ලංකා විදුලිබල මණ්ඩලයේ (ලංවිම) ප්රතිසංස්කරණ කටයුතුවලට අදාළ “පත්කළ දිනය” (Appointed Date) ගැසට් මගින් ප්රකාශයට පත් කිරීම ප්රමාද වීම නිසා තමන් දැඩි දුෂ්කරතාවයට පත්ව ඇති බව පවසමින්, ස්වේච්ඡා විශ්රාම ගැන්වීමේ ක්රමය (VRS) සඳහා අයදුම් කළ සේවකයින් 2,200 කට අධික පිරිසක් බලශක්ති අමාත්යවරයාගෙන් වහාම මැදිහත් වන ලෙස ඉල්ලා තිබේ.
අද (10) දින අමාත්යවරයා වෙත යොමු කළ ලිපියක් මගින් එම සේවකයින් පවසා ඇත්තේ, 2025 වසරේ සංශෝධිත 2024 අංක 36 දරන ශ්රී ලංකා විදුලිබල පනතට අනුව හඳුන්වා දුන් ස්වේච්ඡා විශ්රාම ගැන්වීමේ ක්රමය යටතේ විශ්රාම ගැනීමට තමන් නිල වශයෙන් කැමැත්ත පළ කළ බවයි. දැනට පවතින ලංකා විදුලිබල මණ්ඩලය විසුරුවා හැර නිෂ්පාදන, සම්ප්රේෂණ, පද්ධති මෙහෙයුම් සහ බෙදාහැරීම් සඳහා අනුප්රාප්තික ආයතන පිහිටුවීමේ රජයේ විදුලිබල ක්ෂේත්ර ප්රතිසංස්කරණවල කොටසක් ලෙස මෙම ක්රමය හඳුන්වා දී තිබුණි.
සේවකයින්ට අනුව, මෙම විශ්රාම ගැන්වීමේ ක්රමය 2025 අගෝස්තු 26 වන දින ගැසට් පත්රයක් මගින් ප්රකාශයට පත් කරන ලද අතර, නව ආයතන සමඟ එක්වන්නේද නැතහොත් විශ්රාම ගන්නේද යන්න තීරණය කිරීමට සේවකයින්ට මාස දෙකක කාලයක් ලබා දී තිබුණි. ඒ අනුව, සේවකයින් 2,200 ක් පමණ නීත්යානුකූලව 2025 ඔක්තෝබර් 27 වන දිනට පෙර තමන් නව ආයතන වෙත මාරු නොවන බව ලංවිම වෙත නිල වශයෙන් දැනුම් දී ඇත.
කෙසේ වෙතත්, සියලුම නීතිමය අවශ්යතා සපුරා තිබියදීත්, ලංවිම කළමනාකාරිත්වය තමන් සේවයෙන් නිදහස් කිරීම ප්රතික්ෂේප කරන බවත්, එමගින් විශ්රාම ගැනීමට, පෞද්ගලික අංශයේ රැකියා කිරීමට, විදේශ රැකියා සඳහා පිටත්ව යාමට හෝ ස්වයං රැකියාවල නිරත වීමට ඇති අයිතිය අහිමි වී ඇති බවත් සේවකයෝ චෝදනා කරති. ඔවුන් අවධාරණය කරන්නේ තමන්ගේ ප්රධාන ගැටලුව වන්දි මුදල් වහාම ලබා ගැනීම නොව, තවදුරටත් ප්රමාදයකින් තොරව සේවයෙන් ඉවත් වීමට ඇති අයිතිය බවයි.
