයක් වූවේ කාන්තාවන් පැළඳිය යුත්තේ කුමක්ද යන්න නිගමනය කිරීම රාජ්‍යයට අයත් කාර්යයක් නොවන බවයි. එසේම මෙය නෛතික අසමානතාව පිළිබඳ ප්‍රතිපත්තිය තවදුරටත් පුළුල් කරන්නක් මෙන්ම බැහැර කිරීම සම්බන්ධයෙන් මුස්ලිම් සුළුතරයට යැවුණු පැහැදිලි සංඥාවක් බවද විචාරකයන්ගේ අදහස විය. ජර්මනියේ ලුසර්න් විශ්ව විද්‍යාලය කළ පර්යේෂණයකට අනුව, ස්විට්සර්ලන්තය තුළ කිසිවකු හෝ බුර්කාව නොපළඳින තරම් වන අතර කාන්තාවන් 30 දෙනෙක් පමණ නිකාබය පළඳින බවද අනාවරණය වී තිබුණි .

  • ආණ්ඩුවේ තවත් ජාතිවාදී තීරණයක් – කොවිඩ් මරණ භූමදානයට කොළඹ සිට 300km දුරින් පිහිටි දූපතක්

    ආණ්ඩුවේ තවත් ජාතිවාදී තීරණයක් – කොවිඩ් මරණ භූමදානයට කොළඹ සිට 300km දුරින් පිහිටි දූපතක්

    ශ්‍රී ලංකාවේ කොවිඩ් හේතුවෙන් මියයන මෘතදේහ භූමදානය සඳහා කිලිනොච්චියේ ඉරණතිවු ප්‍රදේශයේ භූමදානය කිරීමට සුදානම් බව කැබිනට් ප්‍රකාශක අමාත්‍ය කෙහෙළිය රඹුක්වැල්ල පවසා තිබේ.

    මේ වන විට සිදුවෙමින් පවතින සතිපතා අමාත්‍යමණ්ඩල තිරණ දැනුම් දීමේ මාධ්‍ය හමුවේ දී අමාත්‍යවරයාගෙන් විමසූ පැනයකට පිළිතුරක් වශයෙන් ඔහු මේ බව පවසා ඇත.

    තවද භූමදානය කිරීමට නියමිත කොවිඩ් මෘත දේහ ඉරණතිවු බලා ගෙන යාම සම්බන්ධයෙන් වන වියදම් රජය විසින් දරන බව කැබිනට් ප්‍රකාශක අමාත්‍ය කෙහෙළිය රඹුක්වැල්ල මහතා සඳහන් කර සිටියා.

    කෙසේවෙතත් මුස්ලිම් ජනතාව පවසන්නේ භූමදානය සඳහා ආණ්ඩුව අවසර දුන්නත් මෙම තීරණය හරහා නැවතත් තම ජාතිවාදී බව පෙන්වා දී ඇති බවයි. මෙම දූපත කොළඹ නගරයේ සිට 300km දුරින් පිහිටා තිබීම නිසා තමන්ට අවශ්‍ය වූ විට ගෞරව දැක්වීමේ දුෂ්කරතාද මතුවන බව මුස්ලිම් ජනතාව පවසමින් සිටියි.

    ඊට අමතරව සමාජ විචාරකයන් පවසන්නේ මෙවැනි දුරකට කොවිඩ් මරණ ගෙනයාම අධික වියදමක් දැරීමට සිදුවන කටයුත්තක් බවයි. එම ප්‍රවාහන වියදම රජය දරන්නේ නම් එය ගෙවනු ඇත්තේ ජනතා බදු මුදල් වියදම් කිරීමෙනි.