ප්රතිසංස්කරණ සඳහා වන “පත්කළ දින” පිළිබඳව බලශක්ති අමාත්යාංශය මීට පෙර නිල ලිපි මගින් දැනුම් දී තිබූ බව ද එම ලිපියේ සඳහන් වේ. 2025 නොවැම්බර් 11 දිනැති ලිපියකින් 2026 ජනවාරි 1 වනදා තාක්ෂණික පත්කළ දිනය ලෙස හඳුනාගෙන තිබූ අතර, 2025 දෙසැම්බර් 30 දිනැති තවත් ලිපියකින් කැබිනට් අනුමැතියට සහ ගැසට් කිරීමට යටත් ව 2026 පෙබරවාරි 1 වනදා එම දිනය ලෙස යළි තහවුරු කර තිබුණි. එසේ වුවද, පත්කළ දිනය මෙතෙක් ගැසට් කර නොමැති බැවින් අනුප්රාප්තික සමාගම්වලට නීත්යානුකූල බලයක් නොමැති වී ඇති අතර අවිනිශ්චිතතාවය තවදුරටත් දිගු වී ඇති බව සේවකයෝ පවසති.
බලශක්ති ක්ෂේත්ර ප්රතිසංස්කරණ ලේකම් කාර්යාලයේ (PSRS) පවතින අස්ථාවරත්වය පිළිබඳව ද ඔවුහු කනස්සල්ල පළ කරති. එහි අධ්යක්ෂ ජනරාල්වරයා 2026 පෙබරවාරි 1 වනදා පත්කළ දිනය වනු ඇති බවට වාචිකව සහතික වී තිබුණද, ඔහු 2026 ජනවාරි 15 සිට ක්රියාත්මක වන පරිදි සිය ඉල්ලා අස්වීමේ ලිපිය භාර දී ඇත. ප්රතිසංස්කරණ ක්රියාවලියේ තීරණාත්මක අදියරකදී මෙලෙස නායකත්ව හිඩැසක් නිර්මාණය වීම පිළිබඳව ඔවුහු අනතුරු අඟවති.
මෙම ප්රමාදය හේතුවෙන් විදේශ රැකියා අවස්ථා අහිමි වීම, වීසා ලබා ගැනීමේ දුෂ්කරතා, පෞද්ගලික අංශයේ රැකියා අවස්ථා මග හැරීම සහ පවුල්වලට මූල්යමය හා මානසික පීඩනයන් එල්ල වීම වැනි බරපතල මානුෂීය සහ වෘත්තීය ගැටලුවලට තමන් මුහුණ දී සිටින බව සේවකයෝ විස්තර කරති. එසේම, දැනටමත් විදේශගත වී සිටින ඇතැම් සේවකයින්ට ඔවුන්ගේ විශ්රාම ප්රතිලාභ අහිමි විය හැකි පරිදි “සේවය අතහැර ගියා සේ සැලකීමේ” ලිපි නිකුත් කර ඇති අතර, තවත් පිරිසකට තෝරාගත් අයුරින් සිය විශ්රාම අයදුම්පත් ඉල්ලා අස්කර ගැනීමට ඉඩ ලබා දී ඇති බව පවසමින් පරිපාලනමය පරස්පරතා ගැන ද ඔවුහු පෙන්වා දෙති.
තමන්ගේ අභියාචනය මගින් සේවකයින් අමාත්යවරයාගෙන් ඉල්ලා සිටින්නේ:
2026 පෙබරවාරි 1 දින හෝ ඊට පෙර පත්කළ දිනය වහාම ගැසට් කරන ලෙස.
VRS අයදුම්කරුවන්ට ඔවුන්ගේ හිමිකම්වලට හානියක් නොවන පරිදි සේවයෙන් ඉවත් වීමට අවසර දෙන ලෙස.
කාලීන රැකියා අවස්ථා සඳහා දැනටමත් විදේශගත වී සිටින අයගේ අයිතිවාසිකම් ආරක්ෂා කරන ලෙසයි.
මෙම අවිනිශ්චිතතාවය ලංවිම ඵලදායිතාවයට අහිතකර ලෙස බලපාන බවත්, සේවය කිරීමට අකමැති සේවකයින් බලහත්කාරයෙන් රඳවා තබා ගැනීමෙන් ආයතනයට හෝ රටට කිසිදු යහපතක් සිදු නොවන බවත් ඔවුහු වැඩිදුරටත් අවධාරණය කරති.