    මීට අමතරව මේ දුපත් යුගලයේම ප්‍රමාණය වර්ග කිලෝමීටර 6ක් පමණ වන බවත් දැනට එහි පවුල් 300-400ක් අතර ප්‍රමාණයක් පදිංචිව සිටින බවද පැවසේ. 1992 සිවිල් යුද තත්වය තුළ සිවිල් ජනයාගෙන් නාවික හමුදාව උදුරා ගත් මේ දිවයින නැවත සිවිල් ජනයා පදිංචි වී ඇත්තේ වසර 26කට පසුව 2018 වසරේ අප්‍රේල් මාසයේදීය. ඒ දිගුකලක් තිස්සේ කරන ලද අරගලයකිනි.

  • දෙමළ, මුස්ලිම් ජනතාවගේ අයිතිවාසිකම් වෙනුවෙන් වූ  P to P පාගමන යාපනෙන් අවසන් වෙයි

    දෙමළ, මුස්ලිම් ජනතාවගේ අයිතිවාසිකම් වෙනුවෙන් වූ P to P පාගමන යාපනෙන් අවසන් වෙයි

    යුද සමයේ අතුරුදන් කළවුන්ට යුක්තිය ඉටු කිරීම, උතුරු හා නැගෙනහිර ජනයාගේ මානව හිමිකම් ආරක්ෂා කිරීම හා වතු කම්කරුවන්ගේ දෛනික අවම වැටුප රු. 1000ක් කිරීම යන ඉල්ලීම් වෙනුවෙන් පොතුවිල් සිට යාපනය දක්වා දිවෙන පාද යාත්‍රාව අද(7) යාපනය පොලිකන්ඩි වෙත ළඟාවී තිබේ.

    එම පාගමන තුන්වැනි දිනයේදී තුන්වැනි දිනයේ ත්‍රිකුණාමලයෙන් ගමන් අරඹා ඉදිරියට යද්දී එයට ගල් මුල් ප්‍රහාර ද එල්ලවී තිබේ. කෙසේවෙතත් කඩාකප්පල්කාරී පිවර මැදින් පාගමන්කරුවන් ඊයේ සවස වනවිට උතුරු පලාතට කරා ළඟා වී ඇත.

    ඊට අමතරව පාද යාත්‍රාව සමග ගමන් ගන්නා වාහන වල ටයර් වලට හානි සිදු කිරීමේ අරමුනින් ත්‍රිකුණාමලය පුල්මුඩේ ප්‍රදේශයේ යාන් ඔය පාලම ඉදිරිපිට යකඩ ඇණ තබා තිබෙනු විරෝධතා කරුවන් පොලිසියට පෙන්වා දී තිබේ. යුද හමුදා මුරපොලක් අසල පාර මැද මෙසේ යකඩ ඇණ සවිකර තැබීම නිසා මේ ක්‍රියාවේ වගඋත්තරකරුවන් සම්බන්ධ අනුමාන කළ හැකිය.

    අම්පාර දිස්ත්‍රික්කයේ පොතුවිල් නගරයෙන් පෙබරවාරි 3 බදාදා දියත් කරන ලද සාම පාද යාත්‍රාව නවතා දැමීම අරමුණු කරගෙන අධිකරණ නියෝග ලබා ගැනීමට පොලිසිය පියවර ගෙන තිබේ. නැගෙනහිර පළාතේ පොතුවිල්, කොක්කඩිචෝලේ සහ මඩකලපුව උසාවි වලට අමතරව උතුරේ මන්නාරම හා වවුනියාව මහේස්ත්‍රාත්වරයාගෙන් මෙම තහනම් නියෝග අයදුම් කිරීමට පොලිසිය කටයුතුකර තිබිණි. කෙසේ වෙතත්, යාපනය සහ මල්ලාක්කම් මහේස්ත්‍රාත් වරුන් පොලිසිය ඉල්ලූ තහංචි නියෝගය ලබා දී නැත.

    ආරක්ෂක අංශ විසින් සාමකාමී විරෝධතාවකට මේ ආකාරයෙන් බාධා කිරීම නිසාම, ගල් ප්‍රහාර හා යකඩ ඇණ තැබීම සම්බන්ධ සැකයද ආණ්ඩුවේ ආරක්ෂක අංශවලට යොමුවී ඇත. ඒ නිසාම උතුරු හා නැගෙනහිර ජීවත් වන ජනතාවගේ මානව හිමිකම් පිළිබඳව සත්‍ය අනාවරණය කිරීම මෙම දින කිහිපයේ පාගමන ආශ්‍රිතවම සිදුව ඇත.

    රටේ සෙසු ජන කොටස් දැනුවත් කිරීම වෙනුවෙන් පොතුවිල් සිට පොලිකන්ඩි දක්වා දියත් කර ඇති පාදයාත්‍රාවට එක්වීමට සුදානම් වී යාපනයේ විපක්ෂ දෙමළ දේශපාලනඥයන් කිහිප දෙනකු හට උසාවියෙන් තහංචි පනවා තිබේ. උතුරු පළාත් සභා මන්ත්‍රීවරයකුව සිටි එම්.කේ සිවාජිලිංගම් මාධ්‍යවේදීන් හා පවසා ඇත්තේ තමන් ඇතුළු දේශපාලනඥයන් කිහිපදෙනකු වෙත පෙබරවාරි 3 බදාදා යාපනයේ මහේස්ත්‍රාත් අධිකරණය විසින් තහනම් නියෝගය නිකුත් කර ඇති බවයි.

    ඉලංගෙයි තමිල් අරසු පක්ෂයේ නායක මාවෙයි සේනාධිරාජා, යාපනය නගරාධිපති විශ්වලිංගම් මනිවන්නන්, නීතිඥ කනගරත්නම් සුගාෂ්, දෙමළ ජාතික සංධානයේ හිටපු පාර්ලිමේන්තු මන්ත්‍රී ඊ සරවනභවන්, හිටපු උතුරු පළාත් සභාපති සී.වී.කේ සිවඥානම් ට මෙන්ම යාපනයේ විශ්ව විද්‍යාල ශිෂ්‍ය සංවිධානයේ සාමාජිකයන් වෙතත් තහනම් නියෝග නිකුත් කර ඇති බව යාපනයේ මාධ්‍ය වාර්තා අනාවරණය කරයි.

    මේ අන්දමට අධිකරණ නියෝග පැනවුවද ඒ නොතකා වවුනියාවේ මව්වරු පිරිසක් කළු වතින් සැරසී රාජ්‍ය නිදහස් දිනය කළු දිනයක් ලෙස නම් කරමින් සංකේතාත්මක උපවාසයක් පැවැත්වුහ.

    මෙම පාමනේ මූළික අරමුණු සමග දෙමළ ජනතාවගේ ඉඩම් අහිමිකිරීම, වතුකරයේ ජනතාවගේ දෛනික වැටුප රුපියල් දහස දක්වා වැඩි නොකිරීම, කොරෝනාබාධිතව මිය යන ඉස්ලාම් භක්තිකයන්ගේ මළ සිරුරු පුළුස්සා දැමීම හා පාස්කු ප්‍රහාරයෙන් පසු චෝදනා රහිතව අත්අඩංගුවට ගෙන සිටින තරුණ තරුණියන් නිදහස් කරන ලෙස බල කිරීමත් විරෝධයේ අරමුණු බව දෙමළ ජාතික සන්ධානයේ විසින් අවධාරණය කර තිබුණි.

    අතුරුදහන් කරනු ලැබුවන්ගේ ඥාතීන් , කතෝලික රදගුරුවරුන්, ක්‍රිස්තියානි පුජකවරුන්, අතුරුදහන් වුවන්ගේ ඥාතීන්ගේ සංගම් නායිකාවන්, දෙමළ විපක්ෂ මන්ත්‍රීවරුන්, බහුජන ක්‍රියාධරයන්, මුස්ලිම් ප්‍රජා නායකයන්, වෘත්තීය සමිති හා වෙළෙඳ සංගම් නායකයන් ට අමතරව සාමාන්‍ය වැසියන්ද දහස් ගණනින් විරෝධතාවයට එක්ව සිටිති.

    උපුටා ගැනීම – ලංකා විව්ස්